Cafougnette en ligne - ménage

Momint d’ bonheur

l’ webmess’ — Wed, 23 Jul 2014 15:20:37 +0000

Quand, bin mat’, j’arviens dé l’ fosse,
Chu qui m’ met in bonne humeur,
Près de m’ maison, ch’est m’ tiot’ gosse
Qui dins mes gamb’s il acqueurt.

I m’imbrasse, il est à l’noce.
I’ m’ poche ed’ sus s’ pétit cœur…
J’ sins qué s’ caress’ n’est point fausse :
Mi, j’appell’ cha l’vrai bonheur.

M’ bonn’ femm’ all mé dit : « Ravette,
Té l’ noirchis comme eun’ gaillette,
T’as pas fini d’ l’imbrasser ?

— N’ dis rien ! Si t’ s’ros noire à l’ plache
D’ mes ancienn’s baiss’s su t’visache,
T’ pourros bin d’aller t’ laver ! »

L’ guéïole

l’ webmess’ — Wed, 23 Jul 2014 15:00:45 +0000

Un soir, el’ tiot Dodoph’ soupot avec ès père.
S’ tartin’ n’étot point crasse : i n’arrêtot point d’braire :
« Vettiez, pèr’, j’ai point d’ burr’ ch’est si sec qué du bos,
In avalant m’ bouchie, à m’ gassiau jé m’ fais d’ mo ! »

L’ père répond : « T’oses t’ plaindre d’eun’ bonn’ tartin’ parelle ?
Té mérit’ qué j’ té colle un raton d’sus t’ n’orelle.
Minge t’ pain, et pri’ Dieu d’ d’avir chu qu’ j’ai vu dins m’ jonn’ temps.

D’huit infants ch’étot mi l’ pus vieux quand j’avos t’ n’âge
In griffot nos cantiaux avec du mou fromage.
Eun’ pièche d’ burr’ durot toute eun’ éternité
Avec èl’ truc qué m’ père il avot invinté
I mettot l’ pièche d’ burre au mitan d’eun’ guéïole,
Et l’ z’infants défilot’nt tertous à tour dé rôle.
Chacun frotto s’ pain sec sur les barr’s comme il faut :
In arrachot ses ongl’s in pourménant s’ cantiau !
Hélas ! et rien n’ bougeot ; l’ guéïole étot trop dure !
Pourtant, sans bertonner, in grignotot s’ pain sec.
A ch’ t’heur’, pour ti souper, i t’ faudrot un bisteck ! »
« Vous mingeott’ du pain sec, pèr ? » qu’il répond Dodophe.
« Non, m’ garchon, acout’ chi l’ pinsé d’un philosophe :
Ch’ti qui ming’ du pain sec, ch’est tant parç’ qui veut bin…
In trouv’ toudis dé l’iau pour trimper s’ morceau d’ pain ! »

Botout l’ saouleux

l’ webmess’ — Tue, 22 Apr 2014 15:20:04 +0000

À Maurice Ruffin

Y-a-t-i quéqu’un d’ pus malhéreux
Qu’eun’ femm’ qu’all marie un ivronne ?
Y-a-t-i pus vilain qu’un buveux
Qui rintr’ saoul chaqu’ jour à s’ maisonne ?

Un gaillard qui-avot c’ défaut-là,
Ch’tot Botout, l’homme à Philomène.
Quand i touchot s’ quinzain’, recta,
I buvot pindant eun’ sémaine.

S’ pauv’ femme, – Mémèn’, comme in l’app’lot, –
Alle a bin eu du mau pou vive.
Pindant qu’ sin homme i brissaudot,
Follot qu’all’ vach’ fair’ des lessives.

Pourtant, alle a eu six infants,
Tertous bin él’vés, gràce à elle,
Aussi all’ tot vielle avant s’ temps,
Usé’ d’avoir té à l’ cuvelle.

All’ n’a vécu qu’ dins les tourmints.
Si ses mioch’s n’ont point eu d’ misére,
Ch’est qu’ Mémène all’ n’ mingeot à s’ faim
Qu’ au momint d’ l’arrachag’ peun’-tierres.

Mais ses infants, ils ont grandi ;
Les mauvais jours i-ont été oute ;
Tout l’ monne a ouvré p’tit-à-p’tit…
À ch’t’heur’ les v’là mariés tertoutes.

