Adaderana Biz Sinhala | Sri Lanka Business News

ඕනෑම අභියෝගයකට ඔරොත්තු දෙමින් තාක්ෂණය හා නවෝත්පාදනයෙන් වැවිලි ඵලදායීතාව යළි අර්ථකථනය කරන මල්වත්ත වැලි වැවිලි සමාගම

Bizweb2 Bizweb2 — Fri, 11 Sep 2026 10:17:54 +0000

ආරම්භයේ සිටම ශ්‍රී ලංකාවේ වැවිලි කර්මාන්තය මෙරට ආර්ථිකයේ ප්‍රධානතම කුළුණක් ලෙස කටයුතු කර තිබේ. එහිදී තේ කර්මාන්තයට හිමිවන්නේ සුවිශේෂී ස්ථානයකි. ලොව පුරා පිළිගැනීමක් දිනාගත් කලාපීය වැවිලි සමාගමක් වන මල්වත්ත වැලි ප්ලාන්ටේෂන්ස් පීඑල්සී සමාගමට ද තේ යනු සිය ව්‍යාපාරික උරුමයේ මෙන්ම ආර්ථික ශක්තියේ ද ප්‍රධාන පදනමකි. එම සමාගමට අයත් වැවිලික්ෂේත්‍රය ආශ්‍රිත පාංශු සම්පත, උන්නතාංශය සහ නිම්නය හරහා හමා යන වියළි සුළං එකිනෙකට එක්වීමෙන්, වෙනත් ප්‍රදේශවලදී පහසුවෙන් ප්‍රතිනිර්මාණය කළ නොහැකි සුවිශේෂී භූමි හා දේශගුණික ලක්ෂණයක් නිර්මාණය වී තිබේ. එම ස්වභාවික පරිසරය හේතුවෙන් මල්වත්ත වැලි තේ සඳහා මෘදු, සුමට සහ ඉහළ සුවඳකින් යුත් විශේෂ රස මාවතක් හිමිව ඇති අතර, ලොව පුරා උසස් තත්ත්වයේ තේ රසිකයන් අතර ඒ සඳහා ඉහළ ඉල්ලුමක් පවතී. එහෙත් වර්තමානයේ අනෙකුත් සියලුම කෘෂි ව්‍යාපාර මෙන්ම මල්වත්ත වැලි සමාගම ද බහුවිධ අභියෝගවලට මුහුණ දෙමින් සිටී. නිෂ්පාදන පිරිවැය අඛණ්ඩව ඉහළ යාම, බෝග රෝග ව්‍යාප්තිය, දේශගුණික විපර්යාස සහ ගෝලීය වෙළෙඳපොළේ ඇතිවන මිල හා ඉල්ලුම් අස්ථාවරත්වය එම අභියෝග අතර ප්‍රධාන වේ. මේ තත්ත්වය හමුවේ සාම්ප්‍රදායික වැවිලි ක්‍රමවේදවලට පමණක් සීමා නොවී, තාක්ෂණය, නවෝත්පාදනය සහ වෙනස්වන තත්ත්වයන්ට අනුව හැඩගැසීමේ හැකියාව ඔස්සේ වැවිලි ඵලදායීතාව යළි අර්ථකථනය කිරීම සමාගමේ ඉදිරි ගමනේ මූලික අවශ්‍යතාවක් බවට පත්ව තිබේ. ඌව පළාත පුරා විහිදී ඇති තේ වතු සහ අවිස්සාවේල්ල අවට පහතරට ප්‍රදේශවල පිහිටි වගා බිම් මත සිය මෙහෙයුම් පවත්වාගෙන යන මල්වත්ත වැලි ප්ලාන්ටේෂන්ස් සමාගම, උසස් තත්ත්වයේ ශ්‍රී ලාංකේය තේ, ර්රබර්, කුළුබඩු සහ වටිනාකම් එකතු කළ නිෂ්පාදන රැසක් සපයන මෙරට ප්‍රමුඛ වැවිලි සමාගමක් ලෙස දශක ගණනාවක් පුරා කීර්තියක් ගොඩනඟාගෙන තිබේ. වර්තමානයේ සමාගමේ නිෂ්පාදන මැද පෙරදිග, යුරෝපය, රුසියාව, චීනය, ඕස්ට්‍රේලියාව සහ ජපානය ඇතුළු ජාත්‍යන්තර වෙළෙඳපොළ රැසකට අපනයනය කෙරෙන අතර, මෙරට ප්‍රමුඛතම තේ අපනයනකරුවන් විසි දෙනා අතර ද මල්වත්ත වැලි සමාගම ස්ථානගත වී සිටී. එහෙත් අද මල්වත්ත වැලි සෙසු වැවිලි සමාගම්වලින් කැපී පෙනෙන්නේ එහි නිෂ්පාදනවල ගුණාත්මකභාවය නිසා පමණක් නොවේ. වැවිලි කෘෂිකර්මාන්තය සම්බන්ධයෙන් සමාගම අනුගමනය කරන සම්පූර්ණයෙන් නවීකරණය වූ, තාක්ෂණය හා නවෝත්පාදනය මත පදනම් වූ ප්‍රවේශය ද ඊට ප්‍රධාන හේතුවකි. මෙම නව ප්‍රවේශය පිටුපස ඇති ප්‍රධාන බලපෑමක් වන්නේ දේශගුණික විපර්යාසයයි. අවිස්සාවේල්ල අවට සමාගමට අයත් පහතරට ප්‍රදේශවල වාර්ෂික වර්ෂාපතනය මිලිමීටර් 7,000ත් 10,000ත් අතර මට්ටමක් දක්වා ඉහළ ගොස් තිබේ. අධික වර්ෂාපතනයට අමතරව, “පෙස්ටා” ලෙස හඳුන්වන Pestalotiopsis තේ දළුැ හා පත්‍ර රෝගය ව්‍යාප්ත වීම ද ප්‍රදේශයේ සාම්ප්‍රදායික රබර් වගාව ආර්ථික වශයෙන් පවත්වාගෙන යාම අපහසු කටයුත්තත් බවට පත් කර තිබේ. මෙම තත්ත්වය හමුවේ, පැරණි වගා රටාවන් මත පමණක් රඳා නොසිට, දේශගුණික අවදානම්වලට ඔරොත්තු දිය හැකි විකල්ප වගා, නව තාක්ෂණික ක්‍රමවේද සහ වටිනාකම් එකතු කළ නිෂ්පාදන වෙත යොමුවීම සමාගමේ දිගුකාලීන තිරසාරභාවය සඳහා අත්‍යවශ්‍ය වී ඇත. මෙම නව අර්බුදයේ බරපතල භාවය කල්තියා හඳුනාගත් මල්වත්ත වැලි සමාගම, ඊට ප්‍රතිචාර දැක්වීමට තීරණාත්මකව කටයුතු කළේය. ඒ අනුව හෙක්ටයාර 400ක පමණ භූමි ප්‍රමාණයක කුරුඳු වගාව ව්‍යාප්ත කිරීමට සමාගම පියවර ගත් අතර, තවත් හෙක්ටයාර 300ක නව තේ වගාවක් ස්ථාපිත කරමින් ඊට සහාය වන නව තේ කර්මාන්තශාලාවක් ද ඉදිකරමින් සිටී. මීට අමතරව රඹුටන් සහ දූරියන් ඇතුළු නිවර්තන පලතුරු වගාවන් ද සමාගමේ වගා විවිධාංගීකරණ වැඩපිළිවෙළට එක්කර තිබේ. කෙසේ වෙතත්, මෙම පරිවර්තනය අභියෝගවලින් තොර එකක් නොවීය. රබර් වගාවට විකල්පයක් ලෙස මීට පෙර ඔයිල් පාම් වගාවට යොමුවීමට සමාගම ගත් උත්සාහය, පසුව සිදුවූ නියාමන ප්‍රතිපත්ති වෙනසක් හේතුවෙන් අතරමඟ නතර කිරීමට සිදුවිය. එම තීරණයත් සමඟ සමාගමට සකස් කර තිබූ පැළ තවාන් අත්හැර දැමීමටත්, ඒ වනවිටත් සිදුකර තිබූ රුපියල් මිලියන 100කට ආසන්න ආයෝජනයක් අහිමි කර ගැනීමටත් සිදුවිය. එහෙත් එම පසුබෑම හමුවේ නතර නොවූ මල්වත්ත වැලි සමාගම, එහි බලපෑම අවශෝෂණය කරමින් සිය වගා සැලසුම් යළි සංවිධානය කළේය. භූමියේ ස්වභාවය, දේශගුණික තත්ත්වය සහ දිගුකාලීන වගා හැකියාවන් වඩාත් පැහැදිලිව තක්සේරු කරමින්, ඒ අනුව ඉදිරි ගමන සඳහා වඩාත් ප්‍රායෝගික සහ තිරසාර මාර්ගයක් තෝරාගැනීමට සමාගම පියවර ගෙන තිබේ. යාන්ත්‍රීකරණයෙන් අභිනව වැවිලි කර්මාන්තයක් ගොඩනඟන මල්වත්ත වැලි මල්වත්ත වැලි සමාගමේ නවෝත්පාදන වැඩපිළිවෙළ වඩාත් පැහැදිලිව දැකගත හැක්කේ, සමාගම විසින් සංවර්ධනය කර ඇති යාන්ත්‍රික කුරුඳු තැලීමේ තාක්ෂණය (කුරුඳු පොතු ඉවත් කිරීම) තුළිනි. කුරුඳු සැකසීම ශ්‍රී ලංකාවේ කෘෂිකාර්මික ක්ෂේත්‍රයේ වැඩිම ශ්‍රමයක් අවශ්‍ය වන ක්‍රියාවලියක් වන අතර, එහිදී පළපුරුදු කුරුඳු තලන්නන්ගේ සේවය සඳහා ඉහළ මිලක් ගෙවීමට සිදුවේ. ඇතැම් අවස්ථාවල එම ශ්‍රම පිරිවැය අවසාන නිෂ්පාදනයේ වටිනාකමෙන් සියයට 50ක් දක්වා ඉහළ යා හැකිය. විශාල පරිමාණයෙන් කුරුඳු නිෂ්පාදනය සඳහා අවශ්‍ය පළපුරුදු කුරුඳු තලන්නන්ගේ හිඟය හමුවේ, මල්වත්ත වැලි සමාගම සාම්ප්‍රදායික නොවන විසඳුමක් තෝරා ගත්තේය. ඒ අනුව කුරුඳු සැකසීම සඳහා යාන්ත්‍රික විසඳුමක් සංවර්ධනය කිරීමේ වගකීම, සමාගමේම පුනර්ජනනීය බලශක්ති අංශයේ ඉංජිනේරුවන් වෙත පැවරීය. මොරටුව විශ්වවිද්‍යාලයෙන් බඳවාගත් එම ඉංජිනේරු කණ්ඩායමේ ප්‍රධාන කාර්යභාරය වූයේ සූර්ය බලශක්ති පද්ධති ස්ථාපනය කිරීම වුවද, කුරුඳු කර්මාන්තයට අවශ්‍ය මෙම නව තාක්ෂණික විසඳුම සංවර්ධනය කිරීමේ අභියෝගය ද ඔවුන් භාරගත්තේය. දීර්ඝ කාලයක් පුරා සිදුකළ අත්හදා බැලීම් සහ තාක්ෂණික සංවර්ධන කටයුතුවල ප්‍රතිඵලයක් ලෙස, කුරුඳු තැලීමේ වඩාත් සංකීර්ණ අදියර සිදුකළ හැකි නව යන්ත්‍රයක් නිර්මාණය කිරීමට සමාගම සමත්ව තිබේ. මේ වනවිට පේටන්ට් බලපත්‍රය සඳහා අයදුම් කර ඇති මෙම යන්ත්‍රය භාවිතයෙන්, පෙර පුහුණුවක් හෝ අත්දැකීමක් නොමැති සේවකයන්ට ද පළපුරුදු කුරුඳු තලන්නන්ට සමාන නිෂ්පාදන ධාරිතාවක් ලබාගැනීමේ හැකියාව ලැබී තිබේ. මෙම නවෝත්පාදනය කුරුඳු සැකසීමේ ඵලදායීතාව සැලකිය යුතු ලෙස ඉහළ නැංවීමට පමණක් නොව, ක්‍රමයෙන් අඩුවෙමින් පවතින පුහුණු ශ්‍රම බලකාය මත සමාගමට ඇති රඳාපැවැත්ම අවම කිරීමට ද උපකාරී වී ඇත. එය යාන්ත්‍රීකරණය මඟින් ශ්‍රම හිඟයට විසඳුම් සොයමින්, සාම්ප්‍රදායික වැවිලි කර්මාන්තය නවීන තාක්ෂණය සමඟ සම්බන්ධ කළ හැකි ආකාරය පෙන්වන ප්‍රායෝගික නිදසුනක් බවට ද පත්ව තිබේ. විදේශ ශ්‍රමිකයන් ආනයනය කිරීමට නොහැකි ශ්‍රී ලංකාව වැනි රටක, මෙවැනි තාක්ෂණික විසඳුම් දේශීයවම සංවර්ධනය කර ගැනීමට ඇති හැකියාව සුවිශේෂී ජයග්‍රහණයකි. එය