Me këndim të tekbireve dhe salvateve, sot, në natën e bekuar të muajit Ramazan, në fshatin Nedakoc të Vushtrrisë, në mënyrë solemne u përurua xhamia e re.
E veçanta e kësaj xhamie është se e tëra është ndërtuar falë bamirësisë së familjes Pushkolli.
Në hapjen e kësaj xhamie, përveç besimtarëve të shumtë, morën pjesë edhe kryeimami i Bashkësisë Islame të Kosovës, Vedat ef. Sahiti, kryetari i Vushtrrisë, z. Ferit Idrizi, udhëheqësit e Këshillit të BI-së së Vushtrrisë, si dhe biznesmenë të shumtë nga qyteti i Vushtrrisë.
Kryeimami i Bashkësisë Islame të Kosovës, Vedat ef.Sahiti, në emër të Myftiut Naim ef.Tërnava dhe në emër të Kryesisë së Bashkësisë Islame të Kosovës, uroi dhe përgëzoi banorët e fshatit Nedakoc për hapjen e kësaj xhamie në prag të fillimit të muajit Ramazan. Ai tha se sot, përveç hapjes së kësaj xhamie, edhe në fshatin Zakut të Podujevës, po përurohet një xhami, e cila ka të njëjtën karakteristikë, atë të ndërtimit nga një familje e vetme, andaj më lejoni që të falënderoj familjen Pushkolli për ndërtimin e xhamisë, duke lutur Zotin që t’i shpërblejë me Xhenet.
Në fjalën e tij përshëndetëse, kryetari i Këshillit të BI-së së Vushtrrisë, Ejup ef. Haziri, shprehu falënderimet e tij dhe të Këshillit të BI-së së Vushtrrisë për familjen Pushkolli për ndërtimin e kësaj xhamie, duke lutur Zotin e Madhëruar që t’i shpërblejë me të mirat e Tij në këtë dhe botën tjetër. Ai me këtë rast falënderoi edhe bizneset e tjera të Vushtrrisë për kontributin e tyre të vazhdueshëm dhënë për institucionin e Bashkësisë Islame të Kosovës.
Ndërkaq kryetari i Vushtrrisë, z. Ferit Idrizi, në emër të institucionit që ai drejton, uroi banorët e Nedakocit për hapjen e kësaj xhamie, duke çmuar kështu rolin dhe kontributin e Bashkësisë Islame të Kosovës dhënë për vendin në të gjitha proceset që ka kaluar.
Në emër të familjes Pushkolli, një fjalë përshëndetëse e mbajti Ridvan Pushkolli, i cili falënderoi Zotin e Madhëruar për mundësinë që iu ka dhënë për ndërtimin e kësaj xhamie.
Hytben e xhumasë, me mesazhet uruese për ardhjen e muajit Ramazan e mbajti kryeimami i Kosovës, Vedat ef. Sahiti.
Të dashur qytetarë!
Sonte, me faljen e namazit të teravive, e me ngrënien e syfyrit në agimin e nesërm, besimtarët myslimanë nisin ibadetin e agjërimit të muajit të bekuar Ramazan. Andaj sonte, kemi natën e madhe të Ramazani, ku me këtë rast, kam kënaqësinë e veçantë që në emër të Bashkësisë Islame të Kosovës, institucioneve të saj dhe në emrin tim personal t’ju drejtohem me përgëzimet dhe urimet më të mira, me bindjen dhe shpresën që ta presim dhe ta përjetojmë agjërimin e muajit të bekuar me përkushtim në lutje, ibadete, bamirësi dhe solidaritet.
Është e natyrshme që njeriu t’i përjetoj dhe t’i shijoj mirësitë dhe begatitë e shumta të dhuruara prej Zotit xh.sh., e një ndër to është edhe agjërimi i muajit Ramazan. E si të mos e mirëpret besimtari ardhjen e muajit të bekuar, që është një nga pesë shtyllat e Islamit, dhe që konsiderohet një mundësi e madhe për t’iu afruar edhe më shumë begative të Zotit. Në këtë mënyrë, zemra e myslimanit është e përgatitur për të hyrë në atmosferën e adhurimit, për ta pastruar shpirtin përmes agjërimit, namazit, sakrificës dhe dhembshurisë për të varfrit dhe nevojtarët, për ta arritur kështu devotshmërinë dhe për të reflektuar mbi mësimet e fesë.