Ses fill’s et ses garchons, bons fieux,
Sont pleins d’ soins pou maman Mémène.
Ch’t’à ch’ti qui l’ dorlot’ra d’ sin mieux,
Par mill’ douceurs, ils l’intrétiennent…

C’ bonn’ femm’, qui a tant chamaillé,
Trouve in ses infants s’ récompinse.
Quant à s’n’ homme, li, i-a continué
À boir’ plus in pus, à fair’ guinse.

Pou cha, Mémèn’, cha li-est égal
All’ n’est point veuv’, mais ch’est tout comme.
Ses infants l’aim’nt : ch’est l’ principal…
All’ n’ sait pus si alle a un homme.

All’ veut bin préparer les r’pas
Pour euss’s deux, car ch’est eun’ bonn’ femme ;
Mais si s’ n’homme i s’ saoule et n’ rintr’ pas,
Mémène all’ minge et… bon tout d’ même !

Eun’ fos, vers onze heur’s du matin,
Mémèn’ tout’ seul eddins s’ cahute,
Pleumot ses peun’-tierr’s tranquill’mint
Pou l’ diner, comme à l’habitude.

Assis’ su s’ tiot kéïère ed’ bos.
Alle ouvrot in rêvant, l’ bonn’ vielle.
S’ peun’-tierr’ pleumée, alle el jettot
Dins l’ séyau d’iau à côté d’elle.

V’là qu’i rintre un homme à s’ maison.
Et c’t homme avot l’air bin in peine.
Tout pâle, i trannot, l’ pauv’ garchon,
In s’approchant del bonn’ Mémène :

« Bonjour, Madame, excusez-moi,
D’entrer chez vous en camarade…
C’est pour vous dire un’ trist’ saquoi :
Monsieur Botout est bin malade.

— Bah ! répond l’ vielle in continuant
D’éplucher ses pétot’s, sans fièvre,
Botout i-est malate ? Et d’puis quand ?
C’ matin i-a cor bu deux grands g’nièvres.

— Non, Madam’, ne vous frappez pas…
Il n’est pas malad’… Je m’explique :
Il est bien blessé, en tout cas. »
L’ viell’ all’ n’ boug’ point, non pus qu’eun’ brique.

All’ rest’ su s’ kéïer’ comme un bloc,
Pluche un peun’-tierr’, sans arnicroche,
Puis l’ jett’ dis l’ iau et cha fait « floc »,
In n’intind qu’ cha et l’ grande horloche.

« Prenez votr’ courage à deux mains,
Madame, c’est malheureus’mint grave :
Boutout, au cabaret, c’ matin,
Est… tombé dans le fond d’ la cave.

— Hein, queu malheur, i-étot cor saoul ?
C’ sal’ buvatier n’in fait point d’autes ! »
Et Mémèn’, pas ému’ du tout,
Dins l’ séyau jett’ cor eun’ pétote.

« Madam’, j’ai un’ bien trist’ mission ;
Mais… calmez-vous, je vous en prie…
N’ vous souciez pas d’ mon émotion…
Ah ! c’est bien peu d’ chos’ que la vie !

— Oui, Monsieur, ch’est la vérité…
Mais, cha va s’ passer, fait’s “sissite !” »
« Floc » cor un peun’-tierr’ ed’ plaumé :
In l’intind kaïr dins l’ marmite.

« Madam’, n’ vous frappez pas ainsi…
Mon Dieu…, vous n’êt’s point seule en peine.
Je suis bien éprouvé aussi.
On a tertous chacun les siennes.

« Mon grand-père est mort y-a longtemps,
C’est trist’, car i pouvait s’ remette.
Le pauvre homme à quatre-vingt ans,
Pouvait cor dormir sans lunette…

« Mais, pour vous, c’est bien plus navrant…
Boitout… dans sa chut’… sur un’ tonne…
— J’ comprinds ! Ch’est cor pour mi, l’ passe-temps.
Ah ! i-ara cor eun’ prop’ marronne !

— Madam’, c’est bien plus triste encor…
N’ vous effrayez pas, soyez brave :
Boitout… votr’ pauvr’ mari… est mort
En voulant vider tout’ la cave !

— Mort !… Pourtant ch’tot un bon buveux !
I n’ d’étot point à s’ premièr’ cuite !
Mort !… Ej’ cros bin qu’ ch’est malheureux !…
Mais i fallot mé l’ dir’ pus vite.

