السبب الرئيسي لكتابة هذه التدوينة هي مساعدة الطلاب الجدد أو اللي بيأثثو في لوس أنجلوس.

كثير من الأشخاص ساعدوني في مرحلة التأثيث خاصة في اماكن الشراء، فلهم كل الشكر والتقدير.
قبل لا تأثث حط لنفسك ميزانية وحاول تشتري الأشياء المهمة في البداية والكماليات بعدين، في الغالب راح تعدي الميزانية .
ايضاً شوف اذا كنت بتشتري أشياء كثيرة من Bed bath & beyond أو تتوقع، فالأفضل انك تشترك في Beyond+ الاشتراك تقريبا 30$ ويعطوك شحن مجاني بالإضافة الى خصم 20% على أغلب المنتجات يعني لو راح تشتري منهم بفوق ال 150$ اشترك لمدة سنة أوفر لك.

غرفة النوم

أهم شيء للسكن هو غرفة النوم أو السرير. قبل لا تروح تشتري غرفة النوم أعرف مساحتها، بعض غرف النوم مساحتها ما تسمح بأنك تشتري سرير بحجم king، لازم Queen، لا تنسى الكمدينة (night stand) في بعض التصاميم تكون عريضة. اذا عرض غرفة النوم 3.5 متر أول أقل في الغالب حجم السرير Queen.

بعد ما تعرف مقاس غرفة النوم يجي موضوع التدوير على غرفة نوم. تقريباً في محلين أنصحك تروحهم Jerome’s و  Ashley Furniture.
أنصحك بـ Jerome’s أسعارهم حلوة والتوصيل سريع، Ashley التوصيل من اسبوع لأسبوعين، أنا اشتريت غرفة النوم والكنبة من Jerome’s. أنصحك تشتري غرفة النوم والجلوس في نفس الوقت ومن نفس المحل راح توفر على نفسك شوية في التوصيل. لا تشتري المراتب من منهم لأنها غالية عندهم. لكن لمن تشتري غرفة النوم أسال كم ارتفاع المرتبة وهل تحتاج frame ولا لأ. الموضوع يعتمد حسب تصميم السرير.

المرتبة انصحك تشتريها من محل LA Mattress store تقريباً موجود في كل مكان حول لوس انجلوس. أنصحك تروح الفروع اللي مهي في الداون تاون لأني أسمع انو اللي برة يعملولك خصومات اكتر من اللي في الدون تاون وبرضو راح تحصل مواقف، بالنسبة ليه رحت اللي في Culver city. قبل لا تروح شوف موقعهم في الغالب راح يكون عندهم خصم يسير لمن تروح المحل تكلمهم. يفضل تطلب المرتبة بعد من تحدد السرير اللي تباه عشان ارتفاع Spring box وأيضاً هل تحتاج frame أو لأ. بالنسبة ليا أنا اشتريت المرتبة قبل السرير لكن عدلنا ارتفاع spring box عن طريق التلفون بعد ما اشترينا السرير (طبعاً قبل توصيل المرتبة)

اللحاف في خيارات كثيرة، انصحك تشتري اللحاف الأبيض اللي يتلبس. الأغطية تسمى Duvet Covers. السبب الأساسي هو انو صعب غسيل اللحاف كامل في الغسالة اللي في الشقة. ايضاً الأغطية ما راح تاخد مساحة بعكس اللحاف (بعد فترة راح يسير عندك مجموعة). تقدر تشتريها من أماكن كثيرة بس IKEA و bed bath & beyond عندهم تشكيلة حلوة. ايكيا أسعاروا جداً رائعة.

الأبجورات أنا اشتريتها من IKEA، بس حصلت أشكال جميلة في أمازون. اللمبة أنا اشتريت لمبة ذكية من Amazon. ميزتها تقدر تتحكم فيها عن طريق الجوال وتغير اللون وشدة الإضاءة.

غرفة الملابس

أتوقع أغلب الأشياء راح تحصلها في IKEA. بالنسبة للعلاليق أشتريها من Walmart أو Target. العلاليق سعرها يعتبر ممتاز بالذات راح تحتاج كتيييرة منهم وأشتري أكثر مما تتوقع لأنك حتروح تشتري زيادة.

غرفة الجلوس

يفضل تشتري الكنبة من نفس المحل اللي تشتري منو غرفة النوم. في خيار آخر الجميع يعرفوا هو IKEA، أنا اشتريت الكنبة من Jerome’s. بقية الأشياء انصحك من IKEA الطاولات غالية جداً في المحلات مقارنة بـ IKEA.

التلفزيون يفضل تشتريه أون لاين عشان ما تشيل هم التوصيل. نصيحة ابحث في Amazon، Walmart، Target ، Best Buy واختار الأرخص. قبل لا تشتري تأكد أن حجم الصالة وحجم طاولة التلفزيون مناسب مع حجم التلفزيون.