Besimtarët myslimanë, me të drejtë e përjetojnë me përkushtim ardhjen e muajit të mirësisë, devotshmërisë, sakrificës dhe faljes së mëkateve, muaj i cili na sjellë mirësi, gëzim, bereqet, begati, mëshirë, lumturi, shëndet dhe paqe, si te fëmijët, te të rinjtë, te nipi e mbesa, te gjyshi e gjyshja, te babai dhe te nëna, muaj i cili përshkon dhe ndriçon fytyrat dhe shpirtrat e të gjithë besimtarëve, andaj porositemi që ta shtojmë adhurimin dhe veprat e mira.
Kanë mbetur edhe pak orë e të shfaqet në mbarë botën gjysmëhëna e muajit të bekuar Ramazan, muaj të cilin e dëshirojnë zemrat dhe shpirtrat e besimtarëve, muaj që me mall e presim ardhjen e tij për t’iu bashkuar në mëshirë dhe falje, muaj që i begaton edhe më shumë sofrat tona, andaj për besimtarët është një dëshirë e madhe dhe një bekim madhështor që t’i shfrytëzojmë të mirat e veçanta që sjellë ky muaj.
Të respektuar vëllezër dhe motra,
Besimtarët e mirëpresin muajin Ramazan për ta rikthyer pastërtinë e zemrave, shkëlqimin e shpirtrave dhe kthjelltësinë e ndërgjegjes. Zoti i Plotfuqishëm na ka bekuar me një muaj kaq ë madh, pra ka ardhur koha e agjërimit të këtij muaji, i cili sjellë vetëm ndërgjegjësim, devotshmëri, dhe sakrificë, e këto burojnë nga thellësia dhe pastërtia e besimit në Zotin Një dhe të Vetëm.
Zoti i Madhëruar thotë: “Muaji Ramazan, është ai (muaj) në të cilin u zbrit Kurani…”
Muaj që Zoti e ka veçuar me shumë virtyte dhe mirësi të mëdha, me cilësi të larta morale, e të cilat e shtyjnë besimtarin të bëjë vepra të mira dhe të largohet nga veprat e liga. Është muaj në të cilin zbret mëshira e pafund e Zotit të Madhërishëm, falen mëkatet dhe veprat e këqija, hapen dyert e Xhenetit dhe mbyllen dyer e Xhehenemit. Si mund të mos i gëzohemi këtij muaji, kur brenda tij e kemi Natën e Kadrit, në të cilën natë Zoti zbriti Kuranin.
Zoti xh.sh. thotë: “Ne e zbritëm atë (Kuranin) në Natën e Kadrit.”
Me rastin e fillimit të këtij muaji të bekuar, këshilloj vëllezërit dhe motrat e mi kudo që janë që të kenë frikë nga Zoti i Madhëruar, të garojnë në vepra të mira, të urdhërojnë njëri-tjetrin për të bërë mirë, të jenë të durueshëm ta ruajnë unitetin e të mos përçahen, të bashkëpunojnë në mirësi, urtësi dhe devotshmëri, si dhe të ruhen nga të gjitha ato mëkate që Zoti i ka ndaluar. Kjo ngase Ramazani është një muaj madhështor, muaj në të cilin shumëfishohen veprat e mira dhe falen mëkatet për ata që agjërojnë dhe falin namazin me besim dhe devotshmëri, duke kërkuar kështu shpërblimin për punët e tyre.
Vëllezër dhe motra!
Agjërimi ka shumë dobi dhe urtësi. Duke e bërë agjërimin në formën më të mirë, besimtari e fisnikëron moralin, durimin, bujarinë dhe përpjekjet në atë që e kënaq Zotin.
Muaji Ramazan është një mundësi që vjen vetëm një herë në vit, andaj ta shfrytëzojmë këtë mundësi dhe të përfitojmë prej tij, sikur të jetë Ramazani i fundit që do ta përjetojmë.
Urime, shëndet dhe mbarësi për të gjithë besimtarët kudo që janë!
Agjërim të lehtë dhe të pranuar te Zoti!
Me fat muaji i bekuar Ramazan!
Myftiu Naim ef. Tërnava
Prishtinë, më 28 shkurt 2025 ]]>
Nën organizimin e Fakultetit të Studimeve Islame në Prishtinë, sot u mbajt takimin me studentët e diplomuar në këtë fakultet (Alumni).