« V’là eune heur’ qué vous torténez.
Vous m’arott’s dit tout d’ suit’ l’affaire !
J’ vas êtr’ tout seul pou mi dîner :
J’ n’aros point pleumé tant d’ peun’-tierres. »

L’ mariage à chabots

l’ webmess’ — Tue, 22 Apr 2014 14:40:49 +0000

Chanson nouvelle sur un vieux refrain populaire

A s’futur’ belle’mère, eun’ vieill’ teuche
L’ Tiss’ par un biau jour va d’mander :
« Voulez-vous qu’ vot’ fille all’ mé veuche !…
Voulez-vous nous laisser marier ? »
L’femme, eune avare écrèp’-salière,
Répond : « J’ veux bin, mais point de trousseau !
M’ fille n’ara qu’ ses loqu’s d’ouverrière… »
L’Tiss’ répliqu’ d’un air tout biec-bos :
Qu’in s’ mariche à chabots, grand’mère !
Grand’mère, qu’in s’mariche à chabots !

L’ Tiss s’in va r’jointe s’ chèr Lilique
Et li racont’ l’affair’ viv’mint.
I dit : « f’sons un mariac’ comique :
Et t’ aras pas b’soin d’ biau vêt’mint,
Terminons cha sans pus d’manière.
Allons nous marier à chabots :
Cha n’ s’ra point eun’ noce ordinaire… »
Lilique à s’mèr’ va dir’ ces mots :
Jé m’ marie à chabots, grand’mère ;
Grand’mère, jé m’ marie à chabots !

L’ jour del noce arriv’. Queu tapache !
Les marieux, comm’ chaque invité,
Sont à chabots, et ç’ biau mariache
Pa chint gamins est escorté.
D’sus l’ pas dé s’ porte, l’ ménagère
Applaudit ces coupl’s rigolos.
L’ z’infants, suivant l’ noç’ par derrière
Cant’nt comm’ peutt’nt canter chint gasiaux :
V’la l’ mariache à chabots, grand’mère !
Grand’mère, v’la l’ mariache à chabots !

El’ mair’, sans rire, i les marie.
In un tour ed’ main, tout est fait.
 Et l’ groupe, à l’ sorti’ d’ la mail’rie,
Va d’ cabaret in cabaret.
Là, par à tour in cant’ quéqu’ chosse,
Des vieux refrains et des nouviaux,
Insuit’ comm’ ch’est l’usache, l’ noce,
S’in va minger des bons morciaux,
V’la l’ mariache à chabots, grand’mère !
Grand’mère, v’la l’ mariache à chabots !

Et pou terminer cheull’ bell’ fiête,
In a bin bu pindant l’erpas.
Ed’ contint’mint, Zeph Cafougnette
Dansot la gavotte à pieds d’ bas.
In avot mis, pindant c’t’ affaire,
De l’ ratatoull’ dins ses chabots,
Il s’ercauche… Oh ! là là, ma mère :
Il espit’ tout l’ monn’ d’haricots !
V’la l’ mariache à chabots, grand’mère !
Grand’mère, v’la l’ mariache à chabots !

Cafougnette in Amérique

l’ webmess’ — Wed, 16 Apr 2014 16:14:09 +0000

Cafougnette, i n’y a point longtemps,
A marié l’pus vieux d’ses infants, –
Adèle, eun’ belle et gross’ fille,
El pus arvénant’ del famille.

L’ jour del’ noc’ Cafougnett’ contint
Ed caser s’ fille core assez bin,
S’met à boir’ del bière à plein’ pinte –
Il in bot tant qu’i peut in printe.

Si bin qu’ quand l’ noc’ s’met à diner,
In comminche à peine à minger
Qué Cafougnette à déjà s’ cuite
Et s’ sin tout honteux dé s’conduite.

« Pou n’ point m’ faire r’ marquer, qu’ i s’ dit.
J’ m’ in vas m’ rétinte d’sus min lit.
J’ m’esquiv’ sans rien dire à personne :
In verra point qu’ j’ ai m’ pétit’ pronne. »

Mais Cafougnette est tell’mint saoul
Qu’i mont’ dins l’ chambr’ des jonn’s époux.
Il a tant bu qué s’ tiête all’ tourne :
I’n sait point pas dûss’ qu’i s’infourne.

Sur un biau lit tout préparé
Pour archévoir les jonn’s mariés,
Not’ saoûlot, tout habillé, s’ couche
Et ronfell’ bintôt à plein’ bouche.

