СПОРТ — 08info.kz

Олимпиада чемпионы Данияр Елеусінов ішімдікке тәуелділігі туралы ашық айтты

Админ — Wed, 19 Aug 2026 07:21:07 +0000

Олимпиада чемпионы әрі кәсіпқой бокстан әлемнің бұрынғы чемпионы Данияр Елеусінов әлеуметтік желіде отандастарына үндеу жасап, соңғы жылдары ішімдікке тәуелділікпен күресіп жүргенін ашық мойындады. Спортшы қазақстандықтарды өзін айыптамай, қиын сәтте қолдау білдіруге шақырды.

Боксшының айтуынша, бұл мәселе Рио Олимпиадасынан кейін басталып, біртіндеп дертке айналған.

«Иә, мен оны мойындаймын, Олимпиададан кейін менде ішімдікке деген әуестік, алкоголизмге бейімділік пайда болды», – деді Данияр Елеусінов.

Ол мас күйінде жасаған жол-көлік оқиғасы үшін өзін сынаушыларға жауап беріп, мұндай жағдайға күлуге болмайтынын атап өтті.

«Адамдар мұндай дертпен өзі бетпе-бет келмейінше түсінбейді. Бүгін не нәрсеге күлсең, ертең ол өзіңнің басыңа түсетін сынақ болуы мүмкін», – деп толықтырды ол.

Спортшы өз сөзінде мансабында үлкен жетістіктерге жеткенімен, өмірдің бұл кезеңінде үлкен сынаққа тап болғанын айтты.

«Жаратқан Алла мені дәл осы нәрсемен сынап жатыр», – деп ағынан жарылған ол мұндайда тек ерік-жігердің өзі жеткіліксіз екенін білдіріп, ел-жұртты мұндай тығырыққа тірелген жандарды айыптамауға шақырды.

Еске салсақ, Данияр Елеусінов – 2016 жылғы Рио Олимпиадасының алтын жүлдегері, Азия ойындарының екі дүркін чемпионы және кәсіпқой бокста IBF нұсқасы бойынша әлем чемпионы атағын жеңіп алған танымал спортшы. Бұған дейін БАҚ-та оның қатысуымен орын алған жол-көлік оқиғасы мен спортшының тәртіптік мәселелері кеңінен талқыланған болатын.

Qaz365.kz.

Спорт саласындағы заңнамаға енгізілген өзгерістерді іске асыру мәселелері қаралды

Админ — Tue, 11 Aug 2026 06:23:13 +0000

Облыс әкімі Берік Уәлидің төрағалығымен өткен кеңейтілген аппараттық кеңесте спорт саласындағы заңнамаға енгізілген өзгерістерді өңірде іске асыру мәселелері қаралды. Күн тәртібіндегі мәселе бойынша Дене шынықтыру және спорт басқармасының басшысы Бақыт Бекбосынов баяндады.

Басқарма мәліметінше, қазіргі таңда облыс тұрғындарының дене шынықтырумен және спортпен жүйелі түрде айналысу деңгейі 42 пайызды құрайды. Өңірде 21 спорт нысанының құрылысы жүріп жатыр. Басқармаға қарасты 26 спорт мекемесінде 16 636 спортшы 723 жаттықтырушының жетекшілігімен жаттығады.

default

Спорт саласындағы заңнамаға енгізілген өзгерістерге сәйкес Абай облысында 18 басым спорт түрі бекітілді. Сонымен қатар 116 спорт түрі бойынша спорттық даярлықтың ұлттық стандарттары қолданысқа енгізілген. Біліктілік тестілеуінен өткен 162 жаттықтырушыға лауазымдық жалақысының 30 пайызы мөлшерінде қосымша ақы төленуде. Спорт саласын цифрландыру аясында облыста «E-Sport» платформасын енгізу бойынша пилоттық жоба жүзеге асырылып жатыр.

Биыл Абай облысынан Қазақстан Республикасының ұлттық құрама командаларының құрамына 458 спортшы енді. Жылдың алғашқы жеті айында өңір спортшылары республикалық және халықаралық жарыстарда 1038 медаль жеңіп алды. Оның 145-ін халықаралық жарыстарда иеленген. Германияда өткен конькимен жүгіруден жастар арасындағы әлем чемпионатында Вадим Чебардаков пен Анастасия Беловодова топ жарып, облыс құрылғаннан бері олимпиадалық спорт түрлері бойынша алғашқы әлем чемпиондары атанды.

Аймақ басшысы бұқаралық спортты дамыту мен тұрғындарға қолжетімді спорт инфрақұрылымын қалыптастыруға басымдық беру қажеттігін атап өтті.

