Sumartónleikaröð Bláu kirkjunar

elsa — Tue, 26 May 2026 14:19:06 +0000

Tríó Öræfi og Arnaldur Arnarsson

Arnaldur Arnarson fæddist í Reykjavík árið 1959 og hóf gítarnám í Svíþjóð tíu ára að aldri. Hann lærði síðan í Tónskóla Sigursveins D. Kristinssonar hjá Gunnari H. Jónssyni og lauk þar námi vorið 1977. Hann stundaði framhaldsnám í Englandi og á Spáni, þar sem helstu kennarar hans voru Gordon Crosskey, John Williams, George Hadjinikos og José Tomás. Með sigri í XXI alþjóðlegu "Fernando Sor" gítarkeppninni í Róm 1992 og einleikstónleikum á Listahátíð í Reykjavík sama ár skipaði Arnaldur sér á bekk með fremstu tónlistarmönnum Íslands. Hann hefur margoft komið fram á Íslandi og haldið tónleika í Evrópu, Ástralíu, Bandaríkjunum og Suðurameríku. Arnaldur hefur um árabil kennt gítarleik og verið aðstoðarskólastjóri við Luthier Tónlistar- og dansskólann í Barcelona en starfar nú reglulega á Íslandi við kennslu og tónleikahald. Hann hefur haldið námskeið í tónlistarflutningi víða um heim og setið í dómnefndum í alþjóðlegum tónlistarkeppnum.

Sóley Þrastardóttir stundaði þverflautunám hjá Jóni Guðmundssyni við Tónlistarskóla Austur-Héraðs á unglingsárunum og nam síðan flautuleik hjá Bernharði Wilkinson og Hallfríði Ólafsdóttur við Tónlistarskólann í Reykjavík. Hún lauk svo BMus gráðu í flautuleik frá Listaháskóla Íslands hjá Martial Nardeau. Þaðan lá leiðin til University of Oklahoma í Bandaríkjunum, þar sem hún nam hjá Valerie Watts og útskrifaðist með MMus og DMA gráður í flautuleik. Sóley hefur komið fram sem flautuleikari víða um heim en undanfarin ár hefur hún aðallega lagt áherslu á að vera virk í tónlistarlífinu á Austurlandi. Hún hefur m.a. leikið með Sinfóníuhljómsveit Austurlands, MELA listamannafélagi og flautukvartettinum Bjartsýni og komið fram á tónleikaröðinni Tónlistarstundum, tónleikaröð Bláu kirkjunnar og tónleikum á vegum Tónlistarmiðstöðvar Austurlands.

Þórunn Harðardóttir er fædd og uppalin í Hafnarfirði þaðan sem hún kláraði framhaldspróf í víóluleik 2005 með Guðmund Kristmundsson sem aðalkennara. Þaðan hélt hún til Birmingham í Englandi og lauk BMus prófi undir handleiðslu víóluleikarans Rivku Golani. Þegar Þórunn fluttist aftur heim fékk hún starf við Tónlistarskóla Reykjanesbæjar og starfar þar enn í dag við fiðlu- og víólukennslu, auk þess að stjórna strengjasveitum skólans. Þórunn hefur tekið þátt í fjölbreyttum verkefnum sem víóluleikari hér á landi í öllum geirum tónlistar, en hefur sérstakan áhuga á órafmagnaðri kammertónlist og/eða verkefnum þar sem víólan fær að njóta sín. Hún er fastur meðlimur strengjasveitarinnar Spiccato og spilar reglulega með Sinfóníuhljómsveit Austurlands og Sinfóníuhljómsveit Suðurlands.

Ásdís Arnardóttir sellóleikari hefur búið og starfað á Norðurlandi frá árinu 2007. Hún kennir við Tónlistarskólann á Akureyri og Tónlistarskóla Eyjafjarðar og leikur með Sinfóníuhljómsveit Norðurlands. Hún hefur á þessum tíma verið virkur þátttakandi í tónlistarlífinu og komið fram á fjölmörgum viðburðum á svæðinu eins og Kirkjulistaviku í Akureyrarkirkju, Barokksmiðju Hólastiftis, Sumartónleikum á Hólum og Norðlenskar konur í tónlist svo eitthvað sé nefnt. Ásdís var Bæjarlistamaður Akureyrar árið 2020. Áður en Ásdís flutti norður starfaði hún við Tónskóla Sigursveins D. Kristinssonar og Suzukitónlistarskólann í Reykjavík. Hún var með samning við Sinfóníuhljómsveit Íslands 2007-2010, spilaði með Íslensku Óperunni og tók þátt í ýmis konar samspili. Ásdís er með mastersgráðu í sellóleik frá Boston University.