Oui, mais v’là qué sus l’ cop d’ minuit,
Dins l’escalier in fait du bruit.
Cafougnette aussitôt s’ réville
Et vot qu’il est dins l’ chamb’ dé s’ fille .

In deux s’cond’s il est estampé.
Pou partir dins’ s’chambre à coté :
Mais, i peut point s’ sauver d’ la sorte…
Il intind les mariés à l’ porte.

Iou, iou, seigneur ! i s’ crot perdu.
I n’a qué l’ temps, pou n’ point êtr’ vu,
Dé s’sauver d’zous l’ lit au pus vite…
D’un seul bond i s’y précipite !

Il étot temps. Les deux jonn’ s gins
Vénottent s’ coucher justémint.
El marié dit à s’ pétiot' femme :
« Adèl’, té sais combin qué j’ t’aime !

« Eh bin, prêt’ min tout t’ n’ attintion :
J’ voudros t’ poser eun’ grav’ question. –
— Démandez, qu’ all’ répond l’ pétite,
J’n’ ai rien à vous r’fuser, Polyte. »

— Bé , v’là c’ qué j’ ai à t’ démander :
D’ autr’s homm’s ont-ils pu t’ imbrasser ?
— Cha, ch’ est eun’ drôl’ question tout d’même
I n’y a faut qu’ vous, Polyt’, qué j’aime. »

— Ch’ est sérieux, réponds comme i faut :
Est-c’ qu’ in t’ a imbrassé quéqu’ fos ?
— Non… Ah ! si… pardon… Jé m’ rappelle…
Mais fauque eun’ fos, foi d’ vo n’ Adèle !

« Par un biau soir dins not’ gardin
J’ai r’ chu quéqu’s baisers à m’ cousin.
— Eh bin, Adèl’ pour vous bernique !
D’ main, j’ m’ imbarqu’ seul pour l’Amérique… »

L’ pauv’ femme in intindant ces mots,
S’ met à crier, à braire à flots,
Quand, tout à coup, l’ femm’ Cafougnette
Rint’ din l’ chambre et d’ mand’, toute inquiète :

« Bé ! queu nouvell’ ? Qu’ est-ce qu’ il y-a chi ?
Vous fait’s l’infer dins l’paradis !
Vous êtes montés d’pus eun’ minute,
Et j’ intinds déjà qu’ in s’ dispute. »

— Oui, répond l’ jonn’ femme in brayant…
Pinsez comme m’ n’ homme est méchant :
I m’ arproch’ deux ou tros pétiot’ s baisses
Qu’é m’ cousin m’ a fait dins m’ jeunesse…

« Mi, l’ pus brav’ fill’ dé d’ zou l’ soleil,
Marier un homm’ jaloux pareil !
D’ main i s’ imbarqu’ tout seu, ma mère,
Pou l’Amérique… Ah ! bin, j’ peux braire… »

El pauver femm’ pleur’ ses yeux hors,
S’ laminte d’ pus fort in pus fort…
« Tout cha… dit l’ maman, ch’est des contes :
Deux tros baiss’ s, ch’ n’est point l’ mort d’ un monte.

« Bé, mi, pis t’ père nous somm’s heureux, –
Et pourtant pus d’ dix amoureux
M’ont fréquentée avant m’ mariage.
Cha n’impêch’ qué j’ fais bon ménage. »

L’ bell’-mère avot à pein’ fini
Qué Cafougnett’ sort dé d’ zous l’ lit
Et s’ moutre in criant :« Véronique,
In v’là core un pou l’Amérique ! »

L’ cop d’ poing électrique

l’ webmess’ — Wed, 16 Apr 2014 15:23:08 +0000

Au peintre Lucien Jonas

Cafougnette i-avot du chagrin.
Es’ femme, el coquett’ Véronique,
Tot partie, avec es’ visin,
Ténir ménache in Amérique.

L’ pauvre homme i n’ faisot qu’ timpêter :
I-arot craché s’ n’amer ed’ rache.
D’ pus l’ temps qué s’ femm’ l’avot quitté,
I-étot méchant comme un sauvache.

« Ah ! qu’i disot, d’ mauvaise humeur,
Jé l’ rattrap’rai, chell’ grand’ vaurienne.
J’ r’arai m’ réparation d’honneur
D’vant l’ Tribunal ed’ Valinciennes.