ممكن راح تحتاج تركب لوحة أو مراية في الغرفة وطبعاً ماتقدر تحط مسمار في الجدار. الحل في لصقات لدا الشي اسمها command damage free hanging. موجودة في أغلب المحلات زي Walmart و Amazon. راح تحصل مقاسات خد اللي يناسبك. بالأسفل صورة للحجم الكبير

الحمام

أول شيء بالنسبة لنا هو رشاش الماء. في كثيرة من الأنواع والأشكال في أمازون. أنا استخدمت اللس في الصورة تحت، أستخدمتو فوق السنة وماعندي أي مشكلة. موجود في أمازون ب 40$ (أشتري set A يجي معاه العدة). نصيحة لمن تسافر قفل المحبس عشان لو لاسمح الله سار تسريب.
بالنسبة لفرشة والإكسسوارات تقدر تشتريها من IKEA أو Bed Bath & Beyond. إيكيا أرخص بس bed bath & Beyond الخيارات أكتر، أنصحك تشوفهم الإثنين. من الأشياء الجميلة في ايكيا سلة للحوض الاستحمام اسم المنتج STUGVIK. بالأسفل صورة للمنتج، بصراحة مرة ممتاز ما يطيح زي أغلب السلال اللي بدون تخريم. في أحجام اخرى وأيضاً في علاقات بنفس الفكرة.

الستارة انصحك تأخذمها من Bed bath & beyond، ستائر ايكيا بعد فترة تتوسخ وما يروح الوسخ منها.
المناشف نحن أخذناها من Bed bath & beyond. بس أرواب الحمامات من ايكيا.

المطبخ

اتوقع أكثر شيء راح يأخذ من وقتك. أنصحك الأدوات الكبيرة اشتريها من Amazon أو Bed Bath & beyond.

في محل جميل اسمو  Kitchen Depot أنصحك روحو أول شيء وأشتري منو اللي يناسبك اسعارو جداً رائعة وبعدها روح ايكيا .
طقم القدور أنا اشتريت Rachael Ray من أمازون صورة الطقم بالأسفل

الخلاط أشترينا KitchenAid Artisan 5-Qt تحصلوها في Amazon و Bed Bath & Beyond.

أيضاً تحتاج خلاط صغير للعصير ودي الأشياء نحن اشترينا OXA 4-in-1 Hand Blender تحصلو في امازون. بصراحة مرة مفيد وما يأخد مساحة في التخزين، بالأسفل صورة للمنتج

الختام

الموضوع دا قابل للتحديث واذا أحد عندو اقتراح أو شيء الرجاء كتابته.

أتمنى لجميع المبتعثين التوفيق.

The post تأثيث شقة في لوس أنجلوس first appeared on مدونة طيفي.

الامر بكل بساطة الشحنة الأولى من الأجهزة جات مصنوعة في كوريا ومكتوب ورا البطارية Made in Korea By Samsung، الشحنة التانية من الاجهزة جات مكتوب عليه Made by Samsung  وهدي مجمعة في الصين.

كجوال مافي فرق بينهم ابداً كلهم نفس الشكل ونفس الخامة ونفس الأداء حتى  البطارية كلهم زي بعض مصنوعة في كورية والصناعة النهائية( finishing ) في الصين، الفرق فقط ورا البطارية دا مكتوب انو مصنوع في كوريا والتاني مهو مكتوب ولا شيء. والفرق التاني في العلبة الصيني كرتون الجهاز الصيني يجي اصغر.

صور الجهازين:

قياس اداء الجهازين بواسطة برنامج Quadrant بعد التحديث الأخير KG5، الاصدار الكوري نتيجتو كانت 3613 اما الاصدار الصيني 3436 طبعاً الفرق ولا شيء لأنو برضو مرة الاصدار الكوري طلعلي 3382 تقريباً.

The post الفرق بين النسخة الصينية والكورية من سامسونج جلاكسي اس 2 first appeared on مدونة طيفي.

الرسالة:

Dear Sir/ Madam

Thank you your order.

Please may I ask you to confirm your order by ending some
documentation that connects you to this address. I understand this
may be a burden to you, but we are required for security purposes to
ensure that the goods are being delivered to the genuine customer.

Examples of acceptable documents include:

– Copy of a utility bill no more than 3 months old
– Driving Licence
– Company Letterhead

وبعد ارسال صورة من الرخصة وعدة اثباتات أخرى
قالولي انو ما يقدروا يقبلوا الماستر كارد وممكن أكمل العملية عن طريق تحويل بنكي.
كانت فترة الرد بين كل رسالة ارسلها من يوم الى يومين !!