The post appeared first on Sumartónleikaröð Bláu kirkjunar.

Viltu spila í Bláu kirkjunni?

elsa — Thu, 09 Jan 2025 09:59:06 +0000

Um leið og við óskum vinum og velunnurum Bláu kirkjunnar gleðilegs árs tilkynnum við að opið er fyrir umsóknir vegna Sumartónleikaraðar Bláu kirkjunnar 2025. Markmið okkar hefur ætíð verið að bjóða upp á fjölbreyttan og vandaðan tónlistarflutning og sumarið 2025 hyggjumst við halda sex tónleika, á miðvikudagskvöldum frá lokum júní fram í byrjun ágúst. Áhugasöm sendi póst á blaakirkjan@blaakirkjan.is þar sem fram koma drög að dagskrá tónleikana, ferilskrá og tóndæmi.

Umsóknarfrestur er til og með 3. febrúar næstkomandi.

Happy new year! Applications are open for the Blue Church's Summer Concert Series 2025. Our goal has always been to offer our concert guests a varied and high-quality music performance. In the summer of 2025, we plan to hold six concerts, on Wednesday evenings from the end of June until the beginning of August. Interested are encouraged to apply by sending an email to blaakirkjan@blaakirkjan.is The application must include a draft of the concert program, CV and an audio/video sample.

The application deadline is February 3rd.

The post Viltu spila í Bláu kirkjunni? appeared first on Sumartónleikaröð Bláu kirkjunar.

1. ágúst – Minning Muff Worden heiðruð

ferdamenning — Thu, 26 Jul 2018 11:31:21 +0000

Bergþór, Diddú, Anna Guðný ásamt Halldóru Malin og fleirum.

Sumartónleikaröðin Bláa kirkjan á Seyðisfirði fagnar í ár tuttugu ára afmæli sínu. Af því tilefni verður sett saman hátíðardagskrá þar sem minningu annars stofnanda hennar, tónlistarkennarans bandaríska, Muff Worden, verður heiðruð. Muff var fyrstu árin aðaldriffjöður tónleikaraðarinnar en hún lést árið 2006, langt fyrir aldur fram.

Dagskráin verður blanda af óbundnu máli og tónlistarflutningi í umsjón leikkonunnar Halldóru Malinar Pétursdóttir. Tónlistina flytja m.a. þau Bergþór Pálsson, Diddú og Anna Guðný Guðmundsdóttir. Þau eru landsmönnum löngu kunn og hafa margoft komið fram í Bláu kirkjunni.

The post 1. ágúst – Minning Muff Worden heiðruð appeared first on Sumartónleikaröð Bláu kirkjunar.

25. júlí: Eldjárnin og Pozzo

ferdamenning — Thu, 19 Jul 2018 11:30:33 +0000

Systkinin Ösp og Örn koma frá Tjörn í Svarfaðardal þar sem tónlist hefur ávallt verið ríkjandi partur af hversdeginum. Þau hófu ung að koma fram á tónleikum ásamt foreldrum sínum, Kristjáni Eldjárn Hjartarsyni og Kristjönu Arngrímsdóttur. Var því ekki að undra að þau héldu bæði í tónlistarnám, Örn í tónsmíðar og Ösp í söng og skapandi tónlist og hafa þau sett mark sitt á íslenskt tónlistarlíf, hérlendis og víðar. Þau stofnuðu saman dægurlaga og suðurríkjabandið Brother Grass og gáfu með þeim út tvær breiðskífur.

Plata Aspar, Tales from a poplar tree, var tilnefnd í flokki þjóðlagatónlistar á íslensku tónlistarverðlaununum 2018. Örn hefur ljáð mörgum helstu söngvurum og tónlistarmönnum landsins einkennandi gítarleik sinn, sem má t.d heyra á plötu Snorra Helgasonar, sem hlaut verðlaun fyrir þjóðlagaplötu ársins á íslensku tónlistarverðlaununum í mars 2018.
Valeria Pozzo lærði fiðluleik í tónlistarháskólanum í Feneyjum. Árið 2011 fluttist hún til Lundúna til að hefja nám í söng í LCCM. Það var þá sem leiðir hennar og Aspar lágu saman. Árið 2013 kom út fyrsta smáskífa Valeriu, here I live and breathe, þar sem hún syngur og leikur á fiðlu og gítar. Hún stundar nú framhaldsnám við Goldsmiths háskólann og er að vinna að sinni fyrstu breiðskífu.