Në këtë takim mori pjesë edhe kryetari i Bashkësisë Islame të Kosovës, Myftiu Naim ef. Tërnava, i cili në fjalën e tij theksoi se si institucion jemi shumë krenarë me kuadrot që kanë diplomuar në këtë fakultet. Ai tha se Bashkësia Islame e Kosovës mbetet gjithherë e përkushtuar që t’u ofrojë kushtet më të mira jo vetëm studentëve që tanimë studiojnë në FSI, por edhe atyre që kanë diplomuar. Myftiu Tërnava, shfrytëzoi rastin që në fund të takimit t’i uroj të gjithë për ardhjen e muajit të bekuar Ramazan, duke u dëshiruar agjërim të lehtë dhe të pranuar.
Një fjalë përshëndetëse e mbajti edhe dekani i FSI-së, dr. Islam Hasani, i cili në pika të shkurtra tregoi për numrin e studentëve të diplomuar, qoftë në nivelin bachelor, por edhe në atë master. Ai tha se tanimë si institucion jemi në prag të fillimit të studimeve të doktoratës, në marrëveshje me Universitetin e Malajzisë.
Në fund, edhe disa prej studentëve të diplomuar revokuan kujtimet e tyre për periudhën sa kanë qenë studentë në Fakultetin e Studimeve Islame.
Këshilli i Bashkësisë Islame në Prizren, shpallë:
KONKURS
Për këto vende të punës:
Imam, hatib dhe mual-lim në xhaminë “Pavarësia”
Imam, hatib dhe mual-lim në xhaminë “Muderris Ymer Prizreni”
Kandidatët duhet t’i plotësojnë këto kushte:
- Të ketë të kryer Medresenë, FSI-në ose Fakultetin e Studimeve Islame jashtë vendit (diploma e vërtetuar nga Kryesia e Bashkësisë Islame të Kosovës);
- T’u përmbahen Kushtetutës së Bashkësisë Islame të Republikës së Kosovës, rregulloreve, vendimeve të Kryesisë dhe Rregullores së Këshillit;
- Të kenë aftësi komunikuese dhe organizative për çështje fetare;
- Të jenë të shëndoshë psikikisht dhe fizikisht;
- Të mos kenë vërejtje në punë, nëse paraprakisht kanë qenë të punësuar;
- Të jenë nënshtetas të Republikës së Kosovës;
Dokumentet e kërkuara:
Krahas kërkesës për punësim, duhen bashkëngjitur edhe këto dokumente:
- Diploma e Medresesë (shkollimi katërvjeçar) ose ajo e Fakultetit;
- Certifikata e lindjes;
- Certifikata shëndetësore;
- Certifikata se nuk është nën hetime ose i dënuar;
- Vërtetimi për përvojën e punës;
- Deklaratë me shkrim se ka për t’i kryer të gjitha shërbimet fetare;
- CV –ja, të dhënat personale, kualifikimet ose dëshmitë për aftësim profesional;
- Letërnjoftimi (fotokopje);
Vërejtje:
Dokumentet dorëzohen në zyrën e Këshillit të Bashkësisë Islame në Prizren.
Dokumentet e pakompletuara, si dhe ato që arrijnë pas afatit të paraparë, nuk do të merren në shqyrtim.
Konkursi është i hapur 15 ditë kalendarike, nga dita e publikimit në websajtin e Kryesisë së BIRK-ut.
Kryetari i Bashkësisë Islame të Kosovës, Myftiu Naim ef. Tërnava, ka pritur sot në takim zyrtaren për çështje politike në Ambasadën e Shteteve të Bashkuara të Amerikës në Kosovë, znj. Brooke Young.
Gjatë këtij takimi u diskutua për rëndësinë e lirive fetare dhe angazhimin e Bashkësisë Islame në avancimin e të drejtave dhe lirive fetare në Kosovë.
Myftiu Tërnava theksoi se Kosova është një shembull i harmonisë fetare, ku besimtarët e feve të ndryshme bashkëjetojnë në paqe dhe respekt. Ai tha se Bashkësia Islame e Kosovës ka luajtur dhe vazhdon të luajë një rol të rëndësishëm në promovimin e lirive fetare dhe respektimin e diversitetit, duke kontribuuar kështu në forcimin e paqes dhe stabilitetit në vend.
Nga ana e saj, znj. Brooke Young, vlerësoi lart kontributin e Bashkësisë Islame të Kosovës dhe angazhimin e saj për t’i ruajtur dhe forcuar liritë fetare, duke theksuar faktin se Shtetet e Bashkuara të Amerikës mbështesin përpjekjet e Kosovës për të promovuar tolerancën fetare dhe të drejtat e njeriut. Ajo me këtë rast theksoi rëndësinë e dialogut ndërfetar dhe bashkëpunimin për ndërtimin e një shoqërie të barabartë për të gjithë qytetarët.