වැවිලි කර්මාන්තයේ සාම්ප්‍රදායික සීමාවන්ට ඔබ්බෙන් සිතමින්, පවතින ගැටලු සඳහා ආයතනය තුළින්ම ප්‍රායෝගික හා නව්‍ය විසඳුම් සොයාගන්නා සංස්කෘතියක් මල්වත්ත වැලි සමාගම තුළ ගොඩනැඟී ඇති බව පෙන්වා දෙයි. වෙනස් පරිමාණයකින් වගාවට නව අර්ථයක් මල්වත්ත වැලි සමාගමේ වගා ක්‍රමවේද තුළ ද පෙර සඳහන් කළ නවෝත්පාදන චින්තනය පැහැදිලිව දැකගත හැකිය. ශ්‍රී ලංකාවේ සාමාන්‍ය තේ වගාවක හෙක්ටයාරයකට තේ පුෂ්ප පරාගනය හරහා නිපදවන VP තේ පැළ 8,000ත් 13,500ත් අතර ප්‍රමාණයක් සිටුවීම සම්මත ක්‍රමය වේ. එහෙත් මල්වත්ත වැලි සමාගම තෝරාගත් පහතරට වතුවල හෙක්ටයාරයකට VP තේ පැළ 40,000ක් දක්වා ඉහළ ඝනත්වයකින් වගා කිරීම ආරම්භ කර තිබේ. ජාත්‍යන්තර වගා ක්ෂේත්‍රයේ පිළිගත් ක්‍රමවේද දේශීය පස, කාලගුණය සහ වගා තත්ත්වයන්ට අනුව සකස් කරමින් මෙම නව ක්‍රමය ක්‍රියාත්මක කෙරේ. සාම්ප්‍රදායික වගා පද්ධති සමඟ සැසඳීමේදී, මෙම අධි-ඝනත්ව වගාව යටතේ තේ පඳුරු සැලකිය යුතු ලෙස කෙටි කාලයකින් අස්වනු ලබාගත හැකි පරිණත මට්ටමට පැමිණෙන බව දැනටමත් නිරීක්ෂණය කර ඇත. අලිගැටපේර වගාවේදී ද සමාගම සාමාන්‍ය කර්මාන්ත ප්‍රමිතීන් ඉක්මවා ගොස් තිබේ. සාමාන්‍යයෙන් හෙක්ටයාරයකට අලිගැටපේර ගස් 200ක් පමණ වගා කෙරෙන නමුත්, මල්වත්ත වැලි සමාගම හෙක්ටයාරයකට ගස් 800ක් පමණ සිටුවා ඇති අතර, එම සංඛ්‍යාව 1,000 ඉක්මවා වැඩි කිරීමේ හැකියාව ද අත්හදා බලමින් සිටී. ගස්වල ශාඛා හා පත්‍ර ව්‍යුහය කළමනාකරණය කිරීම සහ අස්වනු නෙළීම පහසු කිරීම සඳහා මිදි වගාවල භාවිත වන ආධාරක රාමු ක්‍රම ද අත්හදා බැලෙමින් පවතී. මෙවැනි මහා පරිමාණ වාණිජ අලිගැටපේර වගාවකට යොමු වූ ශ්‍රී ලංකාවේ මුල්ම වැවිලි සමාගම් අතර මල්වත්ත වැලි සමාගම ද සිටී. එමඟින් දේශීය හා අපනයන වෙළෙඳපොළ සඳහා ඉහළ අගය එකතු කළ නිෂ්පාදන රැසක් සංවර්ධනය කළ හැකි නව කෘෂි ව්‍යාපාරික අවස්ථාවක් විවෘත වෙමින් පවතී. යාන්ත්‍රික තේ දලු නෙළීම ද මේ වනවිට සමාගම සංවර්ධනය කරමින් සිටින තවත් නවෝත්පාදන වැඩසටහනකි. එහිදී තාක්ෂණික අභියෝග කිහිපයක් තවමත් පවතී. විශේෂයෙන් ඩ්‍රෝන යානා මඟින් අස්වනු නෙළීමට සුදුසු දලු හඳුනාගැනීමේදී, ඩ්‍රෝන යානයේ අවර පෙති මඟින් ඇතිවන වායු ප්‍රවාහය නිසා කැමරා දර්ශන බාධාවට ලක්වීම ප්‍රධාන ගැටලුවක් වී තිබේ. එහෙත් එවැනි අභියෝග හමුවේ ද පර්යේෂණ නවතා නොමැති සමාගම, සිය යාන්ත්‍රික දළු නෙළීමේ විසඳුම් අඛණ්ඩව වැඩිදියුණු කරමින් සිටී. එය සමාගමේ සමස්ත මෙහෙයුම් පද්ධතිය තුළ අතින් සිදුකරන කාර්යයන් සහ සාම්ප්‍රදායික ශ්‍රමය මත ඇති රඳාපැවැත්ම ක්‍රමානුකූලව අඩු කිරීම සඳහා අනුගමනය කරන පුළුල් තාක්ෂණික පරිවර්තනයේ තවත් වැදගත් පියවරකි. වගා බිමෙන් අවසන් නිෂ්පාදනය දක්වා වන නවීකරණය මල්වත්ත වැලි සමාගමේ නවීකරණ වැඩපිළිවෙළ වගා බිමට පමණක් සීමා වී නොමැත. එහි තේ කර්මාන්තශාලා තුළ අමු තේ දළු ගෙනයන යාන්ත්‍රික බෙල්ට් පද්ධති, තේ දළු එහා මෙහා පෙරලීමේ අංශ සහ තේ වර්ගීකරණ ක්‍රියාවලිය ස්වයංක්‍රීයකරණය කිරීම සඳහා සමාගම සැලකිය යුතු ආයෝජන සිදුකර තිබේ. මේ වනවිට එහි ප්‍රධාන අවධානය යොමුවී ඇත්තේ තේ නිෂ්පාදනයේ වැදගත්ම අදියරක් වන තේ දළුවල තෙතමනය ඉවත් කිරීමේ ක්‍රියාවලිය ද නවීන තාක්ෂණය ඔස්සේ වැඩිදියුණු කිරීම කෙරෙහිය. ඒ සමඟම, සමාගමේ තේ නිෂ්පාදන කටයුතු ස්වයංක්‍රීයකරණය කේන්ද්‍ර කරගත් තෝරාගත් කර්මාන්තශාලා කිහිපයකට ඒකාබද්ධ කර තිබේ. සාම්ප්‍රදායික කර්මාන්තශාලාවලට වඩා අඩු ශ්‍රම බලකායකින්, ඉහළ කාර්යක්ෂමතාවකින් සහ වඩාත් ස්ථාවර ගුණාත්මකභාවයකින් නිෂ්පාදන කටයුතු පවත්වාගෙන යාමට හැකිවන අයුරින් මෙම කර්මාන්තශාලා සැලසුම් කර ඇත. මෙහෙයුම් කාර්යක්ෂමතාව ඉහළ නැංවීමේ මෙම උත්සාහයට සමගාමීව, සමාගම නව ජාත්‍යන්තර වෙළෙඳපොළ වෙත පිවිසීම සඳහා ද සැලසුම් සහගත පියවර ගනිමින් සිටී. ඒ අනුව ශ්‍රී ලංකාවේ පළමු මැචා හරිත තේ නිෂ්පාදන කර්මාන්තශාලාව ලෙස සැලකෙන පහසුකමක් ස්ථාපිත කිරීමට මල්වත්ත වැලි සමාගම කටයුතු කරමින් සිටී. ශ්‍රී ලංකා තේ මණ්ඩලයේ අනුමැතිය සහිත මෙම කර්මාන්තශාලාව ජපාන යන්ත්‍රෝපකරණ සහ එරට තාක්ෂණික විශේෂඥ දැනුමෙන් සමන්විත වේ. මැචා තේ සමඟ උසස් තත්ත්වයේ හරිත තේ නිෂ්පාදනය කිරීමට ද සැලසුම් කර ඇති අතර, එමඟින් ශ්‍රී ලංකාව මෙතෙක් සීමිත වශයෙන් නියෝජනය කළ වේගයෙන් වර්ධනය වන ඉහළ වටිනාකමක් සහිත ජාත්‍යන්තර වෙළෙඳපොළ කොටස් වෙත පිවිසීමට මල්වත්ත වැලි සමාගමට අවස්ථාව උදාවනු ඇත. කෙසේ වෙතත්, සමාගමේ වටිනාකම් එකතු කිරීමේ අරමුණු තේ නිෂ්පාදනයෙන් ඔබ්බට ද විහිදී තිබේ. තේ සහ අනෙකුත් ස්වභාවික සාරයන් ප්‍රධාන අමුද්‍රව්‍ය ලෙස යොදා සකස් කරන මුහුණු, ශරීර සහ හිසකෙස් සත්කාර නිෂ්පාදන රැසකින් සමන්විත රූපලාවණ්‍ය නිෂ්පාදන පෙළක් ද සමාගම විසින් වෙළෙඳපොළට හඳුන්වා දී තිබේ. මේ වනවිට එම නිෂ්පාදන ජාත්‍යන්තර වෙළෙඳපොළ වෙත අපනයනය කෙරෙන අතර, විශේෂයෙන් ජර්මනියේ තමන්ටම හිමි වෙළෙඳපොළක් ගොඩනඟා ගැනීමට ද සමත්ව තිබේ. මෙය සාම්ප්‍රදායික වැවිලි සමාගමක සීමාවන් ඉක්මවා, පර්යේෂණ, තාක්ෂණය, නිෂ්පාදන විවිධාංගීකරණය සහ අගය එකතු කිරීම මත පදනම් වූ නවීන කෘෂි ව්‍යාපාරික ආයතනයක් බවට මල්වත්ත වැලි පරිවර්තනය වී ඇති ආකාරය පැහැදිලිව පෙන්වා දෙයි. මෙම සියලු පරිවර්තන එකට බැඳ තබන්නේ, දිගුකාලීන අරමුණු මත ගොඩනඟා ඇති ශක්තිමත් මෙහෙයුම් පදනමකි. සමාගමේ කර්මාන්තශාලා පුනර්ජනනීය බලශක්තියෙන් ක්‍රියාත්මක වන අතර, තමන්ගේම ගබඩා පහසුකම් ද මල්වත්ත වැලි සමාගම සතුය. එමෙන්ම වගා බිමේ සිට අවසන් නිෂ්පාදනය දක්වා සෑම මෙහෙයුම් අදියරකම නිෂ්පාදන මූලාශ්‍රය හඳුනාගත හැකි පසුවිපරම් පද්ධතියක් පවත්වාගෙන යනු ලැබේ. ජාත්‍යන්තර ගැනුම්කරුවන් අද සැපයුම් දාමයේ විනිවිදභාවය සම්බන්ධයෙන් අපේක්ෂා කරන ඉහළම ප්‍රමිතීන් සපුරාලීමට එමගින් සමාගමට හැකිව තිබේ. මල්වත්ත වැලි සමාගම සිය වගා බිම්, කර්මාන්තශාලා සහ විවිධ නිෂ්පාදන පෙළ හරහා ශ්‍රී ලංකාවේ වැවිලි කර්මාන්තයට දිගු කලක් තිස්සේ අවශ්‍යව තිබූ ප්‍රායෝගික ආදර්ශයක් ගොඩ නගමින් සිටී. නිශ්චිත අරමුණක් සහ අඛණ්ඩ කැපවීමක් සමඟ තාක්ෂණය හා නවෝත්පාදනය යොදාගත් විට, වැවිලි කෘෂිකර්මාන්තයේ ඵලදායීතාව, ගුණාත්මකභාවය සහ වෙළෙඳපොළ වටිනාකම කෙතරම් දුරට ඉහළ නැංවිය හැකිද යන්න එම ආදර්ශය පෙන්වා දෙයි. අධි ඝනත්ව වගාව, අඛණ්ඩ යළි වගා කිරීම් සහ වඩාත් ගැඹුරු අගය එකතු කිරීම කේන්ද්‍ර කරගත් 2030 මාර්ග සිතියමක් යටතේ සමාගම සිය ඉදිරි ගමන සැලසුම් කර තිබේ. එමඟින් ශ්‍රී ලංකාවේ වැවිලි කෘෂිකර්මාන්තය අතීත ක්‍රමවේද තුළම සිරවී නොසිට, වෙනස්වන දේශගුණික, ශ්‍රම හා ගෝලීය වෙළෙඳපොළ තත්ත්වයන්ට අනුව පරිවර්තනනය වෙමින් පවතින බව මල්වත්ත වැලි සමාගම ප්‍රායෝගිකව පෙන්වා දෙයි. මල්වත්ත වැලි සමාගමේ මෙම ගමන, අභියෝග හමුවේ පසුබැසීම වෙනුවට තාක්ෂණය, දේශීය ඉංජිනේරු දැනුම, වගා විවිධාංගීකරණය සහ අගය එකතු කිරීම හරහා නව අවස්ථා නිර්මාණය කළ හැකි බවට ප්‍රබල සාක්ෂියකි. එහි ප්‍රගතිශීලී දැක්ම සහ නවෝත්පාදන හැකියාව, අනාගතයේදී සමස්ත වැවිලි කර්මාන්තයේ ගමන්මඟටම නව වේගයක් හා දිශාවක් ලබාදිය හැකි ආදර්ශයක් බවට පත්වෙමින් තිබේ.

