هاونیشتمانییانی خۆشەویست!
کۆڕ و کۆمەڵە مەدەنییەکانی ڕۆژهەڵاتی کوردستان!
تێکۆشەران و چالاکانی مەدەنی!

لە کاتێک‌دا بەرەو یادی چوارەمین ساڵڕۆژی دەسپێکی بزووتنەوەی شوناسخوازانە و جەماوەریی ژینا هەنگاو دەنێین، کە وەبیرهێنەرەوەی ڕۆژانێکی پڕشکۆ لە خەباتی نەپساوە و بەردەوامی ئازادیخوازانی نەتەوەکەمان بەرامبەر بە دەسەڵاتی پاوانخواز و خۆسەپێنی کۆماری ئیسلامیی ئێرانە.

ئەو سەرهەڵدانە مێژووییە سەرەتا لە کوردستانەوە سەری هەڵدا و پاشان هەموو ناوچەکانی ئێرانی گرتەوە و گشت ئازادیخوازانی جیهانیشی هێنایە سەر هێڵ و لاپەڕەی بزووتنەوەیەکی سەردەمییانە و پێشکەوتووی لە مێژووی خەباتی ئازادیخوازان‌دا بۆ هەمیشە تۆمار کرد.

بزووتنەوەی ژینا کە بە درووشمی سەرەکیی “ژن.ژیان.ئازادی” هەموو چین و توێژەکانی کوردستان و ئێرانی هێنایە سەر شەقام و [نا]یەکی بەرزیان بە دەسەڵاتی خۆسەپێنی کۆماری ئیسلامی وت، لە ژنانەوە کە ڕۆڵی بەرچاویان گێڕا هەتا لاوان و خوێندکاری زانکۆکان، هەموو یەک‌دەنگ و یەک‌هەڵوێست لە بەرامبەر دڕەندەییی هێزە سەرکوتکەرەکانی کۆماری ئیسلامی‌دا وەستانەوە و ئەو ڕێژیمەیان تووشی گەورەترین ڕووبەڕووبوونەوە و قەیرانی مێژووی دەسەڵاتدارییەکەی کرد.

هەموو ئەو کەسانەی وا کەڵکەڵەی ڕزگاری و ئازادییان هەیە و چاولەڕێی نەمانی دیکتاتۆرانن، ئێستاش چاوی هیوایان لەسەر خەڵکی تێکۆشەر و ماف‌ویستی کوردستان و ئێرانە بۆ ئەوەی بۆ هەمیشە لە لەمپەرێک بە ناوی کۆماری ئیسلامی تێپەڕ بن.

هەر بەم بۆنە هاوپەیمانیی هێزە سیاسییەکانی کوردستانی ئێران لە بەرەبەری ساڵڕۆژی بزووتنەوەی ژن، ژیان، ئازادی‌دا داواکاریی مانگرتنێکی گشتیی بڵاو کردووەتەوە کە بۆ ڕۆژی ٢٥ـی خەرمانانە و لەوێ‌دا داوا لە خەڵکی کوردستان کراوە بە داخستنی دووکان و بازاڕەکان پەیوەستی ئەو مانگرتنە بن و جارێکی دی نیشانی بدەن کە خوێنی ڕۆڵەکانی خۆیان لەبیر نەکردووە و ئەو پەیامە بە کۆماری ئیسلامی بدرێت کە دەسەڵاتێکی ناڕەوایە و ناتوانێ بە گرتن و سەرکوت، هەڕەشە و ئەشکەنجە و ئێعدام خەونی ئازادی لە چاوی خەڵکی چاونەترس بتارێنێت.

