belem.ru - Татар мәгарифе порталы

9 сыйныф укучылары өчен тарихтан телдән имтихан кертеләчәк

Рәйсә Сәгадиева — Fri, 11 Sep 2026 07:30:47 +0000

Яңалыкка кагылышлы рәсем:

Россиядә 9 сыйныф укучылары өчен тарихтан телдән имтихан кертергә планлаштыралар. Ул дәүләт йомгаклау аттестациясенә кертү шарты булачак. Бу хакта Россия мәгариф министры Сергей Кравцов белдерде. Аның сүзләренчә, имтиханны якынча ике елдан соң гамәлгә кертергә ниятлиләр. Нәтиҗәләр «зачет/незачет» форматында бәяләнәчәк.

Министр билгеләп үткәнчә, имтихан үткәрү тәртибен әзерләгәндә бәяләү критерийларының аңлаешлы һәм объектив булуы мөһим. Укучылар, ата-аналар һәм укытучылар таләпләрне алдан белергә тиеш.

Телдән имтиханның төп максаты — укучының тарихи материалны эзлекле һәм дәлилле итеп сөйли белүен, сәбәп-нәтиҗә бәйләнешләрен ачыклавын, тарихи чыганаклар белән эшләвен һәм үз фикерен формалаштыра алуын тикшерү.

«Мифокодия» Россиякүләм ясалма интеллект атналыгы старт ала

Рәйсә Сәгадиева — Thu, 10 Sep 2026 09:10:47 +0000

Яңалыкка кагылышлы рәсем:

Россия

2026 елның 10-20 сентябрендә Россиядә «Мифокодия» Россиякүләм ясалма интеллект 2.0 атналыгы үткәреләчәк. Чара «Югары икътисад мәктәбе» илкүләм тикшеренү университеты, «Мәктәп лигасы» АНПО һәм «Цифрлы белем бирү» ҖЧҖ ярдәмендә «Цифриум» компаниясе тарафыннан оештырылды.

Ясалма интеллект атналыгының максатлары:

ясалма интеллект белән эшләү өлкәсендә укучыларның цифрлы компетенцияләрен һәм тәнкыйди фикерләвен үстерү;
укыту процессында үзебезнең ил эшләнмәләрен куллану өлешендә педагогик хезмәткәрләрнең квалификациясен күтәрү;
хезмәт базары трансформациясе шартларында ата-аналарны балаларның һөнәри юнәлеше мәсьәләләренә җәлеп итү.

Кемнәр катнаша ала?

Катнашырга:

5-11 сыйныфлар укучылары;
гомуми белем бирү оешмаларының педагогик хезмәткәрләре;
ата-аналар (законлы вәкилләр) чакырыла.

Барлык чаралар да бушлай үткәрелә.

Катнашучыларны нәрсә көтә?

Мәктәпләр өчен уен дәресләренең һәм «Мифокодия» мәктәп фестиваль вакыйгасының методик материаллары һәм әзер сценарийлары комплекты әзерләнгән. Материаллар экспертлар тарафыннан эшләнгән һәм өстәмә әзерлексез кулланырга әзер.

5-11 сыйныф укучылары өчен интерактив онлайн-турнир — практик биремнәр һәм белем бирү вебинарлары белән көндәлек тематик дәресләр сериясе оештырылды.

«Ясалма интеллект-бинго» конкурс программасы кысаларында мәктәпләр кыйммәтле бүләкләр: педагогларның квалификациясен бушлай күтәрү, проект эшләрен экспертлар белән тәэмин итү һәм мәктәп китапханәсе өчен китаплар комплекты алырга мөмкин.

Ата-аналар өчен, ясалма интеллект үсеше белән бәйле хезмәт базарындагы үзгәрешләрне исәпкә алып, балаларны һөнәри юнәлеш бирү буенча гамәли киңәшләр белән онлайн-агарту курсы әзерләнгән.