The post ඕනෑම අභියෝගයකට ඔරොත්තු දෙමින් තාක්ෂණය හා නවෝත්පාදනයෙන් වැවිලි ඵලදායීතාව යළි අර්ථකථනය කරන මල්වත්ත වැලි වැවිලි සමාගම appeared first on Adaderana Biz Sinhala | Sri Lanka Business News.

භූ දේශපාලනික අස්ථාවරත්වය හමුවේ සංචිත ගොඩනැගීමේ වැදගත්කම මහ බැංකු අධිපතිවරයා අවධාරණය කරයි

Biz Editor — Fri, 11 Sep 2026 08:49:30 +0000

ගෝලීය භූ දේශපාලනික අවිනිශ්චිතතාවයන් හමුවේ විදේශ විනිමය සංචිත ප්‍රමාණවත් ලෙස පවත්වා ගැනීම සහ ද්‍රවශීලතාව තහවුරු කිරීම මහ බැංකුවල මූලික වගකීම වන බව ශ්‍රී ලංකා මහ බැංකු අධිපති ආචාර්ය නන්දලාල් වීරසිංහ මහතා පවසයි. ඊයේ (10) කොළඹ දී පැවැති 2026 සංචිත කළමනාකරණ සමුළුවේ (Reserve Management Conference 2026) සමාරම්භක දේශනය පවත්වමින් මහ බැංකු අධිපතිවරයා මේ බව කියා සිටියේය. 2022 වසරේ දී ශ්‍රී ලංකාව මුහුණ දුන් ආර්ථික අර්බුදයේ දී විදේශ සංචිත දැඩි ලෙස අඩුවීම හේතුවෙන් අත්‍යවශ්‍ය ආනයන සීමා වීම, ණය සේවාකරණය අපහසු වීම සහ විදේශ විනිමය අනුපාත මත දැඩි පීඩනයක් එල්ල වීම වැනි බරපතල ප්‍රතිවිපාකවලට මුහුණ දීමට සිදු වූ බව ඔහු පෙන්වා දුන්නේය. එබැවින් ආර්ථික වශයෙන් යහපත් කාලපරිච්ඡේදයන්හිදී මූල්‍ය ස්වාරක්ෂක (buffers) ගොඩනැගීම අත්‍යවශ්‍ය වන බවත්, සංචිත කළමනාකරණයේදී හුදෙක් ආයෝජන ලාභ ලැබීමට වඩා සංචිතවල සුරක්ෂිතතාව සහ ද්‍රවශීලතාව කෙරෙහි මූලිකත්වය දිය යුතු බවත් ඒ මහතා අවධාරණය කළේය. එමෙන්ම ආනයන මාස ගණන වැනි තනි සාම්ප්‍රදායික දර්ශක මත පමණක් පදනම් නොවී, ගෝලීය වෙළඳ බලපෑම්, බලශක්ති මිල වෙනස්වීම් සහ දේශගුණික විපත් වැනි සංකීර්ණ අවදානම් කළමනාකරණය කළ හැකි පුළුල් අවදානම් කළමනාකරණ රාමුවක් මහ බැංකු විසින් අනුගමනය කළ යුතු බවද මහ බැංකු අධිපතිවරයා වැඩිදුරටත් මෙහිදී පෙන්වා දුන්නේය.

The post භූ දේශපාලනික අස්ථාවරත්වය හමුවේ සංචිත ගොඩනැගීමේ වැදගත්කම මහ බැංකු අධිපතිවරයා අවධාරණය කරයි appeared first on Adaderana Biz Sinhala | Sri Lanka Business News.

