Genamos_US's blog

Gimingaw Kanimo

Genamos_US — Thu, 28 Feb 2019 06:22:28 +0000

Gimingaw Kanimo
By Genamos_US of Washington, D.C., USA

Maanindot na bidlisiw sa sayong kabuntagon
Na malipayong misugat gikan sa akong katulogon
Mihuwaphuwap ang kahayag sa akong mga mata
Aron mangandam kon unsa ang hagit ning adlawa

Sa kaabtik gihuyatid ko kadali ang mga kamot
Kay sugaton ang adlaw sa bag-ong paningkamot
Giubanan ko sa paghanggap sa lab-as na hangin
Ang naghatag og kalagsik sa paglaum gipakapin

Pagkaanindot sa mga lunhawng tanaman ug tingog sa kalanggaman
Daw huni sa kalag naghatag kalinaw nanohotsohot sa kahiladman
Apan sa wala ko matuyo misubay sa akong panumduman
Ang kamingaw kanimo sa kalit miagbay puno sa kahinam

Gihunahuna kon hain ka man karon nagsikaysikay
Kon nagpadulong ka na ba mipauli sa imong balay
Kay dili man magkaparihas ang atong mga oras
Labi na ako ania nga milangyaw diri sa gawas

Gimingaw kanimong dako kon hain man ikaw karon
Ipaagi ko nalang sa pagkanta aron ako lingawon

Didto Sa Baylehan

Genamos_US — Tue, 12 Feb 2019 01:05:01 +0000

Didto Sa Baylehan
By Genamos_US of Washington, D.C., USA

Nasalaag ako sa dakong sayaw
Naglam-om wala ka pa makalakaw
Nangita sa dakong kahigayonan
Maisayaw ka sa ibabaw ning kalibutan

Apan adunay pa ako'y laing tuyo
Ning dughan ko naglibog sa kadako
Gipangita ko ikaw ning kagabhion
Aron ipabati ning dughan maulawon

Apan napakyas ang akong mga mata
Wala ko ikaw igkita kon asa man ka
Nasagmoyo uban ang bulak kung gidala
Napalaw sa akong tinguha na wala ka

Kaanindot unta kon ikaw akong naistorya
Aron matubag nimo ang akong mga pangutana
Ipabati ko unta ang gugma kung ihalad
Nanghinaot imong dawaton akong ipanaad

KANUS-A ?

Genamos_US — Sat, 19 Jan 2019 08:48:48 +0000

KANUS-A ?
By Genamos_US of Washington, D.C., USA

Nagpanghupaw naghunahuna dinha kanimo
Nangandoy magkakita ta sama sa kaniadto
Mausab pa kaha kadtong bililhon na mga gutlo ?
Mahinamon nagpaabot kanimo sa imong pagbutho

Kanus-a pa kaha kita magkakita pag-usab ?
Sa imong paglakaw dughan ko daw gidunggab
Mao na ba kaha to ang katapusan o ang sinugdanan ?
Ning gugma kung giandam kanimo ihalad ko ang tanan

Hangtod kanus-a ako magluhat dinha kanimo ?
Itugyan ko na lang ba ngadto sa kamot sa Ginoo ?
Nangindahay kanimo sa imong tam-is mong tubag
Basin ang kasingkasing ko sa kadali mohubag

Kung ang atong duha ka mga pagbati usa ra ba ?
Kay naglibog ko kon ako ra ba ang nahigugma
Kon magpabilin ba tang duha na managhigala
O kaha pilion ta ang paghigugma sa usag-usa

Hangtod kanus-a ko ikaw makita pag-usab ?
Kay ang kasingkasing ko kanimo daw nagdilaab
Nahadlok ko na basin masunog ko sa akong pagbati
Na nabilanggo sa gugma nga dugay ko kanimo ipabati

AKONG HAMILI

Genamos_US — Sat, 19 Jan 2019 08:43:15 +0000

AKONG HAMILI
By Genamos_US of Washington, D.C., USA

O bililhon kung gugma na gipanday gikan sa atong Ginoo
Kanimo Inday, ang kalibutan nagatuyok dinha lang kanimo
Gitudloan mo ang akong kalibutan kon unsaon sa pagpakabuhi
Na ikaw lang ang matood nagmahal kanako sa langit ako gipili