Ясалма интеллект атнасында катнашучыларның барысы да исемле сертификатлар алачак.

Ничек катнашырга?

Тулырак программа белән танышу һәм теркәлү өчен рәсми сайтка керегез: Мәгариф оешмаларын, педагогларны, укучыларны һәм ата-аналарны «Мифокодия» Россиякүләм ясалма интеллект атналыгына кушылырга чакырабыз! Бу яңа цифрлы инструментларны үзләштерү, һөнәри компетенцияләрне күтәрү һәм мәгарифне тагын да заманчарак һәм мавыктыргычрак итү мөмкинлеге.

Татар теле һәм әдәбияты укытучыларын бүләкләүгә конкурс игълан ителде

Рәйсә Сәгадиева — Wed, 09 Sep 2026 08:40:16 +0000

Яңалыкка кагылышлы рәсем:

Татарстан

Татар (туган) теле һәм әдәбияты укытучыларына ярдәм итү өчен акчалата бүләкләүгә конкурс игълан ителде.

Әлеге акчалата бүләкләүнең максаты – туган тел (татар) һәм әдәбият буенча республика олимпиадаларында һәм татар теле буенча Халыкара олимпиадада призерлар һәм (яки) җиңүчеләр әзерләгән туган тел (татар) һәм әдәбияты укытучыларын стимуллаштыру.

Акчалата бүләкләүгә конкурс нигезендә сайлап алуда катнашу өчен гаризалар 2026 елның 10-11 сентябрендә olimp.grant-2025@mail.ru электрон адресына кабул ителә

Грант буенча мәгълүмат министрлык сайтында «Укытучылар өчен грантлар» («гомуми белем» – «милли белем») бүлегендә урнаштырылган, сылтама:

Яңалыкка кагылышлы рәсем:

Татарстан

Кадерле дуслар!

Татарстан Республикасы Мәгариф һәм фән министрлыгы исеменнән сезне Россия халыклары телләре көне белән котлыйм. Бүген бу бәйрәм Россия тарихында беренче тапкыр билгеләп үтелә һәм безгә күпмилләтле илебездә яшәүче барлык халыкларның тел байлыгын саклау һәм үстерү мөһимлеген тагын бер кат ассызыклый.

8 сентябрь – танылган шагыйрь Рәсүл Гамзатовның туган көне. Бу дата очраклы гына сайланмаган. Р.Гамзатов шигырьләрен үзенең туган авар телендә һәм рус телендә иҗат иткән. Туган тел темасы аның иҗатында аерым зур урын алып тора. Шагыйрьнең мондый карашы төрле телләрнең уртаклыгын, халыкларның бердәмлеген һәм милләтара татулыкның мөһимлеген символлаштыра.

Татарстанда 170 тән артык милләт вәкилләре дус яши, бер-берсенең телен һәм мәдәниятен хөрмәт итә. Тел – ул аралашу чарасы гына түгел, ә һәр халыкның рухи мирасы, тарихы һәм киләчәге.

Бу бәйрәм көнендә телләрне саклау һәм үстерү юнәлешендә хезмәт куючы һәркемгә рәхмәт сүзләре җиткерәсе килә. Сезнең эшчәнлегегез яшь буынга туган телнең кадерен аңларга, милли традицияләрне саклауга, балаларга күптелле дөньяда үз урынын табарга ярдәм итә.

Укучыларның кызыксынып Россия халыклары телләрен өйрәнүләрен, һәр телнең матурлыгын күрергә өйрәнүләрен телим. Телләр белү – ул тормышта мөмкинлекләрне киңәйтү, төрле мәдәниятләрне аңлау һәм дус-туганлык мөнәсәбәтләрен ныгыту дигән сүз.

Һәр йортта туган тел яңгырасын, ә илебезнең тел байлыгы Россиянең барлык халкы өчен көч һәм бердәмлек чыганагы булып хезмәт итсен.