Si j’ l’avos chi, j’ li tords el cou !
J’ l’i fais dépasser s’ langu’ d’un mète.
Elle, et s’ n’amoureux, – un bafiou –
J’ les allott’ comm’ des marionnettes.

Pas moyen d’ lieu pocher l’ titi !
Vraimint ch’est marronnant tout d’ même.
Ah ! si seul’mint j’ pouvos, d’ichi,
Coller un bon cop d’ poing à m’ femme !

— Hein ? qui fait l’un d’ ses compagnons,
Bé cha, mon vieux, ch’est bin facile.
T’ peux coller, à t’ femme, un tampon
Sans bouger dé D’nain, bin tranquille.

— Qu’mint ? Cafougnett’ répond, curieux,
Taper d’ichi ? qu’mint qu’ cha s’explique ?
Dépêch-té dé m’ raconter l’ jeu :
T’ sais qué m’ femme est in Amérique.

— Oui ! T’ peux taper su t’ femm’, bin seûr !
Va-t’in à la grand’ post’, tout d’ suite,
Et, là, té verras l’ directeur.
Té li cont’ras l’ but dé t’ visite.

C’ brave homme i t’ rinsingn’ra su tout.
T’ verras d’ z’invintions qui t’ f’ront rire.
T’ pourras d’viser à Tombouctou
Dé D’nain !… S’il y-a un diape à dire !

Ouais, in peut mêm’ tirer t’ portrait
Sans t’ vir, d’ la-vo, du bout du monne !
Ouais, comarat’, cha ch’est l’ progrès…
Y-a bin l’hôtel qu’in n’ vot personne !

In appoyant sur un bouton,
El même’ qué si t’alleum’ros t’ pipe,
Sans domestique eddins l’ maison,
I t’ kait du ciel eun’ portion d’ tripes !

À ch’ t’heure, i-est question d’invinter
Eun’ machine à r’fouler les dettes !
Vraimint il y a d’ quoi s’ démander
Ls gins chu qu’i trouv’nt dins leu tiête ?

Suis m’ consel, Cafougnett’, va-t’in
Au télégraphe à longu’ distance,
Et là, pour eun’ tiot’ somm’ d’argint,
À t’ femme té pourras fich’ eun’ danse ! »

Et v’là mon Cafougnett’ parti,
La haine au cœur, d’eun’ rache extrême,
À la grand’ post’, dûss’ qu’in li dit.
Pour li pouvoir s’ vinger su s’ femme.

I cop’ dins l’ panneau, l’innochint,
L’aut’ farceur a bin m’né s’ n’affaire,
Certain d’ réussir. Justémint,
El receveur ch’étot s’ biau-frère !

Et pindant qu’ Cafougnett’ s’inqueurt,
Viv’mint, l’aut’ joyeux comarate
I téléphone au receveur
Pou l’avertir del couïonnate.

À la post’, l’homme i comprind l’ cop.
D’avanche in li-même i rigole.
Mon Cafougnette arrive bintôt :
« J’ dis bonjour ! fait comm’ cha l’ drôle.

J’ vas chi vous raconter m’ passion,
Monsieur, j’ai bésoin qu’in m’ soulache…
Vous dévez l’ vir à m’ n’émotion :
Faudrot qué j’ pourros faire aufrache !

J’ tranne ed’ colère in vous parlant !
J’ sus pus un homme, éj’ sus un diape…
M’ femme, el rouée, est fichu’ l’ camp
Avec un aute, el misérape !

Quand j’y busi’, d’ colère, éj’ brais :
M’ femme est partie in Amérique,
Et jé n’ peux point courir après
Au-d’sus d’ la mer, au diap’ dé pique !

Faudrot pourtant qué j’ m’arving’ros !
Et cha peut s’ faire, à c’ qu’in m’assure.
I paraît qué d’ichi j’ pourros
Li coller m’ poing t’avo s’ figure !

— Mais oui, répond l’ monsieur, mais oui,
Et facil’ment que ça peut s’ faire :
Versez vingt francs, – c’est l’ pus bas prix –,
Nous allons fair’ le nécessaire.

— Vingt francs, monsieur, ch’est adjugé !
D’ailleurs, ch’ n’est point l’argint qui m’ gêne.
Moutrez-min dûss’ qu’i faut taper,
Quand cha dévrot coûter m’ quinzaine ! »

L’ receveur li moutre un bouton :
Un machin d’ cuivr’ quelconqu’, su l’ tape :
« Voici, mon ami, l’invention.
C’est sur c’ bouton qu’il faut qu’on frappe.