Sa matag kalipay ug kasakit anaa ka sa akong mga kiliran
Ning dughan ko mapasalamaton kanimo sa gugmang hilabihan
Gibalikbalik ko sa paglitok ang mga pulong sa gugma aron ikaw motoo
Kon usahay masobrahan man gani O akong Pinangga mangayo ako'g pasaylo

O Ginoo sa langit, salamat sa grasyang imong gipaambit
Sa gugma mo ang kinabuhi ko napuno sa kadasig sa kalit
Imong gipadala kanako ang nag-inusarang kalipay na dili mapalit
Kaniya, siya ang akong bahandi sa akong kinabuhi gipadala sa langit

Pinili, saligi kining atong gugma na walay pagkapalong
Sa matag adlawng molabay walay pagsulay ang mopasilong
Pagasaw-an ta ang dakong himaya sa kalipay na walay paglubad

Pagkadugay Sa Kagabhion Na Wala Ka

Genamos_US — Sun, 13 Jan 2019 22:04:50 +0000

Pagkadugay Sa kagabhion Na Wala Ka
By Genamos_US of Washington, D.C., USA

Gianinaw ko ang kahilom sa kagabhion
Nga nagpaabot sa akong katulogon
Ang kalinaw sa palibot daw miduyog
Inubanan sa kabugnaw ug huni mitabyog

Ang mga takna milabay daw adunay gipaabot
Ang buwan ug bitoon sa langit may gipasabot
Nagpadayon nagtukaw ang radyo puno sa sonata
Mga liriko sa mga kanta kabahin kini sa gugma

Apan misulod sa akong hunahuna ang imong imahe
Daw wala ko tuyoa nagdala sa dakong mensahe
Ang ngalan mo nagdala kanako ug dakong kadasig
Matag adlaw ang dughan ko kanimo da namarayeg

Gilantaw ko pagbalik ang buwan ug mga bitoon
Aron subayon ang mga matam-is na mga sugilanon
Gibalik ko ang yugto sa atong unang panagtagbo
Sa dugayng panahon ikaw gipangita ako nagsubo

Gipangandoy na makita ko ikaw bisan sa damgo lang
Kalipay ko kon mahitabo bisan sa daklit man lang
Apan ang kapalaran miduyog sa akong mga pangamoyo
Trenta'y uno ka tuig milabay sa kadugay daw gituyo

Ang Paskohanong Pangandoy

Genamos_US — Mon, 05 Dec 2016 16:52:25 +0000

Ang Paskohanong Pangandoy
By Genamos_US of Washington DC, USA

Nitikang nasab ang mga adlaw
Padulong sa Paskohanong laraw
Ang kasadya sa matag palibot
Kay Pasko nga gayud masabot

Mga Paskohanong talan-awon
Inubanan sa awit na masanagon
Nagkalandrakas ang kolor sa siris
Ang kaanindot nila nga walay lalis

Ang mga parol nga gipangsab-ay
Sa matag bintana sa mga panimalay
Pun-an sa plastik na krismas tri
Na ang mga suga murag nagabayli

Ang mga tawo sa kadalanan nagasubwak
Mga pahiyom tam-is daw maanindot na bulak
Nagduotduot sa mga dagkong tindahan
Namili sa pangregalo para sa ilang tagaan

Kaanindot ang tanan nangandam sa Pasko
Puwera lang sa mga dili Kristiyano
Kay usab sila miduyog kanato ug mirespeto
Nagkahiusa bisag dili parehog pagtoo

KAMINGAW SA KAHAPONON

Genamos_US — Fri, 28 Oct 2016 17:37:22 +0000

KAMINGAW SA KAHAPONON
By Genamos_US of Washington DC, USA

Malandong nga kahaponon puno sa kalaay
Gikapoy naghigda sa kawayan kung lantay
Ang bugnawng hinuyohoy sa bintana milabay
Samtang ang kamingaw sa palibot misakay