Казан укытучылары «Иң яхшы туган тел укытучысы» илкүләм бәйгесендә Татарстан данын яклый

Рәйсә Сәгадиева — Mon, 07 Sep 2026 12:00:32 +0000

Яңалыкка кагылышлы рәсем:

Россия

Бүген Липецк шәһәрендә «Иң яхшы туган тел һәм туган тел әдәбияты укытучысы» V Бөтенроссия һөнәри конкурсының сынаулары башлана.

Конкурсның юбилей сезонында Россиянең 87 төбәгеннән 131 педагог катнаша. Алар арасында — 85 укытучы һәм мәктәпкәчә белем бирү оешмаларыннан 46 тәрбияче.

Конкурсның оештыручысы – Россия Федерациясе Мәгариф министрлыгы, операторы – Россия Федерациясе халыкларының туган телләре федераль институты.

Бүген конкурс программасын «Методик остаханә» ачып җибәрә. Катнашучылар үзләренең педагогик идеяләрен, авторлык эшләнмәләрен һәм практикада сыналган һөнәри алымнарын тәкъдим итәчәк.

Татарстан Республикасын конкурста Казан шәһәренең Совет районындагы 11 нче күп профильле лицейның туган (татар) теле һәм әдәбияты укытучысы Резида Курамшина һәм Казан шәһәренең Идел буе районындагы 358 нче балалар бакчасы тәрбиячесе Алсу Галиева тәкъдим итә.

Конкурсның тантаналы ачылышы 8 сентябрьдә — Россия Федерациясе халыклары телләре көнендә үткәреләчәк.

Белем академиясе «Үзем төшерәм: өйрәнчекләр өчен видеопродакшн» курсын булдыруы турында игълан итте

Рәйсә Сәгадиева — Sun, 06 Sep 2026 09:15:12 +0000

Яңалыкка кагылышлы рәсем:

Татарстан

Белем академиясе проекты кысаларында күпләр өчен актуаль булган «Үзем төшерәм: өйрәнчекләр өчен видеопродакшн» курсы тәкъдим ителә: Курс (комплекслы программа) һәркем файдалана алырлык җиһазлар (беренче чиратта, смартфон) кулланып һәм беренчел тәҗрибәдән башка кино төшерүнең тулы циклын үзләштерергә ниятләүчеләр өчен булдырылган.

Укыту татар һәм рус телләрендә алып барыла, «гадидән катлаулыга» дидактик принцибы буенча төзелгән һәм заманча видеомейкерның барлык төп компетенцияләрен колачлый.

Курсны үзләштергән кеше кыйммәтле җиһазлар һәм махсус белгечләр хезмәтләреннән файдаланмыйча, блоглар, социаль челтәрләр, мәгариф проектлары яки бизнес өлкәсендәге тәкъдимнәр өчен мөстәкыйль рәвештә профессиональ медиаконтент булдыра алачак.

Курска язылу өчен әлеге сылтама аша кереп теркәлергә кирәк:

Яңалыкка кагылышлы рәсем:

Татарстан

«Татарстан Республикасы Мәгарифне үстерү институты» өстәмә һөнәри белем бирү дәүләт автоном мәгариф учреждениесе «Россия Мәгариф министрлыгы мәктәбе» проектын гамәлгә ашыру кысаларында гомуми белем бирү оешмаларында команда эшенең иң яхшы практикаларына дистанцион форматта «Хыялдагы мәктәп командасы» педагогик коллективлары конкурсын үткәрү турында хәбәр итә.

Конкурсның федераль операторы – «Дәүләт мәгариф университеты».

Конкурста катнашу өчен Россия Федерациясенең барлык субъектларының дәүләт һәм муниципаль гомуми белем бирү оешмаларыннан бер мәктәпнең идарәче һәм педагогик хезмәткәрләреннән 3-10 кешедән торган командалар чакырыла. Белем бирү оешмасы җитәкчесе команда составына мәҗбүри рәвештә керергә һәм капитан булырга тиеш. Һәр команда магистр юнәлешләргә һәм «Россия Мәгариф министрлыгы мәктәбе» проектының төп шартларына туры килә торган сигез номинациянең берсендә генә катнаша ала.