The post 25. júlí: Eldjárnin og Pozzo appeared first on Sumartónleikaröð Bláu kirkjunar.

18. júlí: Magga Stína og félagar

ferdamenning — Thu, 12 Jul 2018 11:30:01 +0000

Magga Stína ásamt hljómsveit flytur frumsamið efni í bland við verk annarra. Magga Stína er söngkona, leikkona, kennari, sjónvarpsmaður og ýmislegt fleira. Hún hefur gefið út tónlist með hljómsveitunum Hringjum og Risaeðlunni, með Megasi og undir eigin nafni, auk þess að syngja inn á fjölda hljómplatna með ýmsum tónlistarmönnum.

The post 18. júlí: Magga Stína og félagar appeared first on Sumartónleikaröð Bláu kirkjunar.

11.júlí: Strengir, sögur og farandtónlist – Tourlou music

ferdamenning — Thu, 05 Jul 2018 11:28:05 +0000

Tourlou býður tónleikagestum í ferðalag til landa á borð við Búlgaríu, Makedóníu, Armeníu, Grikkland, Ítalíu og Spán. Tríóið flytur þjóðlagatónlist í eigin útsetningum og á efnisskránni kennir ýmissa grasa, allt frá melankólískum ballöðum til líflegrar danstónlistar. Eins og efnisskráin koma tónlistarmennirnir úr ólíkum áttum, frá Íslandi, Spáni og Hollandi.

Á þeim tveimur árum sem liðin eru frá stofnun Tourlou hafa þremenningarnir farið í tónleikaferðalag um Spán og Japan, gefið út sinn fyrsta geisladisk og komið fram á hinum ýmsu tónleikum og tónlistarhátíðum í Hollandi og Belgíu.

Tónleikar Tourlou í Bláu kirkjunni eru þeir síðustu í röð tónleika eftir þriggja vikna ferðalag tríósins um Ísland.

Tríóið skipa þau Anna Vala Ólafsdóttir, selló og söngur, David Alameda Márquez, fiðla, víóla d’amore, mandólín og söngur og Mayumi Malotaux, fiðla, mandólín, söngur

The post 11.júlí: Strengir, sögur og farandtónlist – Tourlou music appeared first on Sumartónleikaröð Bláu kirkjunar.

4. júlí: It’s a Womans World – Olga Vocal Ensemble

ferdamenning — Tue, 03 Jul 2018 11:28:00 +0000

Þema tónleikanna er femínismi þar sem listakonum síðustu 1000 ára er fagnað. Á efnisskránni eru meðal annars lög eftir Hildgard von Bingen sem fædd var árið 1098 og Barböru Strozzi sem var uppi á 16. öld. Einnig verða flutt lög sem eru hvað þekkust í flutningi frægra söngkvenna, þar ber að nefna Ninu Simone, Édith Piaf og Billie Holliday. Einnig eru á efnisskránni fjögur lög sem samin voru sérstaklega fyrir Olgu. Fjölbreytni í lagavali og tónlistarstíl ræður ríkjum og allir ættu að finna eitthvað við sitt hæfi.

Sönghópurinn Olga Vocal Ensemble hefur verið starfræktur síðan árið 2012 en hópurinn hélt sína fyrstu tónleika á Íslandi sumarið 2013 og hefur heimsótt Ísland á hverju ári síðan þá. Hópurinn er skipaður 5 strákum sem allir eru búsettir í Hollandi. í Olgu eru Hollendingarnar Jonathan Ploeg og Arjan Lienaerts, Englendingurinn Matthew Lawrence Smith, rússneski Bandaríkjamaðurinn Philip Barkhudarov og Íslendingurinn Pétur Oddbergur Heimisson.

#heforshe #itsawomansworld

The post 4. júlí: It’s a Womans World – Olga Vocal Ensemble appeared first on Sumartónleikaröð Bláu kirkjunar.