Surrey – IIHS හවුල්කාරිත්වයෙන් ජාත්‍යන්තර මට්ටමේ බ්‍රිතාන්‍ය උසස් අධ්‍යාපනයට නව මං පෙත්

Bizweb2 Bizweb2 — Fri, 11 Sep 2026 08:34:24 +0000

ශ්‍රී ලාංකික සිසුන්ට සහ වෘත්තිකයන්ට ජාත්‍යන්තරව පිළිගත් බ්‍රිතාන්‍ය උසස් අධ්‍යාපනය සඳහා වැඩි ප්‍රවේශයක් දෙමින් එක්සත් රාජධානියේ University of Surrey සහ ශ්‍රී ලංකාවේ IIHS Multiversity අතර අධ්‍යයන හවුල්කාරිත්වය යටතේ නව අධ්‍යාපන මං පෙත් පුළුල් කර තිබේ. University of Surrey සතු ජාත්‍යන්තර අධ්‍යයන හා පර්යේෂණ විශේෂඥතාව IIHS Multiversity සතු වසර 25කට අධික සෞඛ්‍ය අධ්‍යාපන, වෘත්තීය පුහුණු සහ ජාත්‍යන්තර හවුල්කාරිත්ව අත්දැකීම් සමඟ ඒකාබද්ධ කිරීම මෙම සහයෝගීතාවේ විශේෂත්වයකි. මෙම වැඩපිළිවෙළ ශ්‍රී ලාංකික සිසුන්ට සහ වෘත්තිකයන්ට පමණක් නොව සිය රටවලට සමීපව අධ්‍යාපනය ලබමින් ජාත්‍යන්තර වශයෙන් අදාළ සුදුසුකම් ලැබීමට අපේක්ෂා කරන දකුණු ආසියානු සිසුන්ට සහ වෘත්තිකයන්ට නව අවස්ථා නිර්මාණය කරයි. ගෝලීය සෞඛ්‍ය ක්ෂේත්‍රයේ වෙනස් වන අවශ්‍යතා සැලකිල්ලට ගනිමින් IIHS සිය අධ්‍යයන සංවර්ධනය ප්‍රධාන ක්ෂේත්‍ර හතරක් ඔස්සේ ගොඩ නඟා ඇත. ඒ Clinical Sciences, Health Management Sciences, Lifestyle, Nutrition & Sport Sciences සහ Digital Health Sciences යන ක්ෂේත්‍රය. Clinical Sciences ක්ෂේත්‍රයට හෙද සේවය, ජෛව වෛද්‍ය විද්‍යාව, ඖෂධවේදය, රසායනාගාර විද්‍යාව, වෛද්‍ය විද්‍යාව, දෘෂ්ටි විද්‍යාව, විකිරණවේදය සහ වෛද්‍ය රූපකරණය, මනෝ විද්‍යාව, භෞත චිකිත්සාව සහ පුනරුත්ථාපනය ඇතුළත් වේ. QA ශේණිගත කිරීම් අනුව 262 ස්ථානයේ සිටින ලොව ප්‍රමුඛ විශ්ව විද්‍යාලයක් වන University of Surrey සමඟ සම්බන්ධ අධ්‍යයන මං පෙත් අතර BSc (Hons) Nursing Studies, MSc Nursing සහ BSc (Hons) Biomedical Sciences ඇතුළත් වන අතර සිසුන්ට මෙන්ම දැනටමත් සෞඛ්‍ය ක්ෂේත්‍රයේ සේවය කරන වෘත්තිකයන්ට ඉදිරි අධ්‍යාපන අවස්ථා සළසා දෙයි. Health Management Sciences ක්ෂේත්‍රය වඩාත් සංකීර්ණ වෙමින් පවතින සෞඛ්‍ය ආයතන සහ පද්ධති මෙහෙයවීමට අවශ්‍ය අනාගත නායකයන් බිහි කිරීම කෙරෙහි අවධානය යොමු කරයි. Global Health Management, Public Health, Healthcare Administration, Leadership, Health Policy, Quality and Patient Safety සහ Aged and Social Care Management වැනි විෂය ක්ෂේත්‍ර ඊට ඇතුළත් වේ. රෝහල්, රාජ්‍ය ආයතන, පෞද්ගලික සෞඛ්‍ය සේවා ආයතන සහ ජාත්‍යන්තර සංවිධාන සඳහා සෞඛ්‍ය ක්ෂේත්‍රයේ දැනුම සමඟ නායකත්ව සහ කළමනාකරණ හැකියා ඒකාබද්ධ කළ හැකි වෘත්තිකයන්ගේ අවශ්‍යතාව ඉහළ යමින් පවතින පසුබිමක මෙම විෂය ක්ෂේත්‍රවල වැදගත්කම වැඩි වෙමින් පවතී. Lifestyle, Nutrition & Sport Sciences ක්ෂේත්‍ර සෞඛ්‍ය සේවාවේ සිදු වන තවත් ප්‍රධාන පරිවර්තනයක් වන රෝගවලට ප්‍රතිකාර කිරීමේ සිට ඒවා වැළැක්වීම කෙරෙහි වැඩි අවධානයක් යොමු කරයි. දියවැඩියාව, හෘද හා රුධිර වාහිනී රෝග, ස්ථූලතාව සහ අනෙකුත් ජීවන රටාව ආශ්‍රිත රෝග සෞඛ්‍ය පද්ධති මත වැඩි පීඩනයක් ඇති කරන පසුබිමක පෝෂණය, ශාරීරික ක්‍රියාකාරකම්, චර්යාත්මක වෙනස්කම් සහ රෝග නිවාරණ සෞඛ්‍යය කෙරෙහි වැඩි අවධානයක් යොමු වෙමින් පවතී. මෙම ක්ෂේත්‍රයේ ප්‍රධාන පශ්චාත් උපාධි අධ්‍යයන මං පෙත් අතර MSc Lifestyle Medicine, MSc Nutritional Medicine සහ MSc Sport & Exercise Science ඇතුළත් වේ. රෝග නිවාරණ සෞඛ්‍ය සේවා, සුවතා ක්ෂේත්‍රය, පුනරුත්ථාපනය සහ මානව කාර්යසාධනය පිළිබඳ උනන්දුවක් දක්වන වෘත්තිකයන්ට මෙම වැඩසටහන් වැදගත් අවස්ථා සළසයි. සිව් වන ක්ෂේත්‍රය වන Digital Health Sciences කෘත්‍රිම බුද්ධිය, ඉලෙක්ට්‍රොනික සෞඛ්‍ය වාර්තා, දුරස්ථ වෛද්‍ය සේවා, සෞඛ්‍ය තොරතුරු විද්‍යාව සහ සෞඛ්‍ය දත්ත භාවිතයේ ශීඝ්‍ර වර්ධනයට ප්‍රතිචාර දක්වයි. MSc Digital Health වැඩසටහන සෞඛ්‍ය සහ තාක්ෂණ ක්ෂේත්‍ර එකිනෙක හමු වන නව වෘත්තීය අවස්ථා සඳහා අවශ්‍ය දැනුම හා හැකියා වර්ධනය කිරීමට සැළැසුම් කර ඇති අතර වෛද්‍යවරුන්, හෙද වෘත්තිකයන්, අනුබද්ධ සෞඛ්‍ය වෘත්තිකයන්, පරිපාලකයන්, මහජන සෞඛ්‍ය වෘත්තිකයන්, ඉංජිනේරුවන් සහ තොරතුරු තාක්ෂණ වෘත්තිකයන් සඳහා අදාළ වේ. මෙම වැඩපිළිවෙළ පිළිබඳ අදහස් දක්වමින් IIHS Multiversity සම-නිර්මාතෘ සහ ප්‍රධාන විධායක නිලධාරී වෛද්‍ය කිත්සිරි එදිරිසිංහ මහතා පැවසුවේ මෙම හවුල්කාරිත්වය ශ්‍රී ලංකාවට වැදගත් අවස්ථාවක් උදා කරන බවයි. “මෙම හවුල්කාරිත්වය තුළින් අපගේ තරුණ තරුණියන්ට සහ වෘත්තිකයන්ට ජාත්‍යන්තර මට්ටමේ බ්‍රිතාන්‍ය උසස් අධ්‍යාපනය සිය රටට සමීපව ලැබීමට අවස්ථාව හිමි වෙනවා. එයටත් වඩා වැදගත් වන්නේ ගෝලීය වශයෙන් අදාළ සෞඛ්‍ය අධ්‍යාපනය ලබා ජාත්‍යන්තර වෘත්තීය මං පෙත් ගොඩ නඟා ගැනීමට අපේක්ෂා කරන දකුණු ආසියානු සිසුන් සඳහා ශ්‍රී ලංකාව ප්‍රවේශ දොරටුවක් බවට පත් කිරීමේ හැකියාවයි.” ඔහු පැවසීය. මෙම සහයෝගීතාව පුළුල් ජාතික අවස්ථාවක කොටසක් ලෙස IIHS දකින බව වෛද්‍ය එදිරිසිංහ මහතා සඳහන් කළේය. “අපගේ අරමුණ ජාත්‍යන්තර උපාධි පිරිනැමීමට පමණක් සීමා වන්නේ නැහැ. ශ්‍රී ලාංකික දක්ෂතා ගෝලීය දැනුම, වෘත්තීය සංවර්ධනය, පර්යේෂණ, නවෝත්පාදන සහ රැකියා අවස්ථා සමඟ සම්බන්ධ කරන අධ්‍යාපන පරිසර පද්ධතියක් නිර්මාණය කිරීම අපගේ අභිලාෂයයි.” ඔහු වැඩි දුරටත් පැවසීය. University of Surrey සතු ජාත්‍යන්තර අධ්‍යයන විශේෂඥතාව සහ IIHS සතු දේශීය අත්දැකීම් හා සෞඛ්‍ය අධ්‍යාපන කේන්ද්‍රීය ප්‍රවේශය ඒකාබද්ධ කිරීම තුළින් පාසල් අධ්‍යාපනය අවසන් කළ තරුණ තරුණියන්, උපාධිධාරීන් සහ පළපුරුදු වෘත්තිකයන් ඇතුළු විවිධ වෘත්තීය අදියරවල සිටින පිරිස් සඳහා අධ්‍යාපන මං පෙත් නිර්මාණය කිරීමට මෙම හවුල්කාරිත්වය අපේක්ෂා කරයි. එමෙන්ම සෞඛ්‍ය අධ්‍යාපනය, පර්යේෂණ, වෘත්තීය සංවර්ධනය සහ නවෝත්පාදනය සඳහා ශ්‍රී ලංකාව දකුණු ආසියාවේ ප්‍රමුඛ කළාපීය අධ්‍යාපන මධ්‍යස්ථානයක් බවට පත් කිරීමේ දිගු කාලීන අරමුණට මෙම හවුල්කාරිත්වය සහාය වනු ඇත.

The post Surrey – IIHS හවුල්කාරිත්වයෙන් ජාත්‍යන්තර මට්ටමේ බ්‍රිතාන්‍ය උසස් අධ්‍යාපනයට නව මං පෙත් appeared first on Adaderana Biz Sinhala | Sri Lanka Business News.