Конкурс дистанцион форматта өч этапта үткәрелә:

беренче этап 2026 елның 14 сентябреннән 21 сентябренә кадәр;
икенче этап 2026 елның 28 сентябреннән 16 октябренә кадәр;
өченче этап 2026 елның 22 октябреннән 30 октябренә кадәр.
Конкурста катнашу ирекле, бушлай оештырылган. «Хыялдагы мәктәп командасы» педагогик коллективлар конкурсы турындагы нигезләмә кушымтада бирелә. Конкурсны үткәрү тәртибе турында тулырак мәгълүмат Университет сайтында урнаштырылган: Элемтәгә керү өчен Университет хезмәткәре – Дрянова Людмила Васильевна, тел. +7 (495) 780-09-40 (өст.7505, 7519); (эш көннәрендә Мәскәү вакыты белән 9:00 дән 18:00 гә кадәр), konkurs.org@eduprosvet.ru.

11-13 сентябрьдә Россиякүләм «ИТ-диктант» акциясе үткәреләчәк

Рәйсә Сәгадиева — Fri, 04 Sep 2026 05:55:15 +0000

Яңалыкка кагылышлы рәсем:

Россия

2026 елның 11-13 сентябрендә Россия Цифрлы үсеш, элемтә һәм массакүләм коммуникацияләр министрлыгы ярдәмендә ел саен оештырыла торган «ИТ-диктант» Россиякүләм белем бирү акциясе үткәреләчәк. Чара 2018 елдан бирле оештырыла. 2025 елда анда 89 төбәктән 390 мең кеше катнашкан, уртача нәтиҗә 75 балл тәшкил иткән, дип хәбәр итә оештыручылар.

Быел теләк белдергән һәркем цифрлы күнекмәләрен тикшерә алачак. Катнашучыларга җиде төп юнәлеш (цифрлы иминлек, мәгълүматны тәнкыйди кабул итү, финанс операцияләре, җайланмалар белән эшләү, контент булдыру, социаль челтәрләрдә рәсмилек, мәгълүмат эзләү, цифрлы куллану һәм онлайн-сервислар) буенча 32 сорауга җавап бирергә кирәк булачак.

Акция ИТ-диктантны үткәрү гражданнарның цифрлы компетенцияләрен үстерү, цифрлы технологияләрнең үтемлелеген арттыру, Россия икътисады һәм социаль өлкәнең алдагы цифрлы трансформациясе өчен шартлар тудыруга юнәлдерелгән «Күрсәткечләр икътисады һәм цифрлы трансформация» илкүләм проекты бурычларына туры килә.

Татарстан башкаласында яңа Укытучылар йорты ачылды

Рәйсә Сәгадиева — Thu, 03 Sep 2026 09:30:22 +0000

Яңалыкка кагылышлы рәсем:

Татарстан

Казан

Казанның Подлужная урамы, 49а йортында яңа Мәгариф хезмәткәрләре йорты ачылды. Ул Россиядә педагоглар һәм мәгариф өлкәсендәге идарәчеләр өчен һөнәри үсеш юлында зур мөмкинлекләр ача торган беренче мәйданчык санала. Кичә биредә «Казан – ул талантлар үстерә торган шәһәр» дигән түгәрәк өстәл үткәрелде. Казан мэры Илсур Метшин педагогика юнәлешендә белем бирүче югары уку йортлары студентлары, яшь белгечләр, мәктәп директорлары, һөнәри бәйгеләрдә җиңү яулаган лауреатлар һәм тармак ветераннары белән очрашты.