«Мемлекет басшысы бұқаралық спортты дамытуға ерекше мән беріп, өңірлерде спорт нысандарының қолжетімділігін арттыру және халықты спортпен жүйелі түрде айналысуға тарту қажеттігіне үнемі назар аударып келеді. Спорт саласын дамыту – халықтың денсаулығын нығайтып, салауатты өмір салтын қалыптастырудың маңызды тетігі. Осы бағытта бұқаралық спортты дамытуға, спорт инфрақұрылымының қолжетімділігін арттыруға және тұрғындардың тұрақты түрде спортпен айналысуына қажетті жағдай жасауға басымдық берілуі тиіс», – деді Берік Уәли.

Жиын қорытындысында облыс әкімі Дене шынықтыру және спорт басқармасына Мұз сарайы, шаңғы-роллер трассасы мен жеңіл атлетикалық манеж салу жөніндегі ұсыныстарды пысықтауды, жаттықтырушылардың біліктілік тестілеуінен өту деңгейін арттыруды, «E-Sport» платформасын енгізуді жеделдетуді тапсырды. Сондай-ақ, ұлттық құрама сапындағы спортшыларды даярлау жұмысын күшейтіп, спорт инфрақұрылымына қажеттілікті жаңа ұлттық стандарттар мен басым спорт түрлеріне сәйкес айқындауды және заңнамаға енгізілген өзгерістердің толық орындалуын қамтамасыз етуді жүктеді.

АБАЙ ОБЛЫСЫ ӘКІМІНІҢ БАСПАСӨЗ ҚЫЗМЕТІ

Ардагерлер волейболдан бақ сынасты

Админ — Mon, 06 Jul 2026 11:44:17 +0000

2026 жылдың 4 шілдесінде Шу ауданында волейболдан Жамбыл облысы ардагерлері арасында облыстық біріншілігінің бесінші туры жалауын желбіретті. Өңірде бұқаралық спортты дамыту және салауатты өмір салтын насихаттау мақсатында өткен бұл турнирге барлығы 10 команда қатысты.

Тартысқа толы өткен кезекті ойындарда ардагер спортшылар жоғары дайындықтары мен жеңіске деген жігерлігін дәлелдеді. Әр кездесу тартысты әрі қызықты сәттерге толы болды.

Дүбірлі жарыс аяқталған соң, Шу ауданы әкімдігінің спорт бөлімінің мұрындық болуымен спортшылар құрметіне кең дастархан жайылып, түскі ас ұйымдастырылды. Бейресми жағдайда жалғасқан басқосуда аға буын өкілдері аудан басшылығына және ұйымдастырушыларға жылы лебіздерін білдіріп, ризашылықтарын жеткізді.

Конысбай Ильясов

САРЫСУЛЫҚ ҚЫЗМЕТКЕРЛЕР ЖЕҢІМПАЗ АТАНДЫ

Админ — Thu, 25 Jun 2026 06:37:18 +0000

Жуырда Тараз қаласындағы «Тараз — Арена» спорт кешенінде 23 маусым — Мемлекеттік қызметшілер күніне арналған спартакиададан жарыс өткізілген болатын. Аталмыш сайысқа ауданымыздан аудан әкімі аппаратының басшысы Құдайберген Рысдәулет бастаған команда қатысып бақтарын сынады. Жарысқа қатысушылар спорттың футзал, волейбол, тоғызқұмалақ, үстел теннисі, жүзу, шахмат, қазақ күресі, киберспорт және баскетбол түрлерінен өзара кіл мықтыны анықтады.

Тартысты өткен жарыстың қорытындысы бойынша баскетбол спортынан сарысулықтар жүзден жүйрік шығып, жеңімпаз атанды.

Сонымен қатар, қазақ күресінен 100 + келі салмақ бойынша аудан әкімі аппаратының инспекторы Олжас Бейсен, 100 келі салмақта Жайылма ауылдық округі әкімі аппаратының бас маманы Шерхан Бейсенбайұлы және 80 келі салмақта Жаңатас қаласы әкімі аппаратының бас маманы Бапетов Нұрсәулет, тоғызқұмалақ сайысынан аудандық білім бөлімінің бас маманы Жеңіс Мұсаахметов, үстел теннисінен Жаңаарық ауылдық округі әкімі аппаратының бас маманы Айбек Жұмадулла алтын медальді иеленіп, аудан абыройын көкке көтерді.

Жеңімпаздарға ұйымдастырушылар тарапынан медаль, диплом және қаржылай сыйлықтар тапсырылды.

Сарысу ауданы әкімдігі

Сотталғандар арасында финалдық жарыстар өткізілді

Админ — Tue, 09 Jun 2026 07:22:33 +0000

2026 жылғы 8 маусымда Жамбыл облысы бойынша ҚАЖ департаментінің №67 мекемесінде жазғы спартакиада жоспарына сәйкес сотталғандар арасында үстел теннисінен финалдық жарыстар өткізілді.

