سنا تھا دیکھنا، سننا، محسوس کرنا، بولنا، سانس لینا، سونگنا، صحت بھی رزق ہیں۔ جب پیدا ہوا تو سب سے پہلے سانس لینا شروع کیا، پھر رو کر بولنا شروع کیا پھر کان میں اذان کی آواز آئی تو سننا شروع کیا پھر کچھ دن بعد آنکھیں کھلی تو دیکھنا شروع کیا۔ میرے رب نے ہر قسم کے رزق سے مالا مال کیا۔ اور ہرچیز میں کمال تک پہنچایا۔ یہ سب میرے رب کے کرم تھے کہ اس نے کسب کمال کن کہ عزیز جہاں شوی کا نمونہ بنادیا، گاؤں کا ایک بیوقوف بچہ گاؤں سے نکل کر شہر میں آگیا عقل پھر بھی نہیں ائی۔ پھر اس نے وہ سب سنا، دیکھا، محسوس کیا جو کم لوگوں کو سننا، دیکھنا اور محسوس کرنا نصیب ہوا۔ میرے رب نےطرح طرح کے ہنر سکھائے ، کبھی مقرر کبھی سٹیج کا فنکار، کبھی استاد، کبھی طالب علم، کبھی فوٹوگرافر ، کبھی لکھاری، کبھی شاعر، کبھی فلم ڈائریکٹر، کبھی ویلاگر ، کبھی پینٹر، کبھی بیٹا ، کبھی بھائی، کبھی باپ، کبھی شوہر،کبھی دوست، کبھی دشمن پتہ نہیں کن کن شعبوں اور رشتوں سے روشناس کروایا۔
یہ سلسلے چلتے جارہے تھے اور اب چیزیں جواب دینا شروع ہوگئیں پہل لبلبے نے کی اور زندگی بھر کا میٹھا 30 سال عمر تک ہی کھا لیا اور شوگر کے مریض ہوگئے، زندگی سے مٹھاس ختم ہوگئی لیکن ہمیشہ رب کا شکر ادا کیا اور ان چیزوں کی کبھی پرواہ نہیں کی جہد مسلسل جاری رہی اگلا جواب جناب جگر نے دے دیا اور یوں زندگی کے 51 سال مکمل ہوئے الحمدللہ اللہ تعالیٰ کے فضل سے اسکی بھی پرواہ نہیں کی اور جگر نیا لگ گیا شکریہ بیٹی کا جس نے جگر عطیہ کیا۔ اور شکریہ گھر والوں کا دوستوں کا جنہوں نے اس موقع پر ساتھ دیا، شکریہ میرے ادارے پاکستان ٹیلی ویژن کا جس نے اس سلسلے میں میری مالی معاونت کی۔اور اللہ تعالیٰ نے مجھے اس امتحان سے بھی آسانی سے نکال لیا۔ زندگی گزرتی جارہی تھی اور پھر ٹرانسپلانٹ کی سرجری ہرنیا میں تبدیل ہوگئی اور دوسال بعد پھر ایک طویل سرجری سے گزرنا پڑا ، گزر تو گئے پر آواز بند ہوگئی چھ ماہ بعد آواز تو بحال ہوگئی پر مجھے بولنا سننا بھولتا جارہا ہے۔ میں اس دوران چار کتابیں بھی لکھ چکا ہوں، 13 فوٹوگرافی کی نمائشیں بھی منعقد کر چکا ہوں۔ بہت سی فلمیں ڈائریکٹ کر چکا ہوں۔ ہزاروں طلبہ و طالبات کو تعلیم دے چکا ہوں، پر مجھے اب احساس ہو رہا ہے کہ میں اپنے حصے سے زیادہ لکھ چکا ہوں، بول چکا ہوں ،دیکھ چکا ہوں، پڑھ چکا ہوں،سوچ چکا ہوں، محسوس کر چکا ہوں اور اب آہستہ آہستہ یہ سب رزق مجھ پر کم ہوتے جارہے ہیں، اب مجھے بہت سے کام آتے ہیں پر میں اس تگ و دو میں کسی کام کا نہیں رہا۔ شاید میں نے مختلف فنون سیکھنے میں زندگی ضائع کردی۔ نہ اپنے کام آیا نہ ملک و ملت کے اور زندگی گزار دی ۔ مجھ سے کوئی بھی تو خوش نہیں۔ ابھی عمر کے آخری حصے میں رب کو راضی کرنے کا خیال آیا ہے اب اس ہنر کو سیکھ رہا ہوں پانچ وقت سجدے کرتا ہوں روتا ہوں پتہ نہیں یہ ہنر کب آئے گا اور کب قبولیت کے مقام تک پہنچے گا۔