قمت بعدها بإلغاء الطلب الطلب وعملت طلب تاني ( لأن سعر الجهاز نقص :D) وبرضوا نفس المشكلة بين كل رد والآخر يأخذ مدة طويلة أكثر من يومين بالإضافة إلى أن الفلوس المحجوزة في الماستركارد مارجعت ! ، انتظرت لمدة 20 يوم بعدها رجعت أراسلهم عشان اكمل العملية الشرائية عن طريق التحويل البنكي ( كل اسبوع تقريباً كانت تجيني رسالة تذكير منهم بالتحويل) للأسف ماحصلت ولا رد جربت عن طريق الايميلات عن طريق نموذج ارسال الوثائق وللأسف ماحصلت ولا رد. طبعاً في النهاية تركتهم لأني ما أضمن انو بعد تحويل المبلغ أحصل رد.

الخلاصة:

ما انصح بالتعامل مع الموقع مادمت في السعودية

The post تجربتي مع متجر Expansys first appeared on مدونة طيفي.

الكاتب هو الفريق سعد الدين الشاذلي كان رئيس أركان حرب القوات المسلحة المصرية وهو العقل المدبر لحرب 73
للأسف الكاتب لم يعطى حقه من الحفاوة بل حُوكِم وسُجن ولم يكرم أبداً ولم يذكر اسمه ضمن أبطال حرب أكتوبر!! بالرغم من أنه من وضع خطة الهجوم الناجح
الكاتب لم يظهر في الإعلام بعد الإعتقال الا في برنامج شاهد على العصر في قناة الجزيرة في عام 2009 ضمن سلسلة من عشرة أجزاء (رابط الجزء الأول في اليوتيوب ) (أنصحك بمشاهدة البرنامج بعد قراءة الكتاب )
توفي الكاتب رحمه الله يوم تنحي الرئيس السابق حسني مبارك.

الكتاب راح يعطيك الاجوبة الشافية كيف خُطط للحرب ثم ماذا حدث في الحرب من المسؤول عن حدوث ثغرة الداسفور ولماذا لم تغلق الثغرة ولماذا وضِعنا في موقف صعب أثناء المفاوضات!
أيضاً بعض النصائح للأمة العربية للنهوض من الناحية العسكرية وفي نهاية الكتاب يرد على بعض الكتب اللتي كُتبت في حرب أكتوبر منها البحث عن الذات للسادات.

نصيحتي أقرأ الكتاب
تقييم الكتاب: 5 نجوم

The post كتاب حرب أكتوبر مذكرات الفريق سعد الشاذلي first appeared on مدونة طيفي.

انا عن نفسي عجبني الشريط. لكن لا اتوقع لمن يستخدم الووردبريس كموقع ادارة محتوى ان يعجب لدى الشريط

طريقة اخفاء الشريط جداً سهلة فقط أضف السطر التالي لملف functions.php التابع لقالب مدونتك ( إذا الملف غير موجد قم بإنشائه)

[php]
show_admin_bar(false); // to disable admin bar @3.1
[/php]

ولإظهار الشريط فقط غير كلمة false الى true
[php]
show_admin_bar(true); // to disable admin bar @3.1
[/php]

اما اذا كنت تريد ازالة شريط الادارة لمستخدمك
فمن لوحة التحكم
أعضاء > حسابك
عدل فس خيار “إظهار شريط أدوات الإداره”

The post اخفاء شريط المدير في الوردبريس first appeared on مدونة طيفي.

هم قالولنا تعالو الساعة 8 الصبح عند مركز الملك فهد للأبحاث الطبية

على الساعة 8:20 تقريباً جات حافلة من كاوست

تقريباً تسعة الا ربع مشي الباص للجامعة

على الساعة 10:25 كنا وصلنا البوابة الاولى للجامعة ( في تلاتة بوابات تعديها عشان تدخل المباني الأكاديمية !)

بعد البوابة الأولى رحنا عند الامن عشان يعطونا بطاقات الدخول قعدنا حوالي نص ساعة في المبنى وبصراحة بدون اي سبب يدعو للتأخير بطاقات الأحوال اخدوها من اول وبطاقات الدخول وزعت بعدين عشوائياً ( بعدين هم اعتذرو على التأخير اللي سار)

المهم عدينا البوابة التانية والتالتة بسرعة ودخلونا المبنى الرئيسي

أول شيء كان في برزنتيشن عن الجامعة ومميزاتها ومتطلبات التسجيل

وبعدين جا دكتور تخصصو تقريباً في Fluid Mechanic ، اتكلم عن تجربتو في الجامعة وكيف الجامعة توفر جميع التجهيزات للبحث العلمي يعني مثلاً هو طلب كمرات تصور 1000 صورة في الثانية، طلب 2 وجاتو 7 وزي كده وكمان التكلم عن بحثو اللي هو كيفية زيادة دقة الطابعات العايدية