12 වැනි සංවත්සරය සමරමින් Treinetic මාලඹේදී The Legends Lounge විවෘත කරයි

Bizweb2 Bizweb2 — Fri, 11 Sep 2026 08:28:15 +0000

ශ්‍රී ලංකාවේ ප්‍රමුඛ පෙළේ මෘදුකාංග නිෂ්පාදන ඉංජිනේරු සමාගමක් වන Treinetic පෞද්ගලික සමාගම සිය 12 වැනි සංවත්සරයට සමගාමීව The Legends Lounge පසුගිය 9 වැනිදා මාලඹේදී විවෘත කළේය. මෙම විවෘත කිරීම Treinetic සමාගම තාක්ෂණ ක්ෂේත්‍රයෙන් ඔබ්බට සිය ව්‍යාපාර මෙහෙයුම් පුළුල් කිරීමේ වැදගත් පියවරක් සනිටුහන් කළේය. ආහාර, කෝපි, සුවතාව, වැඩ කටයුතු සහ විවේකය එකම ස්ථානයක ඒකාබද්ධ කරමින් The Legends Lounge නිර්මාණය කර තිබේ. ගුණාත්මක අමුද්‍රව්‍ය යොදා සකස් කරන ආහාර පාන වර්ග, සෞඛ්‍යය පිළිබඳ සැළැකිලිමත් වන පාරිභෝගිකයන් සඳහා වූ විකල්ප සහ සුවිශේෂ පාන වර්ග මෙහි පිරිනැමේ. වැඩ කිරීමට, අධ්‍යයන කටයුතුවල නිරත වීමට, සමාජශීලීව කාලය ගත කිරීමට හෝ විවේක ගැනීමට සුදුසු සුව පහසු පරිසරයක් එහි සළසා ඇත. විවෘත කිරීමේ අවස්ථාවට එක්වෙමින් Treinetic නිර්මාතෘ සහ ප්‍රධාන විධායක නිලධාරී ඉමාල් හසරංග පෙරේරා මහතා පැවසුවේ, “සෞඛ්‍යය පිළිබඳ සැළැකිලිමත් වන පාරිභෝගිකයන්ට ගුණාත්මක අමුද්‍රව්‍යවලින් සකස් කළ ආහාර විශ්වාසයෙන් යුතුව භුක්ති විඳිය හැකි ස්ථානයක් පිළිබඳ පෞද්ගලික අවශ්‍යතාවකින් මෙම අදහස බිහි වුණා. පාරිභෝගිකයන්ට විශ්වාසයෙන් භුක්ති විඳිය හැකි ආහාර සහ පාන වර්ග පිරිනමමින් ඔවුන් නැවත පැමිණීමට කැමැත්තක් ඇති කරන අත්දැකීමක් නිර්මාණය කිරීම අපගේ අරමුණයි.” යනුවෙනි. මෘදුකාංග නිෂ්පාදන ඉංජිනේරු ක්ෂේත්‍රයේ වසර 12ක වර්ධන ගමන සමරන Treinetic සමාගමේ නවෝත්පාදන සහ අත්හදා බැලීම් කේන්ද්‍ර කර ගත් ව්‍යාපාර සංස්කෘතිය මෙම නව ව්‍යාපෘතිය මඟින් පිළිබිඹු වේ. The Legends Lounge හරහා සමාගම සිය ව්‍යාපාර ගමනේ නව පරිච්ඡේදයක් ආරම්භ කර තිබේ.

The post 12 වැනි සංවත්සරය සමරමින් Treinetic මාලඹේදී The Legends Lounge විවෘත කරයි appeared first on Adaderana Biz Sinhala | Sri Lanka Business News.

ISC Education විසින් 5වන වාර්ෂික බෙලරුසියානු සුහද හමුව වෛද්‍යවරුන්, වෛද්‍ය සිසුන් සහ පවුල්වල සාමාජිකයන් සමගින් සාර්ථකව සමරයි

Bizweb2 Bizweb2 — Fri, 11 Sep 2026 08:04:40 +0000

ISC Education අධ්‍යාපන ආයතනය යනු හුදෙක් විශ්වවිද්‍යාලයකට ප්‍රවේශය ලබා ගැනීම සඳහා පමණක් සීමාවූ වූ ජාත්‍යන්තර අධ්‍යාපන ආයතනයක් නොවේ. එය, විදේශ අධ්‍යාපනය පිළිබඳව කෙරෙන පළමු උපදේශනයේ සිට විශ්වවිද්‍යාල ප්‍රවේශය, විදේශගත වීම, විදේශීය අධ්‍යයන ජීවිතය සහ ඉන් ඔබ්බට ගතවන වසර කිහිපය දක්වා ශිෂ්‍යයාගේ සමස්ත අධ්‍යාපනික ගමන් මග සඳහා වගකීමෙන් යුතුව මඟපෙන්වමින් සහාය ලබාදීමට කැපවීමෙන් කටයුතු කරන උසස් අධ්‍යාපන ආයතනයකි. ජාත්‍යන්තර අධ්‍යාපන හා විශ්වවිද්‍යාල ප්‍රවේශය සඳහා පහසුකම් සපයන සේවා ආයතනයක් ලෙස ISC Education, ශ්‍රී ලාංකික සිසුන්ට සුදුසු ජාත්‍යන්තර අධ්‍යාපන අවස්ථා වෙත ප්‍රවේශ වීමට පහසුකම් සැලසීම සඳහා විදේශීය විශ්වවිද්‍යාල සහ අධ්‍යාපන ආයතන සමගින් සෘජුව කටයුතු කරයි. විශ්වවිද්‍යාල නියෝජනය සහ ශිෂ්‍ය ලියාපදිංචි කටයුතු සමඟින්, උපදේශන සේවා, අධ්‍යයන පාඨමාලා හා විශ්වවිද්‍යාල තෝරාගැනීම, අයදුම්පත් සැකසීම, විශ්වවිද්‍යාල ප්‍රවේශ සම්බන්ධීකරණය, වීසා උපදේශනය, විදේශගත වීමට පෙර සූදානම් කිරීම සහ ශිෂ්‍ය ප්‍රවේශ කටයුතු ඇතුළුව, අධ්‍යාපනික ගමනේ ආරම්භයේ සිට අවසානය දක්වා පුළුල් සේවා හා සහාය ලබාදීමේ ආකෘතියක් යටතේ ISC Education සිය සේවාවන් ක්‍රියාත්මක කරයි. වැදගත් කරුණක් වන්නේ, ශිෂ්‍යයන් උසස් අධ්‍යාපනය සඳහා විදේශගත වූ පසු ISC Education සමගින් පවතින සබඳතාව අවසන් නොවීමයි. විදේශගත වීමෙන් අනතුරුව ද, ශිෂ්‍යයන්ට අවශ්‍ය අඛණ්ඩ සහාය ලබාදීම සඳහා ඔවුන් පිළබඳව නැවත සොයා බැලීම, අධ්‍යයන ප්‍රගතිය නිරීක්ෂණය කිරීම, සුබසාධන සහාය, මාර්ගෝපදේශනය සහ ශිෂ්‍යයන් හා ඔවුන්ගේ පවුල් සමග අඛණ්ඩ සබඳතාවය ඇතුළත් සේවා ආකෘතියක් ISC Education විසින් ක්‍රියාත්මක කරනු ලබයි. මෙම දිගුකාලීන සබඳතාව මඟින් ISC Education හට ශිෂ්‍යයාගේ සමස්ත අධ්‍යාපනික ගමන් මග පුරා තවදුරටත් අඛණ්ඩව සම්බන්ධ වෙමින්, එය හුදෙක් විශ්වවිද්‍යාල ප්‍රවේශය හෝ සිසුන් ඇතුළත් කර ගැනීමට පමණක් සීමා වූ සේවාවක් ලෙස නොව, ශිෂ්‍යයාගේ සාර්ථකත්වය සඳහා දිගුකාලීනව කැපවෙන අධ්‍යාපන සහායකයෙකු ලෙස කටයුතු කරයි. මෙම දැක්ම නැවත වරක් පිළිබිඹු වූයේ, අඛණ්ඩව පස්වැනි වරටත් පැවැත්වූ වාර්ෂික බෙලරුසියානු උපාධිධාරීන්ගේ සංගමයේ ක්‍රිකට් තරගය සහ සුහද හමුව අතරතුරදීය. මෙම වාර්ෂික හමුවට වර්තමාන සිසුන්, උපාධිධාරීන්, වෛද්‍ය වෘත්තිකයන්, දෙමාපියන් සහ පවුල්වල සාමාජිකයන් එක්වූ අතර, බෙලරුසියානු රාජ්‍ය වෛද්‍ය විද්‍යාලයේ (Belarusian State Medical University – BSMU) වෛද්‍ය අධ්‍යාපනය හදාරන ශ්‍රී ලාංකික සිසුන් වටා ගොඩනැගී ඇති ශක්තිමත් සබඳතාව ඒ තුළින් ප්‍රදර්ශනය විය. වාර්ෂික ක්‍රිකට් තරගයෙන් දිනය ආරම්භ වූ අතර, එය කිරිමණ්ඩල මාවත ක්‍රීඩාංගණයේදී පැවැත්විණි. එහිදී උපාධිධාරීන් සහ වර්තමාන සිසුන් එක්ව තරගකාරී අයුරින් ක්‍රිකට් තරගයක් පවත්වනු ලැබූ අතර, එය වාර්ෂික වැඩසටහනේ සුවිශේෂී අංගයක් විය. එමෙන්ම මෙම වාර්ෂික හමුව හරහා ශ්‍රී ලංකාවේ BSMU ජාලයේ විවිධ පරම්පරාවන්ට එකිනෙකා මුණගැසිමටත්, සබඳතා වැඩිදියුණු කර ගැනීමට සහ අධ්‍යයන පරිසරයෙන් පරිබාහිරව සබඳතා තවදුරටත් ශක්තිමත් කර ගැනීමට අගනා අවස්ථාවක් සලසා දුනි. ඉන් අනතුරුව කොළඹ, Cinnamon Life හෝටලයේ The Studio පරිශ්‍රයේදී වාර්ෂික හමුවේ සන්ධ්‍යා උත්සවය පැවැත්වුණු අතර, එහිදී සිසුන්, උපාධිධාරීන්, වෛද්‍යවරුන් සහ පවුලේ සාමාජිකයන් එක්ව සිය ඇගයීම් හා සුහද හමුව සමරනු ලැබීය. එහි ප්‍රධාන අංගයක් වූයේ White Coat පැළඳවීමේ උත්සවයයි (White Coat Ceremony). White Coat පැළඳීම, වැදගත් අධ්‍යයන සන්ධිස්ථානයක් සංකේතවත් කරන අතර ඉන් ඔබ්බට අනාගත වෛද්‍ය වෘත්තිකයන්ගෙන් අපේක්ෂා කරන වෘත්තීයභාවය, වගකීම, අවංකභාවය සහ දයානුකම්පාව යන ගුණාත්මක කාරණා ඒ තුළින් විදහා දක්වනු ලබයි. දෙමාපියන් සහ පවුල්වල සාමාජිකයන්ගේ සහභාගීත්වයෙන් මෙම උත්සවය වඩාත් අර්ථවත් අවස්ථාවක් බවට පත්විය. තම දරුවන්ගේ වෛද්‍ය අධ්‍යාපන ගමන් මගේ වැදගත් සන්ධිස්ථානයක් සමග එකතුවීමට දෙමාපියන්ට මෙහිදී අවස්ථාව හිමි වූ අතර, විදේශගතව වෛද්‍ය අධ්‍යාපනය හැදෑරීම යනු සිසුවා පමණක් නොව, සමස්ත පවුලේ කැපවීම සහ සහයෝගය ද ඇතිව ඉදිරියට යන ගමනක් බව මෙහිදී අවධාරණය කෙරිණි. සිසුන් සමග පමණක් නොව, තම දරුවන්ගේ විදේශීය අධ්‍යයන ගමනට සහාය ලබා දීමේ වගකීම ISC Education වෙත භාර දී ඇති දෙමාපියන් සහ පවුල් සමගින්ද ආයතනය අඛණ්ඩ සබඳතාවක් පවත්වාගෙන යන බවට මේ තුළින් පිළිබිඹු විය. සිසුන්ගේ අධ්‍යාපනික ප්‍රගතිය සහ ජයග්‍රහණ සැමරීම සඳහා දෙමාපියන්, මාර්ගෝපදේශකයින් සහ වෛද්‍ය වෘත්තිකයින් ද සිසුන් සමගින් මෙම උත්සවයේදී එක් විය. ශිෂ්‍යත්ව ප්‍රධාන හරහා ද ISC Education ආයතනය විසින් සිය ශිෂ්‍ය සමූහය වෙනුවෙන් අඛණ්ඩව සිදුකරනු ලබන ආයෝජනය තවදුරටත් පෙන්නුම් කළේය. මේ වන විට ශ්‍රී ලාංකික සිසුන් 200කට වැඩි පිරිසක් BSMU හි අධ්‍යාපනය ලබන අතර, ඔවුන්ගෙන් අඩකට වැඩි පිරිසක් 80% ඉක්මවූ අධ්‍යයන සාමාන්‍යයක් පවත්වාගෙන යාම හේතුවෙන්, මෙවර කුසලතා සහ කාර්යසාධන ශිෂ්‍යත්ව සඳහා පැවති තරගකාරීත්වය ඉහළ මට්ටමකට පැමිණ තිබීම විශේෂත්වයක් ද විය. විශිෂ්ට අධ්‍යයන දක්ෂතා දැක්වූ සිසුන්ගෙන් අයදුම්පත් 40ක් ලැබුණු අතර, ඔවුන්ගෙන් බොහෝ දෙනෙකු 9.0ට වැඩි අධ්‍යයන සාමාන්‍යයක් ලබාගෙන තිබිණි. අපේක්ෂකයන් අතර අධ්‍යයන දක්ෂතාවල වෙනස ඉතා අවම මට්ටමක පැවති බැවින්, සම්මාන ප්‍රධානය කිරීමේදී ඔවුන්ගේ අඛණ්ඩ කාර්යසාධනය, වගකීම් නියමිත වේලාවට ඉටු කිරීම, ISC Education සමඟ සක්‍රීය සම්බන්ධතාවය සහ ශිෂ්‍ය ප්‍රජාව වෙනුවෙන් දක්වන දායකත්වය යන කරුණු ද සැලකිල්ලට ගන්නා ලදී. ප්‍රධාන ශිෂ්‍යත්ව ඇගයීම් සම්මාන ප්‍රධාන කිරීමට සමගාමීව, අවසන් වටය සඳහා තෝරාගත් සිසුන් දසදෙනෙකු පදක්කම් සහ ඇගයීම් සහතිකපත් පිරිනමනු ලැබිණි. වාර්ෂික ක්‍රිකට් තරගයෙන් අනතුරුව ද සම්මාන ප්‍රදානයක් පැවැත්වුණු අතර, ශූරයන්, අනුශූරයන්, හොඳම පන්දු යවන්නා, හොඳම පිතිකරු සහ හොඳම තුන් ඉරියව් ක්‍රීඩකයා ඇතුළු ජයග්‍රාහකයන් එහිදී ඇගයීමට ලක් කෙරිණි. සිසුන්ගේ දේශන, විවිධ ප්‍රාසාංගික ඉදිරිපත් කිරීම් සහ කුසපත් ඇදීමේ තරගයක් සමගින් සන්ධ්‍යාවේ පැවති උත්සවය වර්ණවත් අයුරින් අවසන් කරනු ලැබූ අතර, වසර ගණනාවක් පුරා ISC Education විසින් වර්ධනය කර ඇති ශක්තිමත් ප්‍රජා පරිසරය තුළ සිසුන්, උපාධිධාරීන්, වෛද්‍යවරුන් සහ ඔවුන්ගේ පවුල් එකම වේදිකාවක් මත සිය දක්ෂතාවයන් සහ සබඳතාවයන් සමරනු ලැබිණි. ශිෂ්‍යයෙකුට විශ්වවිද්‍යාල ප්‍රවේශය සඳහා ලිපියක් ලැබීමෙන් හෝ විදේශගත වීම සඳහා ගුවන් යානයක් වෙත අසුන් ගැනීමෙන් ජාත්‍යන්තර අධ්‍යාපන ගමන අවසන් වන්නක් නොවන බව, අඛණ්ඩව පස්වැනි වරට පැවැත්වූ වාර්ෂික බෙලරුසියානු සුහද හමුව අවසානයේදී, ISC Education හි සේවාවන් තුළ ඇති පුළුල් දැක්ම තුළින් වැඩිදුරටත් පිළිබිඹු විය. සෘජු විශ්වවිද්‍යාල සබඳතා, සිසුන් ස්ථානගත කිරීම, විශ්වවිද්‍යාල ප්‍රවේශ හා වීසා කටයුතු සම්බන්ධීකරණය, විදේශගත වීමට පෙර සූදානම් කිරීම, විදේශගත වීමෙන් අනතුරුව ලබාදෙන අඛණ්ඩ සහාය, අධ්‍යයන ප්‍රගතිය නිරීක්ෂණය කිරීම, උපදේශන සේවා සහ පවුල් සමගින් පවත්වාගෙන යනු ලබන සබඳතාවයන් ඇතුළු සේවාවන් හරහා ISC Education සිසුන් වෙත ජාත්‍යන්තර අධ්‍යාපන ගමන් මග පුරාවටම අඛණ්ඩ සහාය ලබා දීමට කැපවී සිටියි. එමෙන්ම, සිසුන්, දෙමාපියන්, උපාධිධාරීන් සහ වෘත්තිකයන් අතර සබඳතාවය වැඩිදියුණු කරමින් ශක්තිමත් ප්‍රජාවක් ගොඩනැගීම සඳහා ISC Education අඛණ්ඩව කටයුතු කරයි.