Plus vous tap’rez fort, mieux ça s’ra.
Tant pis pou madam’ Cafougnette !
J’ vas constater le résultat
En regardant dans ma lorgnette. »

Cafougnett’ carcul’ sin élan…
I r’cule à quatre mètr’s del machine
Et s’élance d’sus in tapant
Un cop d’ poing comme un vrai cop d’ mine !

Berdouf ! « All’ d’a eu, dit l’ monsieur,
In plein su s’ n’œil, mon Dieu, queull’ boche !
Vot’ femme all’ pouss des cris furieux !
Alle a eune œil comme eune’ brioche !

— Merci, dit l’autre, éj’ sus contint !
Infin je m’ sus vingé quand même !
Pardon, Monsieur, mais j’ voudros bin
Pouvoir li-in coller un deuxième !

— Mais oui, mais oui, c’est naturel…
Soulagez-vous pendant qu’ vous y êtes.
Frappez d’ nouveau sur l’apparel :
Vot’ femme archévra l’ cop su s’ tiête ! »

Et Cafougnette arcul’ pus fort
Pou s’élancer avec vitesse.
I grinch’ des dints, et, liève incor
Un poing comme un martiau à tiesse.

Mais du momint qu’i s’ met in train,
L’ receveur s’estamp’ dé s’ kaïère
El lance à Cafougnette, viv’mint,
Un maîtr’ cop d’ pied in plein derrière.

« Aïo ! qui s’écri l’ gros bêta,
J’in ai les cantiaux in compote !
Aïo ! aïo ! qu’est-c’ qué ch’est d’ cha ?
— Cha, ch’est l’ répons’ ! » qu’i li dit l’aute.

Vaut mieux s’ taire !

l’ webmess’ — Wed, 16 Apr 2014 15:13:48 +0000

Pour Adolphe Villette, de Caudry

Cha n’est point biau, au cabaret,
Ed’ toudis dir’ du mau des femmes,
Surtout quand l’ sienne est là tout près…
In est souvint arfait au même.

L’autr’ jour, un cabar’tier d’ l’indrot
Y-in disot su s’ femm’ pir’ qu’à pinte,
Pindant qu’ li, l’ sans-cœur, i buvot
Et qu’elle, all’ rimplissot les pintes :

« Les femm’s, qu’i disot c’ mal appris,
Ch’est l’ pus vilain’ race ed’ la terre.
El preuv’ ed’ chu qu’é j’ vous dis chi :
Ch’ t’ avec cha qu’in fait des belles-mères.

« Eun’ femm’, ch’est l’ femell’ du grisou.
L’ malheureux garchon qui s’ marie
F’rot mieux dé s’ mettre el corde au cou
Pou finir pus gaîmint sa vie.

« Ah ! mi j’ peux dir’ qué j’y-ai r’kaïu
Comm’ femme ! In n’ peut point trouver pire.
Ch’ t’ eun’ punition qu’in m’a mis d’ pus
Pour mi gagner l’ palm’ du martyre !

« All’ n’arrêt’ jamais d’ bertonner.
El’ diap’ li mêm’ né l’ f’rot pas taire !
Li confier un s’cret, ch’est mucher
S’ porté-feuill’ sous eun’ plaque ed’ verre.

« Alle est “ à-s’ bouqu’ ” comme un roux cat :
All’ prind des cuit’s carabinées.
Pou nommer les défauts qu’alle a
I m’ faudrot pus d’eun’ gross’ journée !

« Ch’ti qui m’ prind m’ femm’, j’ li fais s’ pinsion.
J’ li pai’ tout c’ qui veut, mêm’ ses dettes !
Et si, par hasard, i tient bon,
J’ li donn’rai cor pou ses buvettes ! »

Là-d’ssus, d’vant tout l’ mond’ réuni,
S’ femme all’ s’écri’ dé s’ voix l’ pus haute :
« Parl’ donc ! si t’es dégoûté d’ mi,
Gros malin, n’ dégout’ point les autes ! »

L’ panier d’ pronnes

l’ webmess’ — Wed, 16 Apr 2014 14:47:17 +0000

À mon ami Eugène Chigot

L’aut’ jour, Zeph’ Cafougnett’ s’étot mis in colère :
I-avot caché dispute à sin propriétaire.
C’ propriétaire étot v’nu visiter l’ maison
Et n’ voulot point fair’ faire aucun’ réparation.

