چاونیوز: کوشتنی هاووڵاتییانی کوردستان، بە ئاشکرا و بە نهێنی لەلایەن هێزە حکوومەتییەکانەوە، بە شێوەیەکی بەرچاو پەرەی سەندووە.

بەپێی هەواڵەکان، ڕۆژی دووشەممە، ١٦ی خەرمانان، شەماڵ فەخرولعولەمایی، وەرزشکاری ناسراو و خۆشەویستی خەڵکی سنە، لە سنووری مەریوان، بەبێ ئاگادارکردنەوە و بە تەقەی ڕاستەوخۆ، لەلایەن هێزەکانی حکوومەتی ئێران لە سەر سنوور گیانی لە دەست دا.

پاش کوشتنی ئەم وەرزشکارە سنەیی، کە بەبێ هیچ پاساوێکی یاسایی و سەرەڕۆیانە ئەنجام دراوە، هێزە ئەمنییەتییەکان گوشاریان خستووەتە سەر بنەماڵەکەی کە پێش بە بڵاوبوونەوەی هەواڵەکەی لە ڕاگەیاندنەکان و تۆڕە کۆمەڵایەتییەکان بگرن.

هەر لەم پێوەندییەدا، هاووڵاتییەکی دیکەی خەڵکی مەهاباد، بە ناوی “ئەنوەر کەیخوسرەوی” خەڵکی مەهاباد، کە لە ڕێکەوتی ٦ی خەرمانانەوە بێسەروشوێن کراوە، تەرمەکەی لە ڕۆژی یەکشەممە، ١٥ی خەرمانان، لە پشت ماڵەکەی خۆی لە گەڕەکی فەجر دۆزراوەتەوە.

بەپێی وتەی شایەتحاڵان، ئەم هاووڵاتییە لەلایەن هێزە ئەمنییەتییەکانەوە لەژێر گوشاردا بووە و پێیان ڕاگەیاندووە کە لە ئیتلاعاتی ورمێ ناوی لە ڕیزی ئەو کەسانەی کە دەسبەسەر دەکرێن.

دوای دۆزینەوەی تەرمی ناوبراو پاش دە ڕۆژ لە ونبوونی، پزیشکی یاسایی ڕایگەیاندووە کە ئاسەواری لێدان و ئەشکەنجە لە سەر جەستەی ئەم کەسە دیار نییە و ئیدارەی ئاگاییش ڕایگەیاندووە کە ئەم کەسە بە هۆی خەمۆکییەوە لە سەر سەربانی ماڵەکەی، خۆی بەر داوەتەوە.

شایانی باسە، “خانە کەیخوسرەوی” باوکی ئەنوەر کەیخوسرەوی، کە چەند ساڵێک پێشمەرگەی حیزبی دێموکرات بووە، لەلایەن هێزەکانی سپای پاسدارانەوە لە ماڵەکەی خۆی تیرۆر کراوە.

چاونیوز: هونەرمەندێکی کورد لەلایەن هێزەکانی ئیتلاعاتی شاری مەریوان، بە شێوەی زۆرەملێ دەسبەسەر و بۆ شوێنێکی نادیار ڕاگوزاراوە.

بەپێی هەواڵە بڵاوکراوەکان، ڕێکەوتی ١٦ی خەرمانان، هونەرمەند خەبات فیدایی، خەڵکی گوندی بۆڕیەر و دانیشتووی شاری مەریوان، لەلایەن هێزەکانی ئیتلاعاتی ئەو شارەوە، بە زۆرەملێ و توندوتیژی دەسبەسەر کراوە و بەرەو شوێنێکی نادیار ڕاگوازراوە،

ئەم هونەرمەندە کوردە پێشتریش لە ساڵی ١٤٠١، کاتێکی کە ماڵیان لە شاری تاران بوو، بە تۆمەتی ئەندامەتی و هاوکاریی لەگەڵ حیزبە کوردییەکاندا دەسبەسەر کراوە.

هەتا کاتی بڵاوبوونەوەی ئەم هەواڵە، لەسەر هۆکاری دەسبەسەرکردن، شوێنی ڕاگرتن و باری تەندروستیی هیچ زانیارییەک لە بەردەستدا نییە.

چاونیوز: لە چەند مانگی ڕابردوودا، ناوەندە قەزایییەکانی کۆماری ئیسلامی، حوکمی قورسیان بۆ چەند هاووڵاتییەکی کوردستان دەرکردووە.

بەپێی هەواڵە بڵاوکراوەکان، دادگای ئینقلابی شاری قەسر شیرین، سەربە بە پارێزگای کرماشان، سەرجەم حوکمی  ١٠ ساڵ زیندانی بۆ دوو هاووڵاتیی خەڵکی ئەم شارە بە ناوەکانی “ئەبولفەزل ڕۆستەمی و عیرفان مورادی” درەکردووە.