«Укытучылар бергәлеге, Мәгариф идарәсе, директорлар корпусы белән бергә Укытучылар йортын ачуыбызга мин бик шат. Без сезнең хезмәтегезнең асылына, бөеклегенә туры килә торган киңлек булдырырга теләдек: аны заманча, затлы, уку, һөнәри аралашу, иҗат һәм ял итү мәйданчыгы итәргә тырыштык», – дип ассызыклады Казан мэры Илсур Метшин.

Шәһәр башлыгы укытучының һәр балага аерым игътибар таләп итә торган үзенчәлекле һөнәр булуын билгеләп үтте. «Без мәктәпләрдә, аннан бераз читтә талантлар үстерү мөмкинлеге булсын өчен көчтән килгәннең барын да эшлибез. Өстәмә белем бирүгә игътибар итәргә тырышабыз. Балалар, яшүсмерләр өчен якында гына яшүсмерләр клубы, төрле секцияләр, музыка һәм сәнгать мәктәпләре эшли, төрле театр түгәрәкләре оештырабыз. Һәм боларның барысы да нәтиҗә бирә. Сезнең тырыш хезмәтегез, талантыгыз ярдәмендә бик күп күрсәткечләр буенча без илнең әйдәп баручылары рәтендә торабыз», – диде шәһәр башлыгы.

Укытучылар йортында эш төп дүрт юнәлеш: Лидерлык үзәге, Укытучылык остаханәсе, R&D үзәге, HR үзәге буенча алып барылачак. Мондый үзәк Россиядә бердәнбер санала.

Лидерлык үзәге ул мәгариф оешмаларын әйдәп баручы җитәкчеләрне үстерү мәйданчыгы булып тора. Үзәк мәгариф учреждениеләре директорларына остазлар ярдәме һәм тупланган тәҗрибәләр аша идарә итү буенча заманча алымнарны үзләштерергә, тотрыклы идарә итү гадәтләрен булдырырга ярдәм итү максатын күздә тотып эшләячәк һәм кадрлар резервын үстерергә ярдәм итәчәк.

Педагогика өлкәсендә тикшеренүләр үзәге Мәгариф идарәсе һәм Казан федераль университетының Педагогика һәм психология институты белән бергә эшләячәк. Аның төп бурычы – заманча белем бирү технологияләрен кертү һәм аларның нәтиҗәлелеген бәяләү, иң яхшы педагогик тәҗрибәләрне туплау, аларны масштаблы модельләргә күчерү; укытучылар әзерләүче университетларны шәһәр мәгариф системасының бүгенге көн бурычларын хәл итүгә җәлеп итү.

Укытучылык остаханәсе педагогика юнәлешен сайлаган студентлар һәм әлеге һөнәрне сайлау алдында торган өлкән сыйныф укучылары өчен укытучылык һөнәрен кызыклы, абруйлы итү мәйданчыгы булачак.

HR үзәккә Казанның укытучылар бергәлеген тотрыклы яңартуны, һөнәрнең абруен күтәрүне һәм шәһәр мәгариф системасының уңай имиджын булдыруны тәэмин итә торган педагогик кадрларын җәлеп итү, аларга ярдәм итүнең һәм үстерүнең заманча системасын булдыру бурычы йөкләнә.

Гомуми мәйданы 950 квадрат метр булган ике катлы төзекләндерелгән яңа Укытучылар йортында 140 урынлык киңәшмәләр залы, төрле юнәлешләр, мәсәлән, стратегик сессияләр, остаханәләр, проект эшләре өчен файдаланып була торган 70 урынлык актлар залы, 19 урынлык киңәшмәләр залы, укытучылар өчен иҗади лабораторияләр, студияләр һәм төрле эш зоналары булдырылган. Яңа бинаны заманча мультимедиа җиһазлары белән тәэмин итүгә аерым игътибар бирелгән. Бина профессиональ интерактив панельләр, LED-экраннар, заманча тавыш, яктылык һәм киңәшмәләр вакытында кулланыла торган видеоэлемтә системалары белән җиһазландырылган.