Contraire à s’ n’habitud’, Cafougnette i s’importe
Et trait’ l’avaricieux d’ tous les sins, tout’s les sortes
D’ voleur, ed’ fainéant, – infin, il li in dit
Dé ceull’s qué j’ n’os’ros point vous répéter ichi.

« Ah ! pusqué ch’est comm’ cha, ti t’aras d’ mes nouvelles,
S’écri’ l’ propriétaire, aussi tout à l’ foufielle…
Pas pu lon qué t’ t’à l’heur’, j’ vas t’invoyer l’huissier,
Et, aussi vrai qu’ jé l’ dis, j’ té f’rai déménager ! »

Pis, là-d’sus, i’ s’in va, bertonnant dins li-même.
L’ pauv’ Cafougnette, à s’ tour est disputé pa’ s’ femme :
« Té vos, dit l’ ménagèr’, té maltraites c’ t’homme-là :
I’ va nous mettre à l’ port’, nous v’là chi dins d’ biaux draps. »

« Mais, s’il n’est pas trop tard, va-t-in l’ trouver tout d’ suite,
Té t’expliqu’ras d’ tin mieux ; va, dépêch’-te bin vite.
Nous avons trop d’ peun’-tierr’, tiens, port’ li-in un panier.
L’ bonhomme est fort avar’, tout pourra s’arringer.

— Femme t’as eun’ bonn’ idé’, qué répond Cafougnette ;
Mais quant à mes peun’-tierr’s, i’ n’ d’ara point eun’ pette.
Mes biaux peun’-tierr’s lesquenn’ pour un avare ainsi ?
J’ vas li porter des pronn’s : ch’est bon assez pour li. »

Et Cafougnette s’impar’ d’un panier d’ vieill’s Rein’s-Claute,
Pis, chez s’ propriétair’, tout sin pus vite i’ s’ trotte.
L’homme étot à s’ maison, tout in colère incor :
Cafougnette, in trannant, s’infut’ dins l’ corridor.

Malgré qui n’a pus fauque un ou deux ch’veux su’ tiête,
Avant qué d’ s’amoutre il ertire s’ casquette,
Pis, d’vant l’ propriétaire, i’ va d’mander pardon.
Et l’ suppli’ d’ vouloir bin el laisser dins s’ maison.

« J’avou’ qu’ j’ai été vif, qu’i’ dit, mais j’ai l’âme bonne…
La preuv’, qué j’ vous apporte un panier d’ grossés pronnes.
Ch’est des belles Rein’s-Claute bin tert’s et plein’s d’ jus.
Alle sont bonn’s à minger, in n’os’ pus pocher d’sus. »

Là-d’sus l’ propriétair’ i’ dévient d’eun’ tell’ rache
Qu’il impongne el panier, ou, putôt, qu’il l’arrache,
Et s’met à j’ter les pronn’s eun’ par eun’ tant qu’i’ peut,
Su l’ tiête d’ Cafougnett’ qui n’avot pus d’ chéveux.

Chaqu’ pronne, in arrivant su l’ tiête d’ Cafougnette,
S’écrase in espitant del compot’ su’ s’ foss’lette,
Et chaque cop qu’il erchot el pauvr’ homm’ jett’ ces cris :
« Qué l’ bon Dieu soit béni, qué l’ bon Dieu soit béni ! »

L’avare, intindint cha, sint s’ rag’ qu’alle erdoubelle,
I dit : « Té t’ moques d’ mi, j’ vas t’écraser l’ cervelle. »
Et pouf ! l’autre erchoit cor eun’ pronne d’sus s’ caillau :
« Qué l’ bon Dieu soit béni ! » qu’i répète aussitôt.

Alors, quand el panier est complèt’mint à vute,
L’ propriétair’ s’écri’ in hurlant comme eun’ brute :
« Cré nom dézos d’ vaurien ! m’expliqu’ras-tu pourquoi
Té cri’s Dieu soit béni à chaque coup qué t’erchois ?

— Au lieu d’un panier d’ pronn’s, répond l’aut’, prêt à braire,
Em’ femm’ volot qu’ j’apporte un panier d’ gros peun’-tierr’s.
Eh bin ! j’ermerci’ Dieu d’ point l’avoir acouté :
Avec des gros peun’-tierr’s vous m’arrot’ assommé ! »