ئەم دوو هاووڵاتییە کە لە ڕۆژی پێنجشەممە، ٧ی جۆزەردان، بە بیانووی بەشداریی لە خۆپیشاندانەکانی سەرماوەزی ١٤٠٤ دەسبەسەر کران، بە تۆمەتی “کۆبوونەوە و کاری ڕێکخستن بە مەبەستی شێواندنی ئاسایشی نێوخۆیی و دەرەکی” مەحکووم کراون.

هەر لەم پێوەندییەدا، هاووڵاتییەکی دیکەی خەڵکی ورمێ، بە ناوی “سامان قادری”، لە دەسبەسەرکراوانی خۆپیشاندانەکانی سەرماوەز، لەلایەن لقی ٢٦ی دادگای ئینقلابی تاران، بە تۆمەتی “کردەوە بەدژی ئاسایشی نیشتمانی” بە ١١ ساڵ و “بێڕێزی بە پیرۆزییەکان” بە ٣ ساڵ زیندان مەحکووم کراوە، کە سەرجەم ١٤ ساڵ زیندانی بۆ بڕاوەتەوە.

چاونیوز: لە درێژەی دەسبەسەرکردنە ناڕەواکان و گوشار بۆ سەر هاووڵاتییانی کوردستان، ژنێکی مەهابادی لەلایەن هێزەکانی ئیتلاعاتەوە دەسبەسەر کراوە.

بەپێی هەواڵی گەیشتوو بە چاونیوز، ڕۆژی یەکشەممە، ١٥ی خەرمانان، سوهەیلا عەلیزادە، تەمەن ٣٠ ساڵ، کچی عومەر و خەڵکی مەهاباد، لەلایەن هێزەکانی سەربە ئیتلاعاتەوە دەسبەسەر و بۆ گرتنگەیەکی شاری ورمێ ڕاگوازراوەتەوە.

هەتا کاتی بڵاوبوونەوەی ئەم هەواڵە، لەسەر هۆکاری دەسبەسەرکردن، شوێنی ڕاگرتن و باری تەندروستیی ئەم کەسە  هیچ زانیارییەک لە بەردەستدا نییە.

چاونیوز: ژن و مێردێکی سنەیی، لەلایەن هێزە ئەمنییەتییەکانی کۆماری ئیسلامییەوە، بە زۆرەملێ و ناڕەوا دەسبەسەر کران و بۆ شوێنێکی نادیار گوازراونەتەوە.

بەپێی هەواڵە بڵاوکراوەکان، ڕۆژی یەکشەممە، ١٥ی خەرمانان، هاووڵاتییەکی سنەیی بە ناوی فەریدوون نامداری، ٥٥ ساڵە، لە شوێنی کارەکەی بەبێ هیچ بەڵگە و حوکمێکی قەزایی لەلایەن هێزەکانی سەربە ئیتلاعاتی سنە دەسبەسەر کراوە.

هەر لەو ڕۆژە پاش دەسبەسەرکردنی ئەم هاووڵاتییە، هێزەکانی سەر بە ئیتلاعاتی سنە، هەڵیانکوتاوەتە سەر ماڵی ئەم کەسە و هاوژینەکەی بە ناوی “شوعلە ڕۆحی”شیان دەسبەسەر کردووە و بەرەو شوێنێکی نادیاریان ڕایانگواستووە.

بەپێی وتەی شایەتحاڵان، سەرەڕای بەدواداچوونی بنەماڵەی ئەم هاوژینە سنەیییە، هەتا ئێستە هیچ زانیارییەکی باوەڕپێکراویان پێ نەدراوە.

چاونیوز: شەپۆلی دەسبەسەرکردنی نایاساییی لاوانی کورد لەلایەن هێزە ئەمنییەتییەکانی کۆماری ئیسلامییەوە نیگەرانیی کۆمەڵگەی کوردستانی لێ کەوتووەتەوە.

بەپێی هەواڵە بڵاوکراوەکان، ڕۆژی چوارشەممە، ١١ی خەرمانان، “محەممەد ئیبراهیم‌نیا”، ناسراو بە “موحسێن گورگە”، خەڵکی شاری شنۆ، بەبێ هیچ بەڵگەیەکی یاسایی، لەلایەن هێزە ئەمنییەتییەکانەوە دەسبەسەر و بەرەو شوێنێکی نادیار گوازراوەتەوە.

هەر لەم پێوەندییەدا، “محەممەد حەمزەزادە”، خەڵکی مەهاباد، ١٠ ڕۆژ پێش، لەلایەن هێزە ئەمنییەتییەکانەوە دەسبەسەر کراوە و بۆ شوێنێکی نادیار گوازراوەتەوە و هەتا ئێستە بنەماڵەکەی هیچ زانیارییەکیان لەسەر باری تەندروستی و شوێنی ڕاگرتن لە بەردەستدا نییە.