Яңа киңлек Казанның Яшь педагоглары ассоциациясе өчен төп мәйданчык булачак. Берләшмәнең җитәкчесе Эльвира Мотыйгуллина әйтүенчә, элек укытучылар очрашуларны төрле мәктәпләрдә үткәрергә мәҗбүр булган.

«Без еш кына укытучылар мәктәптә яши, дип шаяртырга яратабыз. Менә хәзер безнең дә үз нигезебез – Укытучылар йорты барлыкка килде. Бу бина безнең өчен диварлары, заманча бүлмәләре белән генә кадерле түгел, аның әһәмияте тагы да тирәндәрәк: ул безнең хезмәтебезгә карата хөрмәт һәм Казан мәгарифенә, аның киләчәгенә ышаныч билгесе. Ниһаять, без яшь хезмәткәрләр өчен төрле эчтәлектәге чаралар оештыра, кызыклы белгечләр чакыра алабыз һәм монда формаль булмаган бергәлек төзү мөмкинлеге дә бар», – диде Эльвира Мотыйгуллина.

Быел Казанның 11 укытучысы Россия күләмендәге һөнәри бәйгеләргә барачак – бу рекордлы күрсәткеч. Катнашучыларның берсе – 78 нче балалар бакчасы тәрбиячесе, «Ел тәрбиячесе – 2026» бәйгесенең республика этабында җиңүче Елена Бербина.

«Шәһәребезнең нәкъ менә тәрбияче һөнәре аша тәкъдим ителүенә мин бик шат. Тәрбияче – ул яшь бала күңеленә тәрбия орлыклары сала торган һөнәр. Игълан ителгән Мәктәпкәчә белем бирү елы – безнең мәктәпкәчә яшьтәге балалар дөньясында зур эш һәм күптән көтелгән вакыйга», – дип билгеләп үтте Елена Бербина.

Моннан тыш, ул аның кысаларында документаль фильм төшерелә торган Россия күләмендәге «Һөнәр осталыгы» проектында катнашкан. Казан тәрбиячесен әлеге фильмда шәһәрдә ике көн төшергәннәр.

«Мин әлегә кадәр хисләр дулкынында, күз алдына китерәсезме, без ике көн дәвамында фильмга төштек. Команда Мәскәүдән иде һәм аларга безнең шәһәр бик нык тәэсир итте. Башкалабыздагы архитектураны, башка истәлекле урыннарны бик ошаттылар. Безне төшергәндә режиссер миннән хәтта берничә тапкыр: «Бу, чыннан да, дәүләт балалар бакчасымы соң?», – дип кабатлап сорады. Күрәсең, ул моны көтмәгән булгандыр. Режиссер Шанхайда яши, ул да соклануын яшерә алмады», – дип фикерләре белән уртаклашты педагог.

Елена Бербина шулай ук мәгариф хезмәткәрләренә ярдәм итүче, һөнәри үсеш буенча төрле мөмкинлекләргә юл ачучы шәһәр җитәкчеләренә рәхмәт белдерде.

Очрашуда яшь белгечләр белән бергә педагогика өлкәсендәге күренекле остазлар да катнашты. Алар арасында Татарстан Республикасының халык укытучысы, Россия Федерациясенең атказанган мөгаллиме Юрий Лазарев та бар иде. Ул Укытучылар йортының Казанның һөнәри инфраструктурасында гаять кирәкле киңлек булуын билгеләп үтте. «Соңгы елларда бәйгеләргә әзерләнгәндә безгә рәхәтләнеп эшли торган мәйданчык җитми иде. Әлбәттә, лицей бик яхшы урын, әмма анда уку эшчәнлеге алып барыла, ул очрашулар өчен бик уңайлы түгел, – дип фикерләре белән уртаклашты Юрий Лазарев. – Әлеге бинаны укытучыларга бүләк итүегез өчен рәхмәт. Бүгенге көндә мәктәптә эшли торган затлар – үз һөнәрләренә меңе белән тугры кешеләр алар. Без эшебезне дәвам итеп, яшьләргә киләчәктә үз юлларын табарга ярдәм итәргә әзер».