ئێمە وەک ناوەندی ڕێکخراوە مەدەنییەکانی ڕۆژهەڵاتی کوردستان وێڕای پشتیوانی لە بانگەواز بۆ بەڕێوەچوونی مانگرتنی گشتیی خەڵکی کوردستان، داوا لە هەموو چالاکانی مەدەنی، توێژەکانی ژنان، لاوان، خوێندکاران، ڕووناکبیران، مامۆستایان و ڕێکخراوە مەدەنی و ئێن‌جی‌ئۆکان و… دەکەین بەوپەڕی توانای خۆیان پەیوەستی ئەم مانگرتنە بن و لاپەڕەیەکی زێڕینی تر له خەباتی مەدەنییانە و ئازادیخوازانەی خۆیان تۆمار بکەن.

سەر کەوێت خەباتی نەپساوەی نەتەوەکەمان.

ناوەندی ڕێکخراوە مەدەنییەکانی ڕۆژهەڵاتی کوردستان

٢٢ی خەرمانانی ١٤٠٥ـی هەتاوی

چاونیوز: بەندکراوێکی مەدەنی و ڕاگەیاندنکار، بە دانانی بارمتەی قورس بە شێوەی کاتی ئازاد کرا.

بەپێی هەواڵە بڵاوکراوەکان، ڕۆژی شەممە، ٢١ی خەرمانان، عابید عەلیزادە، خەڵکی تیکاب و چالاکی بواری ڕاگەیاندن، کە لە ڕێکەوتی ٢٨ی گەلاوێژ، لەلایەن هێزەکانی سەربە سپای پاسدارانەوە دەسبەسەر کرابوو، بە دانانی بارمتەی ٢ میلیارد تمەنی بە شێوەی کاتی ئازاد کرا.

ئەم کەسە کە ١٣ ڕۆژ لە گرتنگەی سپای پاسداران لە ورمێ و ١٢ ڕۆژ لە بەندیخانەی میاندواو بەسەر بردووە، لە ماوەی دەسبەسەریدا لەژێر ئەشکەنجەی جەستەی و ڕۆحیدا بووە و پاش ٢٥ ڕۆژ، سەرەتا بە دیاریکردنی دانانی بارمتەی ٤ میلیارد تمەن و پاشان بەکەمکردنەوەی بۆ ٢ میلیارد تمەن، هەتا کاتی دادگاییکردنی بە شێوەی کاتی ئازاد کراوە.

چاونیوز: هێزەکانی سەربە سپای پاسداران لە کوردستان، هەڵیانکوتاوەتە سەر ماڵی چەند بنەماڵەیەکی دژبەرانی کۆماری ئیسلامی.

بەپێی هەواڵی گەیشتوو بە چاونیوز، کاتژمێری ٤ و نیوی بەرەبەیانیی ڕۆژی هەینی، ٢٠ی خەرمانانی ١٤٠٥، هێزەکانی سەربە سپای پاسداران و لە چەکدارانی مەنگوڕ، لە شاری پیرانشار، هەڵیانکوتاوەتە سەر ماڵی “عوسمان سوخەنوەر” باوکی “کاکەڵڵا سوخەنوەر” ناسراو بە “ئارام گەردی” پێشمەرگەی حیزبی دێموکرات.

هێزەکانی سپای پاسداران، تەنیا بە بیانووی ئەوەی کە کوڕێکی ئەم بنەماڵەیە دژبەری کۆماری ئیسلامییە هێرشیان کردووەتە سەر ئەم بنەماڵەیە و وێڕای لێدانی ئەندامانی بنەماڵەکە بەتایبەت عوسمان سوخەنوەر و خێزانەکەی و بریندارکردنیان، بەشێک لە ماڵەکەیان سووتاندووە و کەلوپەلەکانیشیان شکاندووە.

هەر لەم پێوەندییەدا، هێزەکانی سپای پاسداران، لە شاری پیرانشار، شەوی ڕابردوو، پەلاماری ماڵی برایەکی “محەممەد باڵدار” پێشمەرگەی حیزبی دیـموکراتیان داوە و دوای شکانی درگا و پەنجەرەوە و کەلوپەلی ماڵەکەی، لە ئەندامانی بنەماڵەکە و برای ناوبراویان داوە و بە توندی برینداریان کردووە.