دەسبەسەرکردن نایاساییی لاوانی کورد کە ڕووی لە زیادبوون کردووە، کەشێکی نائەمن و تۆقێنەری بۆ لاوان و بنەماڵەکانی کوردستان دروست کردووە و ئەم دیاردە نایاسایییە نیگەرانی بۆ ناوەندەکانی مافی مرۆڤی کوردستان بەدی هێناوە.

چاونیوز: ژنێکی کورد پاش ئەوەی گوندەکەیان لەلایەن هێزە ئەمنییەتییەکانەوە میلیتاریزە کرا، دەسبەسەر و بۆ شوێنێکی نادیار ڕاگوازرا.

بەپێی هەواڵی گەیشتوو بە چاونیوز، ڕۆژی سێشەممە، ١٠ی خەرمانان، “ناهید کەسنەزانی”، تەمەن ٣٢ ساڵ، خەڵکی گوندی “کەسنەزان”، لە ناوچەی “سەرشیو”ی سەقز، لەلایەن هێزە ئەمنییەتییەکانی کۆماری ئیسلامییەوە، بەبێ هیچ بەڵگەیەکی قەزایی، پاش ئەوەی کە گوندی کەسنەزان بەتەواوەتی میلیتاریزە دەکرێ، دەسبەسەر و بۆ شوێنێکی نادیار دەگوازرێتەوە.

بەپێی وتەی شایەتحاڵان، هێزە ئەمنییەتییەکان بە توندترین شێوەی بەرەڕووی خەڵکی کەسنەزان بوونەتەوە و ڕێگایان نەداوە هیچ کەس لە ماڵەکەی خۆی بێتە دەرەوە و گوشاریان بۆ بنەماڵەی ناوبراو هێناوە کە مۆبایل و کەرەستە کەسییەکانی ناهید کەسنەزانی ڕادەست بکرێت.

هەتا کاتی بڵاوبوونەوەی ئەم هەواڵە، لەسەر هۆکاری دەسبەسەرکردن، شوێنی ڕاگرتن و باری تەندروستیی ئەم هاووڵاتییە هیچ زانیارییەک لە بەردەستدا نییە.

چاونیوز: دادگای میاندواو بۆ ئازادیی چالاکێکی ڕاگەیاندنکاری کورد مەرجی دانانی بارمتەی قورسی داناوە.

بەپێی هەواڵە بڵاوکراوەکان، عابد عەلیزادە، خەڵکی تیکاب و چالاکی بواری ڕاگەیاندن، پاش ١٤ ڕۆژ دەسبەسەرکردن و ڕاگرتنی لە گرتنگەی ئیتلاعاتی شاری ورمێ بەرەو بەندیخانەی ناوەندیی شاری میاندواو گوازراوەتەوە.

ئەم چالاکە ڕاگەیاندنکارە کە بەبێ هیچ بەڵگەیەکی یاسایی و بە شێوەی زۆرەملێ لەلایەن ئیتلاعاتی سپای پاسدارانی ورمێیەوە دەسبەسەر کرابوو، سەرەڕای ئەوەی کە لە ماوەی دەسبەسەرکردنی لە هەبوونی مافی پارێزەر بێبەش بوو، بۆ ئازادبوونی، لەلایەن دادگای میاندواوەوە مەرجی دانانی بارمتەی ٤ میلیارد تمەنی دانراوە.

چاونیوز: لە درێژەی دەسبەسەرکردنە ناڕەوا و نایاسایییەکانی هاووڵاتییانی کوردستان، دوو کەس بەبێ ڕوونکردنەوە و حوکمی قەزایی دەسبەسەر کران.

بەپێی هەواڵی گەیشتوو بە چاونیوز، ڕۆژی سێشەممە، ١٠ی خەرمانان، “ئەرکان ئەحمەدی”، کوڕی باقی، خەڵکی “هەنگەژاڵە” و دانیشتووی شاری مەریوان، لەلایەن هێزە ئەمنییەتییەکانی کۆماری ئیسلامییەوە دەسبەسەر و بۆ شوێنێکی نادیار ڕاگوازراوەتەوە.

شایانی باسە، هێزەکانی کۆماری ئیسلامی بەبێ هیچ بەڵگەیەکی قەزایی هەڵیانکوتاوەتە سەر ماڵی ئەم کەسە کە خاوەن سێ منداڵە و بە زۆرەملێ و ترساندنی خێزان و منداڵەکانی دەسبەسەریان کردووە.

 هەر لەم پێوەندییەدا، ماوەی ١٨ ڕۆژ پێش، هاووڵاتییەکی دیکەی خەڵکی مەهاباد، بە ناوی “هێمن مێهران‌نیا”، تەمەن ٢٠ ساڵ، لە شاری ورمێ، لەلایەن مەئموورەکانی ئاگاهیی ئەو شارە دەسبەسەر کراوە و هەتا ئێستە بێسەروشوێنە.