وبعدو رحنا للـ Diner Hall  اللي نقدر نقول عليه المطعم المركزي ، بصراحة المطعم جداً رائع مقسم الى كم قسم مأكولات شرق أوسطية ، ابطالية ، مشويات …

وبعدها صلينا الظهر في مسجد الحرم الجامعي

في شيء جميل في الساحة الكبيرة مقولة للملك عبدالله عن سبب انشاء الجامعة

المقولة “رغبة مني في إحياء ونشر فضيلة العلم العظيمة التي ميزت العالمين العربي والإسلامي في العصور الأولى، فقد رأيت أن أؤسس جامعة الملك عبدالله للعلوم والتقنية على ساحل البحر الأحمر”

وبعدها رحنا المكتبة واخدونا في جولة

وبعدها رحنا core labs  أو المختبرات المركزية

منها مكان فيه شاشات كبيرة لعرض الصور

حسب ماقالولنا الهدف منها انها تعطي الباحثين القدرة على عرض الصور ذات الحجم الكبير جداً وتساعدهم في التحليل واشياء اخرى

بعدها كان عندنا وقت فاضي فودونا متحف العلوم والتقنية في الاسلام

صور المتحف موجودة في المعرض اللي اسفل التدوينة لكن احب اتكلم عن ما اسميه لوحة التاريخ

دي اللوحة باللمس فيها أبرز الاحداث اللي سارت تحت كل فترة زمنية في الاسلام ( اتوقع انو الشاشة هيه من تقنية windows surface )

وبعدها اخدونا في رحلة داخل الحرم الجامعي

بس المدينة الجامعية تقريباً فيها كل شيء يحتاجو الواحد والحدائق متنوعة وكمان في فعاليات عشان الناس ماتشعر بالملل

وبعدها ودونا وحدة من الشقق

من الأشياء الجميلة في كاوست

• نظام النفايات مقسمة حسب النوع

اتمنى منجد انو النظام يبدا يطبق في الأماكن المغلقة زي الشركات والمجمعات السكنية والجامعات وحبة حبة الين ما تنتشر الثقافة في المجتمع

• ايضاً الجو مرررة لطيف هدا ونحن كنا برة الساعة 11 و 12 وماحسينا بالحر ، السبب برأيي كترة النوافير والأشجار لدرجة انك تحصلها في كل مكان

• وهناك ايضاً شيء لفت نظري وهو كترة الدراجات ووجود مواقف لها في الجامعة ، طبعاً اتوقع النقطة اللي فوق ساهمت ايضاً انتشار الدراجات بالإضافة لتشجيع الجامعة ( الدراجات صديقة للبيئة)
• وأيضاً أسماء المباني على أسماء كبار علماء المسلمين في العصر الذهبي زي الرازي و ابن سينا

وهناك مجموعة من الأشياء الى اتمنى انهم يطوروها في الجامعة او يسووها

• اول شيء البوابات دي اللي تحسسك انك داخل على سجن ولا منشاة عسكرية شديدة السرية !  انا اتفهم اجراءات الأامن بس يعني لو يحطوها بشكل يخليك ماتحس بدا اشيء ، بس برضو لا يتهاونو في موضوع الأمن لأنو لو اي شيء صغير سار ممكن يخرب اللي اتبنى كلوا !! ومعرض الكتاب اللي في الرياض مو بعيد عننا.

• وتاني شيء استغرب من عدم وجود تعاون بينهم وبين مدينة الملك عبدالعزيز للعلوم والتقنية (بالرغم من وجود شراكة بينهم وبين جامعة الملك فهد للبترول والمعادن)
• انظمة التشغيل غريبة هم بيستخدمو وندوز فيستا وأوفيس 2007 !! ، كنت اتمنى انهم يستخدمو وندوز 7 و أوفيس 2010

انا عن نفسي حطيت كاوست ضمن احد الأماكن اللي ممكن أروحها بعد ما اخلص البكلوريوس

ايش رايكم في كاوست ؟

اللي يجي يقلي على الاختلاط ومدري ايش بصراحة انا شفت الناس اللي هناك محترمين مرررة ولا المسخرة اللي عندنا مرات تسير في الأسواق.

معرض الصور

اضغط على الصورة للتكبير

(في صور لسه ماجاتني يعني لاتنسى تشيك على الموضوع بعد اسبوع تحصل الصور كاملة )

* ملاحظة الصور معظمها من كمرتي وهناك صور من الفيس بوك

في صور في ألبوم في الفيسبوك لاحد الطلبة اللي كانو معانا

لتحميل الصور بدقة عالية ( صور كمرتي )  – الرجاء عند استخدام الصور ذكر المصدر

The post رحلتي لجامعة الملك عبدالله (كاوست) first appeared on مدونة طيفي.