بەپێی وتەی شایەتحاڵان، لە هەر دوو حاڵەتدا، هێزەکانی سپای پاسداران بەبێ هیچ بەڵگەیەکی یاسایی و تەنیا بە بیانووی کوڕ و برای ئەم بنەماڵەیە لە دژبەرانی کۆماری ئیسلامین دەستیان داوەتە ئەم کردەوە ناڕەوایە.

چاونیوز: هاووڵاتییەکی کورد لە کاتی شەڕ و تێکەڵچوون لەگەڵ هێزە نیزامییەکانی کۆماری ئیسلامی، گیانی لە دەست دا.

بەپێی هەواڵە بڵاوکراوەکان، ڕۆژی چوارشەممە، ١٨ی خەرمانان، “موجتەبا باباخانی”، خەڵکی شاری مێهران سەربە پارێزگای ئیلام، لە خۆپیشاندەرانی ناڕەزایەتییەکانی سەرماوەزی ١٤٠٤، کە چەند مانگێکە بە شێوەی شاراوە دەژیت، لە کاتی تێکەڵچوون لەگەڵ هێزە نیزامییەکاندا، پاش چەند کاتژمێر شەڕ، بە تەقینەوەی نارنجۆک بە خۆیەوە گیانی لە دەست دا.

شایانی باسە لەم شەڕ و تێکەڵچوونە، چەند کەس لە هێزە نیزامییەکانی کۆماری ئیسلامیش گیانیان لە دەست داوە.

چاونیوز: بە هۆی کەمتەرخەمیی خاوەنکاران و هەروەها نەبوونی یاسای تایبەت بە پاراستنی گیانی کرێکاران، ساڵانە چەندین کرێکار لە کاتی کاردا گیانی خۆیان لە دەست دەدەن.

بەپێی ئەو هەواڵەی کە بە چاونیوز گەیشتووە، ڕۆژی ٦ی خەرمانان، لە شاری مەریوان، کرێکارێکی ئارماتۆربەند، بە ناوی “کاوە ئێرانیپوور”، لە کاتی کارکردندا، بە هۆی بەربوونەوەی ئاسنی قورس بەسەر سەریدا، بریندار دەبێت و دەچێتە نێو حاڵەتی کۆماوە.

بەپێی وتەی شایەتحاڵان، ئەم کەسە دەبوو خێرا بە هەلیکۆپتێر بەرەو نەخۆشخانەی شاری سنە ڕەوانە بکرایە کە بە هۆی نەبوونی هەلیکۆپتێر گواستنەوەی ناوبراو لە کاتی خۆیدا جێبەجێ نەکراوە و ئەم درەنگبوونە بووە هۆی ئەوەی کە لە کاتی خۆیدا چارەسەر وەرنەگرێت و لە ڕۆژی دووشەممە، ١٦ی خەرمانان گیانی لە دەست بدات.

هەروەها لەم پێوەندییەدا، کرێکارێکی دیکەی خەڵکی بۆکان، بە ناوی “واحید خەزریان” خێزاندار و خاوەن سێ منداڵ، لە کاتی جۆشکاری بیناییەکی چەند نهۆمی، لە شاری هەولێر، بەر دەبێتەوە و گیانی لە دەست دەدات.

ساڵانە بە هۆی کەمتەرخەمیی و نەبوونی کەرەستەی پێویست بۆ پاراستنی گیانی کرێکاران، دەیان کرێکاری کورد یان تووشی کەمئەندامی و لەدەستدانی بەشێک لە جەستەیان دەبن یان گیانیان لە دەست دەدەن.

چاونیوز: کوشتنی هاووڵاتییانی کوردستان، بە ئاشکرا و بە نهێنی لەلایەن هێزە حکوومەتییەکانەوە، بە شێوەیەکی بەرچاو پەرەی سەندووە.