هەتا کاتی بڵاوبوونەوەی ئەم هەواڵە، لەسەر هۆکاری دەسبەسەرکردن، شوێنی ڕاگرتن و باری تەندروستیی ئەم هاووڵاتییانە هیچ زانیارییەک لە بەردەستدا نییە.

چاونیوز: دەسبەسەرکردنی سەرەڕۆیانەی چالاکانی مەدەنی و سیاسی لە کوردستان بە شێوەیەکی بەربڵاو ڕووی لە زیادبوون کردووە.

بەپێی هەواڵە بڵاوکراوەکان، ڕۆژی پێنجشەممە، ٢٩ی گەلاوێژی ١٤٠٥، هادی ڕبووسە، خەڵکی مەریوان، چالاکی مەدەنی و ژینگەپارێز، بەبێ حوکمی قەزایی، لەلایەن هێزەکانی سەربە سپای پاسداران دەسبەسەر و بۆ شوێنێکی نادیار گوازراوەتەوە.

هەر لەم پێوەندییەدا، لە ڕۆژانی ڕابردوو، عیرفان هاشمی، لاوی خەڵکی دەڕەشاری ئیلام، پاش میلاد عەلایی‌نەسەب، دەسبەسەر و بۆ شوێنێکی نادیار ڕاگوازراوە.

هەتا کاتی بڵاوبوونەوەی ئەم هەواڵە لەسەر هۆکاری سەرەکی، شوێنی ڕاگرتن و باری تەندروستیی ئەم هاووڵاتییانە هیچ زانیارییەک لە بەردەستدا نییە.

چاونیوز: چالاکانی مەدەنی و کرێکاری لە ڕۆژهەڵاتی کوردستان بەرەڕووی حوکمی نایاسایی و ناڕەوای ناوەندە قەزایییەکانی کۆماری ئیسلامی دەبنەوە.

بەپێی هەواڵە بڵاوکراوەکان، لە ڕۆژانی ڕابردوو، ڕەزا دهقانی، خەڵکی دزەجی قوروە، لەلایەن لقی ١٠٣ی دادگای قوروە و قازی هادی خانییەوە، لە پێوەندی لەگەڵ ناڕەزایەتییەکانی سەرماوەزی ١٤٠٤، بە ساڵیک زیندان و ٤١ قامچی مەحکووم کراوە.

هەروەها چالاکێکی کرێکاری و سیاسی، بە ناوی ئیبراهیم ڕەحمانپوور، خەڵکی نەغەدە، لەلایەن ناوەندە قەزایییەکانی کۆماری ئیسلامییەوە بە بیانووی چالاکی سیاسی و کرێکارییەوە بە ٣٨ مانگ زیندان مەحکووم کراوە.

دەسبەسەرکردن و دەرکردنی حوکمی ناڕەوا و نایاسایی بۆ چالاکانی سیاسی، مەدەنی، ژنان و کرێکاران لەلایەن ناوەندە ئەمنییەتی و قەزایییەکانی کۆماری ئیسلامی لە ڕۆژهەڵاتی کوردستان وەکوو هەمیشە بەردەوامە و ڕووی لە زیادبوون کردووە و ئەمە نیگەرانیی ناوەندەکانی مافی مرۆڤی کوردستانی لێ کەوتووەتەوە.

چاونیوز: هێزە ئەمنییەتییەکانی کۆماری ئیسلامی، بە بیانووی بێبنەما چەندین هاووڵاتیی کوردستانیان دەسبەسەر کرد.

بەپێی هەواڵی گەیشتوو بە چاونیوز، کاتژمێری ٧ی سەرلەبەیانیی ڕۆژی شەممە، ٧ی خەرمانان، هێزە ئەمنییەتییەکان، هەڵیانکوتاوەتە سەر ماڵی چەندین هاووڵاتیی خەڵکی سەردۆش بە ناوەکانی “ئازاد نەوزەری، زانیار توانا، پوویا کاکەمحەممەدی،زانیار قادری و شێرزاد عەبدیـ”ـیان بە بیانووی کاسبیکردن لەسەر سنوور و بەزاندنی سنوور دەسبەسەر کردووە و ڕەوانەی بەندیخانەی مەریوان کراون.

بەپێی وتەی شایەتحاڵان، ئەم هاووڵاتییانە جگە لە کار و کاسبیی لە سەر سنوور هیچ کارێکی دیکەیان نەکردووە کە جێگەی گومان و لێپێچینەوە بێت.

هەتا کاتی بڵاوبوونەوەی ئەم هەواڵە هیچ زانیارییەک لەسەر بارودۆخی ئەم هاووڵاتییانە لە بەردەستدا نییە.