Wala ko masabti ang kamingaw nagpasulabi
Gihungit sa hunahuna ang kakapoy nagbayli
Mga mata gipiyong giganoy sa katulogon
Apan gihawiran sa di ko masabtan na emosyon

Gihiling ko sa kaugalingon ang hinungdan
Kon kining kabalisa angay ko lang pasagdan
Matugkad ko man ang hinungdan dili igsapayan
Kay bunga lang kini sa nag-inusarang dughan

Inanay kung giwala sa akong panumduman
Aron mabatunan ko ang kalinaw ning dughan
Hinginlan ko man kining kabalaka nagduladula
Nagpadayon nagpasulabi sa naglibog kung hunahuna

Mga pag-ampo ug pangaliya sa akong tinahod kung Ginikanan

Genamos_US — Wed, 29 Jun 2016 18:59:37 +0000

Mga pag-ampo ug pangaliya sa akong tinahod kung Ginikanan
(Mama Lilia & Papa Maning sa Dumlog-Talisay City)
(Sa ikalim-an nga tuig anibersaryo sa ilang kaminyoon)
By Genamos_US of Washington, D.C, USA

Matawag nga talagsaon ug halandumon karon adlawa
Nga gisaulog ang kasumaran sa kasal ninyong duha
Ikalim-an nga tuig ang milabay nahimogso ang unang panaad
Sa duha ka kasingkasing nagminahalay ug sa langit inyong gihalad

Dili sulagma nga kamong duha gayud ang magkadayon
Kay ang Dios ang nagdala kaninyo sa salag sa kaminyoon
Dili malikayan ang mga pagduhaduha sa kaugalingon
Kon mulahotay ba ang gugma matag lipang sa panahon

Dili molambo ang gugma kon sa pagbati dili makahiusa
Dili molambo ang gugma kon wala ang Dios ang moamoma
Dili molambo ang gugma kon dili mopaubsanon sa usag-usa
Ug dili molambo ang gugma kon walay kitay pasensisya

Hain kana O Gugma?

Genamos_US — Fri, 12 Feb 2016 21:27:38 +0000

Hain kana O Gugma?
By Genamos_US of Washington DC, USA

O hain ka man nga gitawag na gugma?
Gipangita sa matag suok nga way sama
Daghan nang milabay nga mga katuigan
Malisod ikaw nga akong mahikaplagan

Sama sa maidlas nga bangaw sa langit
Kadali rang mahanaw ug way panamilit
Ang gugma kuno susama sa usa ka bulawan
Magpabilin masiga ang silaw sa katuigan

Apan matud sa uban ang gugma kuno tam-is
Kon masagol sa tim-os mong gibati iparis
Walay makapugong kon usa ang mohawid
Magpabilin lunsay kon unsay bati ipahid

Apan ngano man ang uban wala man makakita?
Sa gugmang gilauman sa katuigan nadismaya
Mga pagsulay ug hagit daghan ang nalambigit
Pun-an pa sa mga kasilag, hilak ug kasakit

SINULOG

Genamos_US — Sun, 10 Jan 2016 10:49:29 +0000

SINULOG
By Genamos_US of Washington DC, USA

Ang sayaw inubanan sa pag-ampo
Lakang atras abante gamay ug dako
Sa kamot ang kandila iwara-wara
Gilitok ang mga pag-ampo gitagana

Ang uban nagpiyong sa ilang mga mata
Gihalad sa Dios ang ilang mga problema
Ang uban naghilak naghangad sa langit
Na unta makuhaan ang ilang mga hagit

Gipangayo ang kalagsik sa panglawas
Mahilayo sa mga kakulian ug dimalas
Mga panata ug saad sa hilom ilang gilitok
Aron ang ilang mga kinabuhi dili samok

Adunay mga pag-ampo agig pagpasalamat
Sa grasya ug kaayohan sa kinabuhi nadawat
Kasadya ug kalipay ang tanan nag-ambahan
Nagsaulog ang Sugbo sa dakong kapistahan