بەپێی هەواڵەکان، ڕۆژی دووشەممە، ١٦ی خەرمانان، شەماڵ فەخرولعولەمایی، وەرزشکاری ناسراو و خۆشەویستی خەڵکی سنە، لە سنووری مەریوان، بەبێ ئاگادارکردنەوە و بە تەقەی ڕاستەوخۆ، لەلایەن هێزەکانی حکوومەتی ئێران لە سەر سنوور گیانی لە دەست دا.

پاش کوشتنی ئەم وەرزشکارە سنەیی، کە بەبێ هیچ پاساوێکی یاسایی و سەرەڕۆیانە ئەنجام دراوە، هێزە ئەمنییەتییەکان گوشاریان خستووەتە سەر بنەماڵەکەی کە پێش بە بڵاوبوونەوەی هەواڵەکەی لە ڕاگەیاندنەکان و تۆڕە کۆمەڵایەتییەکان بگرن.

هەر لەم پێوەندییەدا، هاووڵاتییەکی دیکەی خەڵکی مەهاباد، بە ناوی “ئەنوەر کەیخوسرەوی” خەڵکی مەهاباد، کە لە ڕێکەوتی ٦ی خەرمانانەوە بێسەروشوێن کراوە، تەرمەکەی لە ڕۆژی یەکشەممە، ١٥ی خەرمانان، لە پشت ماڵەکەی خۆی لە گەڕەکی فەجر دۆزراوەتەوە.

بەپێی وتەی شایەتحاڵان، ئەم هاووڵاتییە لەلایەن هێزە ئەمنییەتییەکانەوە لەژێر گوشاردا بووە و پێیان ڕاگەیاندووە کە لە ئیتلاعاتی ورمێ ناوی لە ڕیزی ئەو کەسانەی کە دەسبەسەر دەکرێن.

دوای دۆزینەوەی تەرمی ناوبراو پاش دە ڕۆژ لە ونبوونی، پزیشکی یاسایی ڕایگەیاندووە کە ئاسەواری لێدان و ئەشکەنجە لە سەر جەستەی ئەم کەسە دیار نییە و ئیدارەی ئاگاییش ڕایگەیاندووە کە ئەم کەسە بە هۆی خەمۆکییەوە لە سەر سەربانی ماڵەکەی، خۆی بەر داوەتەوە.

شایانی باسە، “خانە کەیخوسرەوی” باوکی ئەنوەر کەیخوسرەوی، کە چەند ساڵێک پێشمەرگەی حیزبی دێموکرات بووە، لەلایەن هێزەکانی سپای پاسدارانەوە لە ماڵەکەی خۆی تیرۆر کراوە.

چاونیوز: هونەرمەندێکی کورد لەلایەن هێزەکانی ئیتلاعاتی شاری مەریوان، بە شێوەی زۆرەملێ دەسبەسەر و بۆ شوێنێکی نادیار ڕاگوزاراوە.

بەپێی هەواڵە بڵاوکراوەکان، ڕێکەوتی ١٦ی خەرمانان، هونەرمەند خەبات فیدایی، خەڵکی گوندی بۆڕیەر و دانیشتووی شاری مەریوان، لەلایەن هێزەکانی ئیتلاعاتی ئەو شارەوە، بە زۆرەملێ و توندوتیژی دەسبەسەر کراوە و بەرەو شوێنێکی نادیار ڕاگوازراوە،

ئەم هونەرمەندە کوردە پێشتریش لە ساڵی ١٤٠١، کاتێکی کە ماڵیان لە شاری تاران بوو، بە تۆمەتی ئەندامەتی و هاوکاریی لەگەڵ حیزبە کوردییەکاندا دەسبەسەر کراوە.

هەتا کاتی بڵاوبوونەوەی ئەم هەواڵە، لەسەر هۆکاری دەسبەسەرکردن، شوێنی ڕاگرتن و باری تەندروستیی هیچ زانیارییەک لە بەردەستدا نییە.