Glæsilegt tónleikasumar framundan á 20 ára starfsafmæli

ferdamenning — Fri, 22 Jun 2018 11:16:56 +0000

Tónleikaröðin fagnar í ár 20 ára starfsafmæli sínu og minnist um leið annars stofnanda hennar, Muff Worden, sem lést árið 2006, langt um aldur fram. Í ár verða fjórir tónleikar auk sérstakrar minningardagskrá um Muff. Dagskráin er fjölbreytt og allir ættu að geta fundið eitthvað við sitt hæfi. Tónleikar verða á miðvikudagskvöldum í Bláu kirkjunni á Seyðisfirði og hefjast stundvíslega kl. 20.30.

Olga Vocal Ensemble ríður á vaðið með tónleikana It’s a Womans World þann 4. júlí þar sem kvenkyns tónskáldum og flytjendum verður gert hátt undir höfði. Þann 11. júlí mun alþjóðlega þjóðlagatríóið Tourlou music flytja eigin útsetningar á þjóðlögum héðan og þaðan úr Evrópu og víðar. Þá stígur á stokk Magga Stína ásamt félögum þann 18. júlí og flytur frumsamda tónlist í bland við annarra. Síðustu tónleikarnir verða þann 25. júlí en þá koma svarfdælsku systkinin Ösp og Örn Eldjárn ásamt ítalska fiðluleikaranum Valeria Pozzo og flytja tónlist eftir sig.

Þann 1. ágúst verður flutt minningardagskrá um Muff þar sem tónlist í bland við önnur atriði verður flutt og sagt frá ævi Muff og störfum. Tónlistarmennirnir Bergþór Pálsson, Diddú og Anna Guðný Guðmundsdóttir sjá um tónlistarflutninginn.

Verið velkomin í Bláu kirkjuna.

The post Glæsilegt tónleikasumar framundan á 20 ára starfsafmæli appeared first on Sumartónleikaröð Bláu kirkjunar.

Að loknu tónleikasumri

ferdamenning — Mon, 25 Sep 2017 09:33:38 +0000

Sumarið 2017 var 20. sumarið sem tónleikar voru haldnir í Seyðisfjarðarkirkju undir hatti tónleikaraðarinnar Bláa kirkjan. Sex tónleikar, fjölbreyttir að efnisskrá þar sem 19 framúrskarandi tónlistarmenn stigu á stokk, íslenskir, norskir, austfirskir, reykvískir, norðlenskir og svo mætti lengi telja.

Aðsókn minnkaði því miður nokkuð frá fyrra ári og má leiða að því líkum að það sé hægt að rekja það til hækkandi gengi krónunnar. Erlendir ferðamenn eru ætíð í meirihluta tónleikagesta og ljóst er að almennt eyddu þeir minna í afþreyingu á Íslandi en áður. Áheyrendafjöldi er þó ekki eini mælikvarðinn á mikilvægi tónleikaraðar sem þessarar og á næsta ári er fyrirhugað að halda upp á 20 ára afmæli hennar.

Við þökkum öllum sem lögðu tónleikaröðinni lið, sérstaklega Seyðisfjarðarkaupstað, Seyðisfjarðarkirkju, Uppbyggingarsjóð Austurlands, Síldarvinnslunni, Alcoa Fjarðaál og Tónlistarsjóði. Án þeirra stuðning væri ekki gerlegt að bjóða upp á eins metnaðarfulla og fjölbreytta dagskrá.

The post Að loknu tónleikasumri appeared first on Sumartónleikaröð Bláu kirkjunar.

Heimabrugguð austfirsk tónlist þann 9. ágúst

ferdamenning — Fri, 04 Aug 2017 10:17:40 +0000

Gítarleikarinn Jón Hilmar og saxófónleikarinn Einar Bragi ásamt hljómsveit leika sína eigin heimabrugguðu tónlist ásamt því að leika nokkur af uppáhalds lögunum sínum. Fjölbreyttir og skemmtilegir tónleikar þar sem austfirskur tónlistarandi svífur yfir Bláu Kirkjunni.

Nánari upplýsingar.

Tónleikar byrja kl. 20:30.
Miðasala við innganginn.
Aðgangseyrir: 3.000 kr.
Aðgangseyrir fyrir 67 ára og eldri, öryrkja og námsmenn: 2.500 kr.

The post Heimabrugguð austfirsk tónlist þann 9. ágúst appeared first on Sumartónleikaröð Bláu kirkjunar.