Kryeimami i Kosovës, Vedat ef. Sahiti, ka zhvilluar një takim me imamët e Mitrovicës, për të diskutuar përgatitjet për muajin e bekuar Ramazan.
Takimi u organizua dhe u mirëprit nga kryetari i Këshillit të Bashkësisë Islame të Mitrovicës, Ekrem ef. Avdiu, i cili theksoi rëndësinë e përgatitjeve të koordinuara për këtë periudhë të shenjtë.
Gjatë takimit, kryeimami Sahiti theksoi se është koha për t’u angazhuar për aktivitete që do t’i shërbejnë besimtarëve, për të promovuar vlerat islame dhe për të siguruar një atmosferë të qetë dhe harmonike. Ai foli gjithashtu për rëndësinë e bashkëpunimit të ngushtë mes institucioneve fetare dhe komunitetit në këtë periudhë të shenjtë.
Kryetari i BI-së së Mitrovicës, Ekrem ef. Avdiu, shprehu mbështetje të plotë për aktivitetet që do të zhvillohen gjatë muajit Ramazan, si dhe theksoi se Këshilli i BI-së do të angazhohet për të ofruar mbështetje të plotë për çdo iniciativë që synon përmirësimin e kushteve për besimtarët dhe nxitjen e unitetit fetar në komunitet.
Kryeimami i Bashkësisë Islame të Kosovës, Vedat ef. Sahiti, ka realizuar një takim të rëndësishëm me imamët Gjilanit, Vitisë dhe Kaçanikut, për të diskutuar përgatitjet për muajin e shenjtë Ramazan. Këto takime të ndara u zhvilluan në një atmosferë bashkëpunimi dhe angazhimi të përbashkët për përmbushjen e detyrave që lidhen me këtë muaj të shenjtë.
Kryeimami Sahiti theksoi rëndësinë e muajit Ramazan si një periudhë e thellë shpirtërore, ku besimtarët myslimanë gjithandej botës angazhohen në agjërim dhe lutje për të afruar më shumë me Krijuesin. Ai i inkurajoi imamët të organizojnë aktivitete edukative dhe shpirtërore për besimtarët, duke u fokusuar sidomos te edukimi i brezave të rinj për vlerat e Ramazanit dhe rëndësinë e adhurimit në këtë muaj.
Kryeimami theksoi se imamët janë ndër figurat më të rëndësishme që mund të kontribuojnë në formimin e një shoqërie të drejtë dhe të balancuar, duke edukuar besimtarët dhe duke iu ofruar atyre një shembull të mirë të praktikës islame.
Imamët u shprehën se do të jenë të angazhuar për të forcuar bashkëpunimin për të siguruar që besimtarët të kenë mundësinë të marrin udhëzime të sakta, si dhe për të organizuar aktivitete që do të ndihmojnë në përgatitjen shpirtërore dhe fizike për Ramazan.
Në fund, kryeimami Sahiti i falënderoi imamët për angazhimin e tyre dhe i siguroi ata për mbështetje të vazhdueshme nga Bashkësia Islame e Kosovës gjatë muajit Ramazan dhe më pas. Ai bëri thirrje për unitet dhe angazhim të përbashkët, duke u shprehur i bindur se veprimet e tyre do të kontribuojnë në forcimin e besimit dhe bashkëjetesës mes myslimanëve në Kosovë.
Me rastin e fillimit të muajit të begatë Ramazan, Këshilli i Bashkësisë Islame në Gjilan organizoi një tribunë fetare për të festuar ardhjen e këtij muaji.
Me këtë rast, kryetari i Këshillit të BI-së së Gjilanit, Naim ef. Aliu, në hapje të kësaj tribune falënderoi të pranishmit për pjesëmarrje, teksa më pas shpalosi karakteristika të veçanta të këtij muaji.
Ligjëratën kryesore kushtuar këtij muaji e mbajti kryeimami i Kosovës, Vedat ef. Sahiti, i cili ligjëroi rreth asaj se si duhet të jetë besimtari gjatë këtij muaji.
Sa i përket anës shëndetësore të agjërimit, një ligjëratë të shkurtër e mbajti dr. Kushtrim Qerimi. Programi u shoqërua edhe me pika artistike.