The post ISC Education විසින් 5වන වාර්ෂික බෙලරුසියානු සුහද හමුව වෛද්‍යවරුන්, වෛද්‍ය සිසුන් සහ පවුල්වල සාමාජිකයන් සමගින් සාර්ථකව සමරයි appeared first on Adaderana Biz Sinhala | Sri Lanka Business News.

සෙලින්කෝ ලයිෆ් සිය ප්‍රමුඛතම රක්ෂණ ඔප්පු හිමියන්ට මහනුවර පෙරහරේ අසිරිමත් දසුන් සමීප කරයි

Bizweb2 Bizweb2 — Fri, 11 Sep 2026 07:10:26 +0000

සෙලින්කෝ ලයිෆ් සමාගමේ පාරිභෝගික සබඳතා අංශය විසින් සංවිධානය කරන ලද විශේෂිත නැරඹුම් මැදිරියකදී තෝරාගත් ප්‍රමුඛ පෙළේ රක්ෂණ ඔප්පු හිමියන් පිරිසකට තම පවුලේ සාමාජිකයින් ද සමඟින් එක් සන්ධ්‍යාවක් පුරාවට ම මහනුවර ඇසළ පෙරහැරේ අසිරිමත් දසුන් ඉතා සමීපව නැරඹීමේ අවස්ථාව හිමි විය. රජ වීදියේ පිහිටි සෙලින්කෝ ලයිෆ් මහනුවර ශාඛාවෙහි දී වාර්ෂිකව සංවිධානය කරනු ලබන මෙම අවස්ථාව, මෙවර දෙවන රන්දෝලි පෙරහැරට සමගාමීව පැවැත්විණි. එමඟින් ආරාධිත අමුත්තන්ට ශ්‍රී ලංකාවේ සංස්කෘතිය, සම්ප්‍රදාය සහ පෙරහැර කලාවේ වඩාත්ම අසිරිමත් ප්‍රකාශනයක් වන මහනුවර ඇසළ පෙරහැරේ අසිරිමත් බව ඉතා සමීපව අත්විඳීමට අවස්ථාව සැලසිණි. මහනුවර වීදි හරහා මහ පෙරහැර ගමන් කරන විට උත්සවයේ අමුත්තන්ට ප්‍රමුඛ නැරඹුම් මැදිරියක VIP අසුන්වල සිට පෙරහැරේ චමත්කාරය හා උත්කර්ෂවත් බව සමීපව අත්විඳීමට හැකි විය. සෙලින්කෝ ලයිෆ් සිය ප්‍රමුඛ පෙලේ රක්ෂණ ඔප්පු හිමියන් සමඟ පැවති ශක්තිමත් සබඳතාවය සැමරීමට මෙම සන්ධ්‍යාව ඉතාමත් සුදුසු පසුබිමක් විය. මෙම අත්දැකීම පෙරහැර දර්ශනයෙන් ද ඔබ්බට ගෙන යමින් අමායා හිල්ස් නිවාඩු නිකේතනය හරහා පිළිගැන්වූ සන්ධ්‍යා භෝජන සංග්‍රහයක් සහ සුවිශේෂී රාත්‍රී භෝජන සංග්‍රහයකින් අමුත්තන් පිළිගනු ලැබූයේ සන්ධ්‍යාවේ පෙරහර චමත්කාරයට උසස් ගණයේ භෝජන සංග්‍රහයක අත්දැකීම ද ලබා දෙමිනි. පවුලේ සාමාජිකයින්ට විශේෂ අවධානයක් ලබා දෙමින් මෙහිදී සිනමා අත්දැකීමක් හරහා ළමයින්ට මෙන් ම වැඩිහිටියන්ට ද එක ලෙස විනෝද වීමට අවස්ථාව ලැබුණි. තවද ශ්‍රී ලංකාවේ අතිශය අගනා සංස්කෘතික සම්ප්‍රදායක අසිරිය විඳිමින් ගෙවුන එම සන්ධ්‍යාවේ විශේෂ සිහිවටනයක් ලෙස ඊට සහභාගී වූ සෑම පවුලකට ම රාමු කරන ලද අලංකාර පවුලේ ඡායාරූපයක් ද පිරිනමන ලදී.