چاونیوز: لە چەند مانگی ڕابردوودا، ناوەندە قەزایییەکانی کۆماری ئیسلامی، حوکمی قورسیان بۆ چەند هاووڵاتییەکی کوردستان دەرکردووە.

بەپێی هەواڵە بڵاوکراوەکان، دادگای ئینقلابی شاری قەسر شیرین، سەربە بە پارێزگای کرماشان، سەرجەم حوکمی  ١٠ ساڵ زیندانی بۆ دوو هاووڵاتیی خەڵکی ئەم شارە بە ناوەکانی “ئەبولفەزل ڕۆستەمی و عیرفان مورادی” درەکردووە.

ئەم دوو هاووڵاتییە کە لە ڕۆژی پێنجشەممە، ٧ی جۆزەردان، بە بیانووی بەشداریی لە خۆپیشاندانەکانی سەرماوەزی ١٤٠٤ دەسبەسەر کران، بە تۆمەتی “کۆبوونەوە و کاری ڕێکخستن بە مەبەستی شێواندنی ئاسایشی نێوخۆیی و دەرەکی” مەحکووم کراون.

هەر لەم پێوەندییەدا، هاووڵاتییەکی دیکەی خەڵکی ورمێ، بە ناوی “سامان قادری”، لە دەسبەسەرکراوانی خۆپیشاندانەکانی سەرماوەز، لەلایەن لقی ٢٦ی دادگای ئینقلابی تاران، بە تۆمەتی “کردەوە بەدژی ئاسایشی نیشتمانی” بە ١١ ساڵ و “بێڕێزی بە پیرۆزییەکان” بە ٣ ساڵ زیندان مەحکووم کراوە، کە سەرجەم ١٤ ساڵ زیندانی بۆ بڕاوەتەوە.

چاونیوز: لە درێژەی دەسبەسەرکردنە ناڕەواکان و گوشار بۆ سەر هاووڵاتییانی کوردستان، ژنێکی مەهابادی لەلایەن هێزەکانی ئیتلاعاتەوە دەسبەسەر کراوە.

بەپێی هەواڵی گەیشتوو بە چاونیوز، ڕۆژی یەکشەممە، ١٥ی خەرمانان، سوهەیلا عەلیزادە، تەمەن ٣٠ ساڵ، کچی عومەر و خەڵکی مەهاباد، لەلایەن هێزەکانی سەربە ئیتلاعاتەوە دەسبەسەر و بۆ گرتنگەیەکی شاری ورمێ ڕاگوازراوەتەوە.

هەتا کاتی بڵاوبوونەوەی ئەم هەواڵە، لەسەر هۆکاری دەسبەسەرکردن، شوێنی ڕاگرتن و باری تەندروستیی ئەم کەسە  هیچ زانیارییەک لە بەردەستدا نییە.

چاونیوز: ژن و مێردێکی سنەیی، لەلایەن هێزە ئەمنییەتییەکانی کۆماری ئیسلامییەوە، بە زۆرەملێ و ناڕەوا دەسبەسەر کران و بۆ شوێنێکی نادیار گوازراونەتەوە.

بەپێی هەواڵە بڵاوکراوەکان، ڕۆژی یەکشەممە، ١٥ی خەرمانان، هاووڵاتییەکی سنەیی بە ناوی فەریدوون نامداری، ٥٥ ساڵە، لە شوێنی کارەکەی بەبێ هیچ بەڵگە و حوکمێکی قەزایی لەلایەن هێزەکانی سەربە ئیتلاعاتی سنە دەسبەسەر کراوە.

هەر لەو ڕۆژە پاش دەسبەسەرکردنی ئەم هاووڵاتییە، هێزەکانی سەر بە ئیتلاعاتی سنە، هەڵیانکوتاوەتە سەر ماڵی ئەم کەسە و هاوژینەکەی بە ناوی “شوعلە ڕۆحی”شیان دەسبەسەر کردووە و بەرەو شوێنێکی نادیاریان ڕایانگواستووە.