مجھے لگتا ہے گاؤں کے بیوقوف بچے کو گاؤں میں ہی رہنا چاہیے تھا وہ شہر کی چکا چوند کی نظر ہوگیا۔ رزق تو گاؤں میں بھی سب تھے اور لوگ بھی۔ پھر ناجانے میں شہر کیوں آگیا ۔ ظلم یہ ہوا کہ گاؤں کا گھر بھی بیچ دیا۔ ان پیسوں سے بھی ہنر سیکھ لیے۔ اب وقت تبدیل ہو رہا ہے سب کچھ سوشل میڈیا پر ہورہا ہے سنا ہے دنیا ایک گلوبل ویلج ہے پر یہ میرے گاؤں جیسا تو ہرگز نہیں میرے گاؤں کے لوگ تو سچے اور کھرے تھے یہ تو جھوٹ سے بھرا پڑا ہے۔ اب نیا دور آگیا ہے آرٹیفیشل انٹیلیجنس کا پر یہ بھی شغل ہی ہے جب اس کو کہتا ہوں ایک گاؤں بناؤ بلکل میرے گاؤں جیسا درمیان میں کنواں کنویں کے چاروں طرف گلیاں ۔ گاؤں کے ایک طرف لڑکوں کا سکول دوسری طرف لڑکیوں کا سکول ۔ گاؤں کے ایک طرف تین فٹ کا پکا کھالا، گاؤں کی دوسری کھیت ، پر یہ سب آرٹیفیشل انٹیلیجنس کیلئے ممکن نہیں کے یہ میرے گاؤں جیسا گاؤں بنائے ۔ یہ پھر ایک آرٹیفیشل گاؤں بنادیتا ہے جو بلکل بھی میرے گاؤں جیسا نہیں اور اس میں تو میں بھی نظر نہیں آتا سب بچے سفید رنگ کے ہیں میرے جیسا کالا تو کوئی ہے ہی کوئی نہیں، گاؤں کا گوردوارہ بھی کہیں نظر نہیں آرہا ، نہ ہی چاچے شفیع صاحب کی دوکان نظر آرہی ہی، نہ ہی حاجی طفیل صاحب کی بیٹھک نظر آرہی ہے ۔ پتہ نہیں سب آرٹیفیشل آرٹیفیشل کیوں ہے کوئی تو سمجھائے، جو آرٹیفیشل انٹیلیجنس میرے گاؤں جیسا گاؤں نہیں بنا سکتی وہ کیا انقلاب لائے گی۔ مجھے لگتا ہے اب سب کچھ آرٹیفیشل ہی ہوگا دیکھنا، سننا، محسوس کرنا۔

مِلا ہے جب سے مجھے اِختیار لفظوں پر
میں سوچتا ہوں مگر گُفتگُو نہیں کرتا

The post آرٹیفیشل انٹیلیجنس appeared first on Muhammad Azhar Hafeez.

The post رمضان المبارک appeared first on Muhammad Azhar Hafeez.

میرے ابا جی سب کا ہی بہت خیال رکھتے تھے ۔ پر ہمارا خاص خیال رکھتے تھے ۔ نہلا کر ابا جی میرے سر پر تیل لگاتےاور پھر میری ٹھوڈی پکر کنگی کرتے مانگ نکالتے پھر کہتے چوہدری صاحب (میری والدہ کو کہتے تھے) صاحب تے تیار ہوگیا۔ صاف ستھرا رہنا روزانہ کپڑے بدلنا ان کو بہت پسند تھا۔ اسی طرح وہ ہمیں بھی روزانہ کپڑے بدلواتے تھے۔ اب یہ عادت انھی کی دی ہوئی ہے روزانہ نہانہ خوشبو لگانا اور کپڑے بدلنا صاف ستھرا رہنا۔
شدید غصے کے مالک تھے پر اس سے زیادہ پیار کرتے تھے مجھے یاد ہے جب بھی میری غلطی پر مجھے مار پڑی اس کے بعد مجھے باہر گھومانے لے جاتے باہر کھانا کھلاتے ساتھ سمجھاتے یار صاحب ایسے کام کیوں کرتا ہے جس سے تجھے مار پڑتی ہے۔ ایسے کام نہ کیا کر۔ بکرے کا گوشت پسند کرتے تھے۔ اور دیسی مرغ کا گوشت فارمی مرغی کے خلاف تھے کہ جو خود اتنی ڈھیلی ہے اس میں کیا طاقت ہوگی۔ کثرت سے گوشت لیکر آتے اور زیادہ مقدار میں لاتے کھانسی ہلکی سی بھی آجاتی تو فورا دیسی مرغے کا گوشت آجاتا امی جی کو کہتے چوہدری صاحب دیسی مرغے دا شوربہ بنا کے صاحب نوں پانی دی تھاں دئیو انشاء اللہ ٹھیک ہو جائے گا۔ کھانے اور پھل وہ ہمیشہ کوالٹی کے پسند کرتے تھے۔ گاؤں سے جب شہر آیا تو انھوں نے مجھے سائیکل لیکر دی میرا صاحب سکول سائیکل پر جایا کر۔