The post සෙලින්කෝ ලයිෆ් සිය ප්‍රමුඛතම රක්ෂණ ඔප්පු හිමියන්ට මහනුවර පෙරහරේ අසිරිමත් දසුන් සමීප කරයි appeared first on Adaderana Biz Sinhala | Sri Lanka Business News.

‘Living Sculpture’ තේමාවෙන් හැඩවන CFW Couture + Trousseau: මෝස්තර නිරූපණය සහ කලාත්මක නිර්මාණශීලීත්වයේ අපූර්ව සංකලනයක්

Bizweb2 Bizweb2 — Fri, 11 Sep 2026 06:31:57 +0000

දකුණු ආසියානු මෝස්තර නිරූපණ ක්ෂේත්‍රයේ නවමු පිටුවක් පෙරළමින්, මෙවර කොළඹ විලාසිතා සතිය (Colombo Fashion Week – CFW) සිය Couture + Trousseau දැක්ම එළඹෙන සැප්තැම්බර් 17, 18 සහ 19 යන දිනවල පැවැත්වීමට කටයුතු යොදා ඇත. ‘Living Sculpture’ (ජීවමාන මූර්ති) යන සුවිශේෂී තේමාව මුල් කරගනිමින් පැවැත්වෙන මෙවර විලාසිතා දැක්ම, ප්‍රකට මූර්ති ශිල්පී ප්‍රගීත් මනෝහංසයන්ගේ අලංකාර මූර්ති නිර්මාණයන්ගෙන් වර්ණවත් වේ. සාම්ප්‍රදායික මෝස්තර නිරූපණ වේදිකාව හුදෙක් ඇඳුම් විලාසිතා ප්‍රදර්ශනය කරන ස්ථානයකින් ඔබ්බට ගෙන යමින්, එය සැබෑ ජීවමාන කලාගාරයක් බවට පත් කිරීම මෙහි ප්‍රධාන අරමුණයි. යකඩ කැබලි භාවිතයෙන් චලනය සහ හැඟීම් මතුකරන දැවැන්ත මූර්ති නිර්මාණය කිරීමට ප්‍රකට ප්‍රගීත් මනෝහංසගේ නිර්මාණ, මෙවර වේදිකාවේ පසුබිම මෙන්ම සෑම විලාසිතාවකම ආභාසය සහ මූලාශ්‍රය බවටද පත්වනු ඇත. මෙවර විලාසිතා දැක්ම සඳහා ශ්‍රී ලංකාව, ඉන්දියාව, පකිස්ථානය සහ චීනය යන රටවල ප්‍රමුඛ පෙළේ මෝස්තර නිර්මාණකරුවන් රැසක් එක්ව සිටිති. උසස් මෝස්තර නිර්මාණ ශිල්පය යනු හුදෙක් ඇඳුම් නිර්මාණයට එහා ගිය, නිර්මාණකරුවාගේ දැක්ම, ශිල්පීය නිපුණතාව සහ කලාත්මක බව එකිනෙක හමුවන රමණීය සංකලනයක් බව ඔවුන්ගේ නිර්මාණ තුළින් මනාව පිළිඹිබු කෙරේ. ගෙවී ගිය වසර 23 පුරාවටම ශ්‍රී ලාංකේය මෝස්තර නිර්මාණ ක්ෂේත්‍රයේ ගමනාන්තය තීරණය කළ පුරෝගාමී බලවේගය වූයේ කොළඹ විලාසිතා සතියයි. සුවිශේෂී තේමාවන් ඔස්සේ විලාසිතා ක්ෂේත්‍රය නව මානයන් වෙත යොමු කළ CFW හි, විලාසිතා සහ කලාව මුසු වූ වඩාත්ම අභිලාෂකාමී ප්‍රවේශය ලෙස CFW Couture + Trousseau හැඳින්විය හැකිය. මෙම නවමු තේමාව පිළිබඳව අදහස් දක්වමින් කොළඹ විලාසිතා සතියේ නිර්මාතෘ සහ කළමනාකාර අධ්‍යක්ෂ අජේ වීර් සිංග් මහතා මෙසේ පැවසීය: “Couture කියන්නේ විලාසිතාවක් හුදෙක් ඇඳුමකින් එහා ගිය සැබෑ කලා නිර්මාණයක් බවට පත්වෙන සන්ධිස්ථානයටයි. අපේ Runway එක තුළින් ඒ කලාත්මක බව උපරිමයෙන්ම නිරූපණය කරන්නයි අපිට ඕන වුණේ. මෙහි ඇති මූර්ති හුදෙක් අලංකාරයට තැබූ සැරසිල්ලක් නෙමෙයි; ඒවා මෝස්තර නිර්මාණ සමඟ එකතු වෙලා නිර්මාණය කරන නිහඬ සංවාදයක්. ප්‍රගීත් මනෝහංස වැනි විශිෂ්ට කලාකරුවෙකු සමඟ එක්ව මෙම සංකල්පය සැබෑවක් බවට පත් කිරීමට ලැබීම ගැන අපි ඉතාමත් සතුටු වෙනවා.” CFW Couture + Trousseau 2026 ප්‍රධාන අනුග්‍රාහක ලෙස Nations Trust Bank කටයුතු කරන අතර, ස්ථානීය සහකරු ලෙස Cinnamon Life at City of Dreams එක්වෙයි. මීට අමතරව Lanka Walltiles, Vision Care, Hameedia සහ Ramani Fernando යන ආයතනයන්ද, සහකාර පාර්ශවකරුවන් ලෙස Acorn, Pulse, News First, Ceylon Today, Emerging Media සහ HardTalk යන ආයතනයන්ද මෙයට දායකත්වය ලබා දෙයි. ශ්‍රී ලංකාවේ මෝස්තර නිර්මාණ ක්ෂේත්‍රයේ ප්‍රධානතම සන්නිවේදන හඬ මෙන්ම ශක්තිමත් පදනම වන CFW, සිය සහකරුවන් සමඟ එක්ව පරිපූර්ණ විලාසිතා පද්ධතියක් නිර්මාණය කිරීමට නිරන්තරයෙන් කැපවී සිටියි.

The post ‘Living Sculpture’ තේමාවෙන් හැඩවන CFW Couture + Trousseau: මෝස්තර නිරූපණය සහ කලාත්මක නිර්මාණශීලීත්වයේ අපූර්ව සංකලනයක් appeared first on Adaderana Biz Sinhala | Sri Lanka Business News.

විශිෂ්ට සේවා ස්ථාන ඇගයීමට “ශ්‍රී ලංකා ආයතනික සෞඛ්‍ය සහ ඵලදායිතා සම්මාන උළෙල – 2026” නිල වශයෙන් ආරම්භ කෙරේ