Shoqata “Bereqeti” në bashkëpunim me Drejtorinë e Vakëfeve e Turqisë, e cila funksionon në kuadër të Ministrisë së Kulturës dhe Turizmit të Turqisë, ka dhuruar 6 mijë pako ushqimore për familjet në nevojë në Kosovë.
Kjo ndihmë vjen në kuadër të përkujdesjes për besimtarët myslimanë gjatë muajit të Ramazanit. Aksioni i jashtëzakonshëm ka filluar që nga java e kaluar ku në secilin qytet të Kosovës do të dhurohen pako të tilla ushqimore.
Xheladin Fazliu, përfaqësuesi i “Bereqetit” thotë se ky aksion është jashtëzakonisht i rëndësishëm për shkak se po bëhet në fillim të muajit të Ramazanit, ku sofra e secilës familje të jetë e mbushur dhe askush të mos e ketë brengë ushqimin.
Përfaqësuesi i Drejtorisë së Vakëfeve të Turqisë, Uğur YazIcI, thotë se vëllezërit në Turqi e ndjejnë për obligim që të jenë pranë vëllezërve në Kosovë dhe në veçanti gjatë muajit të Ramazanit.
“Për ne si besimtarë nga Republika e Turqisë është obligim të kujdesemi për vëllezërit tanë në Kosovë. Në veçanti, kjo përkujdesje shtohet gjatë muajit të Ramazanit. Jemi këtu me këto dhurata për familjet që kanë nevojë për ndihmë,” tha përfaqësuesi turk.
Një prej aksioneve humanitare u mbajt edhe në qytetin e Klinës, me ç’rast u vlerësua lartë uniteti në prag të Ramazanit.
Rastet sociale, jetimët, veteranët e luftës, invalidët e luftës, nënat vetushqyese, familjet e Hendikosit, shoqata e të verbërve dhe kategori të tjera po përfitojnë nga ky aksioni jashtëzakonshëm i “Bereqetit”.
Ky vit është viti i 10 me radhë që Drejtoria e Vakëfeve të Turqisë së bashku me “Bereqetin” dhurojnë pako ushqimore për kategoritë e ndjeshme të shoqërisë në Kosovë dhe njëkohësisht është mbështetës i shumë projekteve të tjera për besimtarët myslimanë në Kosovë dhe shoqërinë në përgjithësi.
Këshilli i Bashkësisë Islame në Ferizaj, shpallë:
KONKURS
Për plotësimin e vendit të lirë të punës:
Imam, hatib dhe mual-lim në xhaminë e fshatit Nekudim
Kandidatët duhet t’i plotësojnë këto kushte:
- Të ketë të kryer Medresenë, FSI-në ose Fakultetin e Studimeve Islame jashtë vendit (diploma e vërtetuar nga Kryesia e Bashkësisë Islame të Kosovës);
- T’u përmbahen Kushtetutës së Bashkësisë Islame të Republikës së Kosovës, rregulloreve, vendimeve të Kryesisë dhe Rregullores së Këshillit;
- Të kenë aftësi komunikuese dhe organizative për çështje fetare;
- Të jenë të shëndoshë psikikisht dhe fizikisht;
- Të mos kenë vërejtje në punë, nëse paraprakisht kanë qenë të punësuar;
- Të jenë të pranueshëm nga Këshilli i Xhamisë dhe xhemati përkatës;
- Të jenë nënshtetas të Republikës së Kosovës dhe atë nga Komuna e Ferizajt.
Dokumentet e kërkuara:
Krahas kërkesës për punësim, duhen bashkëngjitur edhe këto dokumente:
- Diploma e Medresesë (shkollimi katërvjeçar) ose ajo e Fakultetit;
- Certifikata e lindjes;
- Certifikata shëndetësore;
- Certifikata se nuk është nën hetime ose i dënuar;
- Vërtetimi për përvojën e punës;
- Deklaratë me shkrim se ka për t’i kryer të gjitha shërbimet fetare;
- CV –ja, të dhënat personale, kualifikimet ose dëshmitë për aftësim profesional;
- Letërnjoftimi (fotokopje);
Të gjitha dokumentet duhet të jenë në origjinal apo të noterizuara.
Vërejtje:
Dokumentet dorëzohen në zyrën e Këshillit të Bashkësisë Islame në Ferizaj.
Dokumentet e pakompletuara, si dhe ato që arrijnë pas afatit të paraparë, nuk do të merren në shqyrtim.
Konkursi është i hapur 15 ditë kalendarike, nga dita e publikimit në websajtin e Kryesisë së BIRK-ut.