بەپێی وتەی شایەتحاڵان، سەرەڕای بەدواداچوونی بنەماڵەی ئەم هاوژینە سنەیییە، هەتا ئێستە هیچ زانیارییەکی باوەڕپێکراویان پێ نەدراوە.

چاونیوز: شەپۆلی دەسبەسەرکردنی نایاساییی لاوانی کورد لەلایەن هێزە ئەمنییەتییەکانی کۆماری ئیسلامییەوە نیگەرانیی کۆمەڵگەی کوردستانی لێ کەوتووەتەوە.

بەپێی هەواڵە بڵاوکراوەکان، ڕۆژی چوارشەممە، ١١ی خەرمانان، “محەممەد ئیبراهیم‌نیا”، ناسراو بە “موحسێن گورگە”، خەڵکی شاری شنۆ، بەبێ هیچ بەڵگەیەکی یاسایی، لەلایەن هێزە ئەمنییەتییەکانەوە دەسبەسەر و بەرەو شوێنێکی نادیار گوازراوەتەوە.

هەر لەم پێوەندییەدا، “محەممەد حەمزەزادە”، خەڵکی مەهاباد، ١٠ ڕۆژ پێش، لەلایەن هێزە ئەمنییەتییەکانەوە دەسبەسەر کراوە و بۆ شوێنێکی نادیار گوازراوەتەوە و هەتا ئێستە بنەماڵەکەی هیچ زانیارییەکیان لەسەر باری تەندروستی و شوێنی ڕاگرتن لە بەردەستدا نییە.

دەسبەسەرکردن نایاساییی لاوانی کورد کە ڕووی لە زیادبوون کردووە، کەشێکی نائەمن و تۆقێنەری بۆ لاوان و بنەماڵەکانی کوردستان دروست کردووە و ئەم دیاردە نایاسایییە نیگەرانی بۆ ناوەندەکانی مافی مرۆڤی کوردستان بەدی هێناوە.

چاونیوز: ژنێکی کورد پاش ئەوەی گوندەکەیان لەلایەن هێزە ئەمنییەتییەکانەوە میلیتاریزە کرا، دەسبەسەر و بۆ شوێنێکی نادیار ڕاگوازرا.

بەپێی هەواڵی گەیشتوو بە چاونیوز، ڕۆژی سێشەممە، ١٠ی خەرمانان، “ناهید کەسنەزانی”، تەمەن ٣٢ ساڵ، خەڵکی گوندی “کەسنەزان”، لە ناوچەی “سەرشیو”ی سەقز، لەلایەن هێزە ئەمنییەتییەکانی کۆماری ئیسلامییەوە، بەبێ هیچ بەڵگەیەکی قەزایی، پاش ئەوەی کە گوندی کەسنەزان بەتەواوەتی میلیتاریزە دەکرێ، دەسبەسەر و بۆ شوێنێکی نادیار دەگوازرێتەوە.

بەپێی وتەی شایەتحاڵان، هێزە ئەمنییەتییەکان بە توندترین شێوەی بەرەڕووی خەڵکی کەسنەزان بوونەتەوە و ڕێگایان نەداوە هیچ کەس لە ماڵەکەی خۆی بێتە دەرەوە و گوشاریان بۆ بنەماڵەی ناوبراو هێناوە کە مۆبایل و کەرەستە کەسییەکانی ناهید کەسنەزانی ڕادەست بکرێت.

هەتا کاتی بڵاوبوونەوەی ئەم هەواڵە، لەسەر هۆکاری دەسبەسەرکردن، شوێنی ڕاگرتن و باری تەندروستیی ئەم هاووڵاتییە هیچ زانیارییەک لە بەردەستدا نییە.