Bizweb2 Bizweb2 — Fri, 11 Sep 2026 06:23:25 +0000

”ශ්‍රී ලංකා ආයතනික සෞඛ්‍ය සහ ඵලදායිතා සම්මාන උළෙල (SLCHPA) – 2026″ අද නිල වශයෙන් ආරම්භ කෙරුණු අතර, සේවක සුබසාධනය, සේවා ස්ථානීය සෞඛ්‍යය සහ ඵලදායිතාව සඳහා ප්‍රමුඛත්වය ලබා දෙන ශ්‍රී ලාංකික ආයතන හඳුනාගෙන ඇගයීමට ලක් කිරීම මෙහි අරමුණ වේ. සේවකයින්ගේ යහපැවැත්ම සහ ආයතනික කාර්යසාධනය අතර ඇති සබඳතාව තවදුරටත් ශක්තිමත් කරමින්, ඒ පිළිබඳ ව්‍යාපාරික ප්‍රජාවේ දිරිගැන්වීම මෙම සම්මාන උළෙලේ ප්‍රධාන අරමුණකි. ලාංකේය ව්‍යවසායකයින්ගේ මණ්ඩලය (COYLE) විසින් ජපාන බාහිර වෙළඳ සංවිධානය (JETRO) සමඟ එක්ව සංවිධානය කරන SLCHPA – 2026 සඳහා ප්‍රධාන අනුග්‍රාහකයා ලෙස සම්පත් බැංකුව කටයුතු කරයි. සේවකයින්ගේ සෞඛ්‍යය, යහපැවැත්ම සහ වෘත්තීය ඵලදායිතාව ඉහළ නැංවීම සඳහා කැපවන ආයතන හඳුනාගෙන ඇගයීම තුළින්, මානව සම්පත කේන්ද්‍ර කරගත් තිරසාර ව්‍යාපාරික සංස්කෘතියක් ප්‍රවර්ධනය කිරීම මෙම වැඩසටහනේ අරමුණයි. JETRO හි ජාත්‍යන්තර අත්දැකීම් සහ ජපන් දැනුම සමඟින්, ශ්‍රී ලංකාවේ සේවා ස්ථානීය ප්‍රමිතීන් තවදුරටත් ඉහළ නැංවීමටද මෙම වැඩසටහන අපේක්ෂා කරයි. සාම්ප්‍රදායික ව්‍යාපාරික සාර්ථකත්වයේ සීමාවන්ගෙන් ඔබ්බට යමින්, ව්‍යාපාරික සාර්ථකත්වය මැනීමේදී සේවක සෞඛ්‍යය, යහපැවැත්ම සහ ඔවුන්ගේ සක්‍රීය දායකත්වය කෙරෙහි වැඩි අවධානයක් යොමු කිරීමට SLCHPA හරහා ආයතන දිරිගන්වා ඇත. වසර ගණනාවක් පුරා සේවකයින් සඳහා හිතකර සහ ඵලදායී සේවා පරිසරයන් ගොඩනැංවීමට අවධානය යොමු කළ ආයතන ඇගයීම තුළින්, ශ්‍රී ලංකාවේ සේවා ස්ථානීය ප්‍රමිතීන් තවදුරටත් ඉහළ නැංවීමටද මෙම සම්මාන උළෙල මඟ පෙන්වා ඇත. පෙර සාර්ථකත්වයන් තවදුරටත් ඉදිරියට ගෙන යමින්, SLCHPA – 2026 සේවා ස්ථානීය සෞඛ්‍යය සහ ඵලදායිතාව ඇගයීමේ පුළුල් අදියරක් වශයෙන් මෙවර පැවැත් වේ. නව්‍ය සේවා ස්ථානීය ක්‍රියාමාර්ග හඳුනාගෙන ඇගයීමට ලක් කිරීමත්, සහභාගී වන ආයතන සඳහා ඉහළ ජාතික පිළිගැනීමක් ලබා දීමත් මෙවර සම්මාන උළෙලේ ප්‍රධාන අරමුණු අතර වේ. එමෙන්ම, සේවකයින්ට සිය උපරිම දායකත්වය ලබා දීමට සහ ඔවුන්ගේ හැකියාවන් ප්‍රදර්ශනය කිරීමටත් හැකි සේවා පරිසරයක් නිර්මාණය කිරීම සඳහා සමාගම් දක්වන කැපවීම ඉස්මතු කිරීමටද මෙම සම්මාන උළෙල සුවිශේෂී අවස්ථාවක් සපයයි. අද ව්‍යාපාරික ලෝකයේ සාර්ථකත්වය තීරණය වන්නේ මූල්‍ය ප්‍රතිඵල මත පමණක් නොව, සේවකයින්ගේ සෞඛ්‍යය, යහ පැවැත්ම සහ ඵලදායිතාව කෙරෙහි ආයතනය දක්වන අවධානය මතද වේ. හිතකර සේවා සංස්කෘතියක් ගොඩනැංවීම මඟින් සේවක සහභාගීත්වය සහ කාර්ය සාධනය ඉහළ නැංවීමට, දක්ෂ සේවකයින් ආකර්ෂණය කර රඳවා ගැනීමට සහ තිරසාර ව්‍යාපාරික වර්ධනයක් ළඟා කර ගැනීමට හැකි වේ. SLCHPA – 2026 මඟින් මානව සම්පත වෙනුවෙන් සිදු කරන ආයෝජන, වඩාත් ශක්තිමත් ආයතන ගොඩනැංවීමට දායක වන ආකාරය ඉස්මතු කරයි. මෙම සමාරම්භය පිළිබඳ අදහස් දක්වමින් ලාංකේය ව්‍යවසායකයින්ගේ මණ්ඩලයේ (COYLE) හි සභාපති සුරේන් චන්ද්‍රරත්න මහතා මෙසේ පැවසීය. “SLCHPA හි මූලික අරමුණ වන්නේ සේවකයින් ආයතනයක වටිනාම සම්පතක් ලෙස සලකමින්, ඔවුන්ගේ සෞඛ්‍යය සහ යහ පැවැත්ම වෙනුවෙන් කැපවන ආයතන හඳුනාගෙන ඇගයීමයි. සේවක සුබසාධනය සහ ආයතනික සාර්ථකත්වය අතර ඇති සමීප සබඳතාව තවදුරටත් ශක්තිමත් කරමින්, වැඩි ආයතන සංඛ්‍යාවක් සෞඛ්‍ය සම්පන්න සහ ඵලදායී සේවා පරිසර ගොඩනැංවීමට දිරිගැන්වීම SLCHPA – 2026 හරහා අපගේ අපේක්ෂාවයි.” SLCHPA – 2026 ඇගයීම් ක්‍රියාවලිය පැහැදිලි, විනිවිදභාවයෙන් යුත් සහ විශ්වසනීය ක්‍රම වේදයක් මතපදනම් වේ. අයදුම් කරන ආයතන තම සේවක සුබසාධන වැඩසටහන්, සෞඛ්‍ය මුලපිරීම්, සේවා ස්ථානීය ක්‍රමවේද සහ ඵලදායිතා ප්‍රතිඵල පිළිබඳ තොරතුරු ඉදිරිපත් කළ යුතුය. පූර්ව නිර්ණායක මත පදනම්ව මෙම අයදුම්පත් සවිස්තරාත්මක සමාලෝචනයකට ලක් කෙරෙන අතර, ක්‍රියාත්මක කළ වැඩසටහන්වල ගුණාත්මකභාවය සහ ඇති කළ බලපෑම මත ජයග්‍රාහකයින් තේරී පත් කර ගැනේ. SLCHPA – 2026 සඳහා ලියාපදිංචිය සහ අයදුම්පත් භාරගැනීම ළඟදීම ආරම්භ වන අතර, විවිධ ප්‍රමාණයන්ගෙන් සහ ක්ෂේත්‍රයන්ගෙන් යුත් ආයතනවලට මේ සඳහා සහභාගී විය හැකිය. තම සේවා ස්ථානීය සෞඛ්‍ය, සුබ සාධන සහ ඵලදායිතා වැඩපිළිවෙළ ජාතික මට්ටමෙන් ප්‍රර්දර්ශනය කරමින්, ඒ සඳහා පිළිගැනීමක් ලබා ගැනීමට මෙය ආයතනවලට සුවිශේෂී අවස්ථාවක් සලසා දෙයි.

The post විශිෂ්ට සේවා ස්ථාන ඇගයීමට “ශ්‍රී ලංකා ආයතනික සෞඛ්‍ය සහ ඵලදායිතා සම්මාන උළෙල – 2026” නිල වශයෙන් ආරම්භ කෙරේ appeared first on Adaderana Biz Sinhala | Sri Lanka Business News.

කොග්ගලින් යුරෝපයට අපනයනය කෙරෙන ප්‍රථම Amphibious යාත්‍රාව

Biz Editor — Fri, 11 Sep 2026 06:12:11 +0000

ශ්‍රී ලංකා ඉතිහාසයේ ප්‍රථම වතාවට ගොඩබිම මෙන්ම මුහුදේ ද එකලෙස ධාවනය කළ හැකි උසස් තාක්ෂණික Amphibious (උභයජල) යාත්‍රාවක් නිපදවා යුරෝපයට අපනයනය කිරීමේ ඓතිහාසික සමාරම්භක උත්සවය ඊයේ (10) කොග්ගල නිදහස් වෙළඳ කලාප පරිශ්‍රයේදී කර්මාන්ත සහ ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති මහතාගේ ප්‍රධානත්වයෙන් පැවැත්විණි. නව කර්මාන්ත හා අපනයන පුනරුද ප්‍රතිපත්තියට සමගාමීව Ocean Voyager International ආයතනය විසින් නිපදවූ මෙම යාත්‍රාව, මෙරට නාවික නිෂ්පාදන ක්ෂේත්‍රයේ දැවැන්ත පෙරළියක ආරම්භය සටහන් කරයි.

මෙහිදී අදහස් දැක්වූ අමාත්‍ය සුනිල් හඳුන්නෙත්ති මහතා සඳහන් කළේ, මෙතෙක් කතාවට පමණක් සීමා වී තිබූ දේශීය නිෂ්පාදන ආර්ථිකය ප්‍රායෝගිකව ජයග්‍රහණය කරවීම රජයේ ප්‍රමුඛතම වගකීම බවයි. ලෝකයේ ප්‍රධානතම නාවික මාර්ග මධ්‍යයේ පිහිටි ශ්‍රී ලංකාවට කෙටි කාලීනව විශාලතම විදේශ විනිමය ප්‍රමාණයක් උපයා දිය හැකි ප්‍රමුඛතම ක්ෂේත්‍රයක් ලෙස බෝට්ටු හා නැව් නිෂ්පාදන කර්මාන්තය හඳුනාගෙන ඇති අතර, දේශීය ඉංජිනේරුවන්ගේ හා ශ්‍රමිකයින්ගේ දායකත්වයෙන් ශ්‍රී ලංකාව කලාපයේ නාවික නිෂ්පාදන මධ්‍යස්ථානය බවට පත්කිරීමට අවශ්‍ය සියලු පහසුකම් හා රජයේ පූර්ණ සහාය ලබාදෙන බව ද අමාත්‍යවරයා වැඩිදුරටත් අවධාරණය කළේය.

මෙම අවස්ථාව සඳහා SLYG සමාගම් සමූහයේ සභාපති පියර් ප්‍රින්ජියර්ස් (Mr. Pierre Pringiers) මහතා සහ ජාතික ව්‍යවසායකත්ව සංවර්ධන අධිකාරියේ සභාපති ලකෂ්මන් ඔබේසේකර මහතා ඇතුළු සමාගම් පාලනාධිකාරිය සහ ආයෝජන මණ්ඩලයේ නිලධාරීන් පිරිසක් ද එක්ව සිටියහ.

The post කොග්ගලින් යුරෝපයට අපනයනය කෙරෙන ප්‍රථම Amphibious යාත්‍රාව appeared first on Adaderana Biz Sinhala | Sri Lanka Business News.

තායිලන්ත – ශ්‍රී ලංකා වෙළෙඳ ගිවිසුම ක්‍රියාත්මක කිරීම එළඹෙන ජනවාරියේ සිට

Biz Editor — Fri, 11 Sep 2026 06:04:39 +0000

හොංකොංහි පැවැත්වෙන Belt and Road Summit (එක් තීරයක් – එක් මාවතක් සමුළුව) අතරතුරදී, ශ්‍රී ලංකා වෙළෙඳ අමාත්‍ය වසන්ත සමරසිංහ මහතා සහ තායිලන්තයේ වාණිජ කටයුතු පිළිබඳ නියෝජ්‍ය අමාත්‍ය (Vice Minister for Commerce) Dr. Kirida Bhaopichitr මහත්මිය අතර විශේෂ ද්විපාර්ශ්වික සාකච්ඡාවක් පැවැත්වුණි.

එහිදී තායිලන්ත – ශ්‍රී ලංකා වෙළෙඳ ගිවිසුම ක්‍රියාත්මක කිරීම සම්බන්ධයෙන් ප්‍රධාන වශයෙන් අවධානය යොමු වී ඇත.

එකඟ වූ පරිදි මෙම වෙළෙඳ ගිවිසුම ලබන ජනවාරි මාසයේ සිට ක්‍රියාත්මක කිරීමට අවශ්‍ය මැදිහත්වීම සිදුකරන බවට අමාත්‍යවරයා මෙහිදී ප්‍රකාශ කළේය.

ගිවිසුම ක්‍රියාත්මක කිරීමට සම්බන්ධයෙන් පැවැති ගැටලු සාකච්ඡා කර නිරාකරණය කරගැනීමට කටයුතු කළ බවත්, ඒ අනුව ඉදිරි කටයුතු සිදුකරමින් පවතින බවත් අමාත්‍ය වසන්ත සමරසිංහ මහතා වැඩිදුරටත් සඳහන් කළේය.

The post තායිලන්ත – ශ්‍රී ලංකා වෙළෙඳ ගිවිසුම ක්‍රියාත්මක කිරීම එළඹෙන ජනවාරියේ සිට appeared first on Adaderana Biz Sinhala | Sri Lanka Business News.