Жарыс барысында қатысушылар өздерінің спорттық шеберліктерін, ептіліктері мен жеңіске деген құлшыныстарын көрсетті. Финалдық кездесулер тартысты өтіп, әрбір ойыншы жоғары нәтиже көрсетуге ұмтылды.
Жарыс қорытындысы бойынша жеңімпаздар анықталып, жүлделі орын иегерлері белгіленді. Үздік нәтиже көрсеткен қатысушылар мекеме әкімшілігі тарапынан марапатталды.
Аталған іс-шара сотталғандардың бос уақытын тиімді ұйымдастыруға, салауатты өмір салтын насихаттауға және дене шынықтыру мен спортқа деген қызығушылықтарын арттыруға бағытталды.

Қазақстандық боксшылар U17 санатындағы Азия чемпионатында 16 медаль жеңіп алды

Админ — Mon, 18 May 2026 08:02:38 +0000

Бұл туралы Ұлттық Олимпиада комитетінің баспасөз қызметі мәлімдеді.

Бокстан Ташкентте (Өзбекстан) өткен U17 санатындағы Азия чемпионаты өз мәресіне жетті, деп хабарлайды 08info.kz

Қазақстандық боксшылар 17 жасқа дейінгілер арасында 8 алтын, 3 күміс, 5 қола медаль жеңіп алды.

Алтын медальді Нұрасыл Ғалым (50 келіге дейін), Хатшепсут Садвакасова (50 келіге дейін), Эмир Мухит (60 келіге дейін), Аяулым Оспанова (60 келіге дейін), Диана Надырбек (75 келіге дейін), Әлібек Алпамыс (80 келіге дейін), Сабыржан Сағым (80 келіден жоғары), Жансая Ержан (80 келіге дейін) жеңіп алды.

Балым Ғабитқызы (60 келіге дейін), Мейіржан Жүніс (63 келіге дейін), Ислам Сулейманоглы (66 келіге дейін) күмістен алқа тақты.

Милана Иншина (46 келіге дейін), Бекхан Уразбай (52 келіге дейін), Нұрислам Оңалбек (57 келіге дейін), Розалия Вайдеман (57 келіге дейін), Айлин Ходжамбердиева (70 келіге дейін) қола медальға ие болды.

фото: ҰОК

ЖАС ФУТБОЛШЫЛАР ЧЕМПИОН АТАНДЫ

Админ — Wed, 14 Feb 2024 15:07:01 +0000

2024 жылдың 12-14 ақпан күндері аралығында Тараз қаласында футзалдан 2013-2014 жылы туылған жасөспірімдер арасында Жамбыл облысының чемпионаты өтті.

Аталған додаға ауданымыздың жас аяқдоп шеберлері де қатысып бақ сынады.

Облыстық чемпионатқа қатысқан Сарысу ауданындағы №26 балалар-жасөспірімдер спорт мектебінің спортшылары өз қарсыластарынан басым түсіп, чемпион атанды. Жас футболшы Алдабергенов Альтаир чемпионаттың үздік ойыншысы деп танылды.

Сарысу ауданы әкімдігі

Таразда дене шынықтыру-сауықтыру кешені ашылды

Админ — Mon, 05 Feb 2024 13:19:37 +0000

Тараздағы Құмшағал шағын тұрғын алқабында заманауи жаңа дене шынықтыру-сауықтыру кешені пайдалануға берілді. Бұл – жергілікті тұрғындардың көптен күткен қуанышы.

Жаңа нысанның ашулы рәсіміне қатысқан аймақ басшысы Ербол Қарашөкеев тұрғындарды айтулы оқиғамен құттықтады.

— Елімізде спорт арқылы ұлт саулығын тұрақты дамыту Мемлекет басшысының басты назарында. Бұл бағытта елімізде барлық жағдай жасалуда. Бүгін ашылып отырған дене шынықтыру-сауықтыру кешені соның айқын дәлелі. Бұл спорт кешені жергілікті тұрғындардың игілігіне қызмет етіп, болашақ әлем чемпиондары мен жүлдегерлердің шығатынына сенімім мол,-деген облыс әкімі жаттықтырушылар мен спортшыларға үлкен үміт артылатынын жеткізді.

Сондай-ақ, өткен жылы өңірімізде спорт саласын дамытуға 14,2 млрд теңге бөлініп, нәтижесінде ауыл-аймақтарда салынған заманауи спорт нысандары ел игілігіне берілген.

Салтанатты шар барысында Құмшағал алқабының белсендісі, Еңбек ардагері Рахманбек Устаев тұрғындар атынан ризашылығын білдірді.