Тармак ветераны сүзләренә караганда, яңа үзәк тәҗрибә уртаклашу, бәйге материаллары әзерләү һәм һөнәри бергәлек булдыру өчен бик яхшы база булачак.

Яңа киңлек фәлсәфәсе
Подлужная урамында урнашкан яңа Укытучылар йорты бинасы мәдәни мирас объекты булып тора. Аны торгызу эшләре 2024 елда Казан мэры Илсур Метшин тәкъдиме белән башланган. Моңа кадәр Казанның Мәгариф хезмәткәрләре йорты Бауман урамы, 62/9 адресы буенча урнашкан бинаның икенче катында булган. Аның мәйданы бүгенге көндә заманча таләпләргә туры килми башлаган: соңгы өч елда чаралар саны 5 тапкырга диярлек арткан (елына 30 дан 150 гә кадәр), катнашучылар саны 9 меңгә җиткән.

Укытучылар йорты Казанның тулы бер мәгариф системасы – укытучылар, балалар бакчаларындагы тәрбиячеләр, өстәмә белем бирү педагоглары, белем бирү оешмалары җитәкчеләре һәм педагогика өлкәсендәге хезмәт ветераннары өчен киңлек буларак төзелгән. Киләчәктә биредә театр студияләре, вокал ансамбльләре, шахмат секцияләре, аралашу мәйданчыклары булган төрле клублар эшләтеп җибәрергә ниятлиләр.

«Безнең Укытучылар йорты 1920 елларда ук нигез салынган традицияләргә таяна, ул вакытта Россия буенча мондый учреждениеләр ачыла башлый. Казанда беренче Укытучылар йорты да шул чорда барлыкка килә – башта ул Профсоюз урамында була, аннары Бауман урамына күчә. Озак еллар дәвамында әлеге йортта күбесенчә бәйрәм чаралары алып барылды», – дип сөйләде Укытучылар йортының директоры Альберт Әхмәтов.

Киләчәктә Укытучылар йортында шәһәр күләмендәге методик берләшмәләр, педагогик совет утырышлары, һөнәри аруны профилактикалау буенча психологик тренинглар, Россия дәрәҗәсендәге һөнәри бәйгеләрдә җиңүчеләр катнашында остаханәләр үткәрергә ниятлиләр.

Татарстанда Фәннәр Академиясенең дүрт премиясенә конкурс игълан ителде

Рәйсә Сәгадиева — Wed, 02 Sep 2026 21:01:33 +0000

Яңалыкка кагылышлы рәсем:

Татарстан

Татарстан Фәннәр академиясе галимнәр өчен дүрт исемле премиягә конкурс игълан итте. Гаризалар 17 сентябрьгә кадәр кабул ителә.

Премияләр белемнәрне үстерүгә өлеш керткән һәм оригиналь куелышы һәм тикшеренү бурычларын хәл итүе белән аерылып торган фәнни эшләр өчен бирелә. Конкурс дүрт юнәлештә үткәрелә: биология, социаль һәм тарих фәннәре, ветеринария һәм терлекчелек, педагогика.

Һәр премиянең күләме 500 мең сум тәшкил итә.

Катнашуга бары тик бастырылган фәнни эшләр яисә бердәм тематика буенча эш серияләре генә рөхсәт ителә. Шул ук вакытта аларның авторлык коллективлары өч кешедән артмаска тиеш. Шулай ук соңгы биш елда Дәүләт премияләре, Россия Фәннәр академиясе яисә Татарстан Фәннәр академиясе бүләкләре белән билгеләп үтелгән эшләр дә кабул ителми.