Ал, дзюдодан ҚР еңбек сіңірген жаттықтырушы, ҚР еңбек сіңірген спорт қайраткері Ахмет Жұмағұл мұндай кең әрі жайлы спорт кешендерінде жаттығу – балалалар мен жасөспірімдерге беріліп отырған үлкен мүмкіндік екенін жеткізді.

Жалпы, екі қабатты жаңа спорт нысанында балалар мен жасөспірімдер дене шынықтыру клубы құрылған. Мұнда 7 жастан 17 жасқа дейінгі жасөсіпірімдер спорттың 8 түрі (футбол, баскетбол, волейбол, қазақ күресі, самбо, дзюдо, бокс, кикбоксинг) бойынша жаттығатын болады.

Айта кету керек, өткен жылы өңір аумағында 9 спорт кешені пайдалануға берілсе, осы жылдың соңына дейін тағы 13 нысанның құрылысы толықтай аяқталады деп жоспарлануда.

Бүгінгі таңда облыста дене шынықтыру және спортпен жүйелі түрде шұғылданатындардың қатары 492 мыңнан астам адамға немесе облыс тұрғындарының 40,3 пайызынан асып отыр.

Жамбыл облысы әкімдігі

ТҮРКІСТАНДЫҚ БАЛУАН ҚЫЗДАР ЕЛ ЧЕМПИОНАТЫНДА КОМАНДАЛЫҚ ҮШІНШІ ОРЫН АЛДЫ

Админ — Sun, 04 Feb 2024 08:37:02 +0000

Астана қаласында грек-рим, еркін және әйелдер күресінен ел чемпионаты жалғасуда. Әйелдер күресінен жеңімпаздар анықталды. Тартысқа толы өткен аламан күрес бәсекесінде түркістандық бұрымдылар нәтижелі өнер көрсетті. Жерлестеріміздің еншісінде 1 күміс, 4 қола медаль бар.

Өңір мерейін үстем еткен арулар қатарында 53 келіде бақ сынаған Аяжан Марқашева күміс медальді мойнында жарқыратты. Ал төрт бірдей түркістандық ару қола медаль олжалады. Атап өтсек, 57 келідегі талантты балуан қыз Шұғыла Өмірбек, 59 келіде Мадина Аман, 65 келіде Гүлдана Өсербай, 72 келіде Шәмшиябану Тастанбек сынды дарынды бұрымдылар бар.

Дүбірге толы күрес бәсекесінде әйелдер күресінен командалық сында 112 ұпай жинаған Түркістан облысы ІІІ орынды еншіледі.

Енді жарысты еркін күрес шеберлері жалғастырады. Бұл сында 10 салмақ дәрежесінде де түркістандық балуандар бақ сынайды.

Түркістан облысы әкімінің баспасөз қызметі

Қазақстандық 9 боксшы қыз Испаниядағы турнирдің финалына өтті

Админ — Sat, 03 Feb 2024 06:27:48 +0000

Турнирдің жартылай финалында Әйгерім Сатыбаева (48 келі), Назым Қызайбай (50 келі), Жазира Орақбаева (52 келі), Әнел Сақыш (54 келі), Мәдина Нұршаева (70 келі) және Гүлсая Ержан (75 келі) жеңіске жетті.

Қазақстандық боксшылардың жекпе-жек нәтижесі:

Әйгерім Сатыбаева (Қазақстан) — Клара Кортес Фернандес (Испания) — 4:1

Назым Қызайбай (Қазақстан) — Лаура Фуэртес Фернандес (Испания) — 5:0

Жазира Орақбаева (Қазақстан) — Ираче Валс дель Валле (Испания) — 5:0

Әнел Сақыш (Қазақстан) — Ханна Лакотар (Венгрия) — 4:1

Мадина Нұршаева (Қазақстан) — Лаора Капицци (Бельгия-1) — 5:0

Гүлсая Ержан (Қазақстан) — Аид Джордж (Тринидад және Тобаго) — 4:0.

Сондай-ақ финалда Қазақстаннан Аида Әбікеева (63 келі), Фариза Шолтай (81 келі) және Ләззат Күнгейбаева (+81 келі) өнер көрсетеді. Олар үшін бұл турнирдегі жалғыз жекпе-жек болмақ.

Олардың қарсыластары:

Аида Әбікеева (Қазақстан) — Сача Хайки (Англия)

Фариза Шолтай (Қазақстан) — Эмбер Мосс-Берч (Англия)

Ләззат Күнгейбаева (Қазақстан) — Сайра Гарсиа Гарай (Испания).

https://turkystan.kz/article/239505-aza-standy-9-boksshy-yz-ispaniyada-y-turnirdi-finalyna-tti