کالج میں پہلا دن تھا تو مجھے نئی موٹر سائیکل لیکر دی کہنے لگے یار صاحب اس راستے سے جانا جس پر ویگن اور بسیں نہ ہوں۔ یار صاحب کالج کے لڑکے بسوں والوں سے لڑائی جھگڑا کرتے ہیں آپ کا ان سے لینا دینا کچھ نہیں ہے تو آپ نے ایسا نہیں کرنا ۔ مجھے جی ابا جی کے علاؤہ کچھ کہنا نہیں آتا تھا۔ آئی کام کرنے کے بعد میں بی کام میں داخل ہوگیا۔والدہ سوچتیں تھیں کہ چارٹرڈ اکاؤنٹنٹ بنے گا۔ میں نے ایک دن والد صاحب کو بتایا اباجی میں نے نیشنل کالج آف آرٹس لاہور میں داخلہ لینا ہے کہنے لگے کیوں صاحب۔ اباجی جی چارٹرڈ اکاؤنٹنٹ ساری زندگی لوگوں کے پیسوں اور فراڈ کا حساب کتاب لگاتے رہتے ہیں ۔ یہ میرے سے نہیں ہوگا۔ میرے لیے تو میرا اپنا حساب دینا ہی مشکل ہے۔چل میرا صاحب اور ابا جی مجھے لاہور بھائی منظور اور باجی امتیاز کے پاس چھوڑ آئے ۔ اور میں نیشنل کالج آف آرٹس لاہور میں سید اختر صاحب اور استاد زاھد الحق کی زیرنگرانی ٹیسٹ کی تیاری کرنے لگا۔ الحمدللہ میں ٹیسٹ پاس کرکے داخل ہوگیا ۔ میرے ابا جی نے مجھے کار لیکر دی جو میں لاہور لیکر نہیں گیا موٹر سائیکل ہی استعمال کرتا رہا کہ خرچہ بہت بڑھ جائے گا۔ آن لائن کا زمانہ نہیں تھا تو اباجی باجی امتیاز کو پیسے دے آتے اور میں ان سے لے لیتا تھا۔باجی امتیاز میری خالہ زاد بہن ہیں اور میری ماں جیسی ہیں ہمیشہ میری ماں کی طرح خیال رکھا اللہ تعالیٰ صحت کے ساتھ ایمان والی زندگی عطا فرمائے آمین ۔ میں ان کے احسانات اور محبت کبھی نہیں بھلا سکتا۔ اور ماں کے احسانات کون واپس کرسکتا ہے۔ انکے میاں بھائی منظور اباجی کے کزن تھے ہم انکو چچا کی بجائے بھائی منظور ہی کہتے تھے۔ اللہ تعالیٰ جنت الفردوس میں انکو اعلیٰ مقام عطا فرمائے آمین بہت خیال رکھتے تھے ۔ میں اگر کسی ویک اینڈ پر باجی کے گھر نا جاتا تو بھائی منظور خود لینے ہاسٹل آجاتے تھے۔ یار کی گل اے آج آیا نہیں کمال پیار کرنے والے انسان تھے۔ اللہ تعالیٰ کامل مغفرت فرمائے آمین ۔
کبھی بھی اباجی نے پیسے کم نہیں ہونے دئیے۔ جب بھی باجی کے گھر جاتا تو باجی خود کہتیں بیٹے کتنے پیسے چاہیں میں جتنے کہتا باجی پیسے دے دیتیں۔ مجھے نہیں پتہ ابا جی کتنے پیسے وہاں باجی پاس جمع رکھتے تھے۔ ایک دن کیمرہ لینا تھا میں نے کہا ابا جی کیمرہ لینا ہے کہنے لگے یار صاحب اپنی باجی سے پیسے لے لو۔ ابا جی مہنگا ہے آٹھ یا نو ہزار کا آئے گا یار کوئی گل نئیں باجی سے لے لو۔ میں باجی پاس گیا باجی نو ہزار چاہیں باجی نے دے دئیے ۔ بیٹے خالو جی کو فون نا کیا کر مجھے بتایا کر تمھارے لیے بہت سے پیسے خالو جی میرے پاس رکھتے ہیں۔ مجھے نہیں یاد کبھی بھی زندگی میں کوئی کمی ہونے دی ہو۔ راولپنڈی جب آئے تو کچھ وقت کے بعد ائرکنڈیشن گھر میں لگ گیا تھا 1986 میں جب اپنا گھر بنا تو ہر کمرے میں ائرکنڈیشن لگوا دیا۔ آج بھی گھر میں ماشاءاللہ سات ائرکنڈیشن اباجی کی یاد تازہ کرواتے ہیں ۔ ابا جی کی محبت اور شفقت دیکھ کر میرا اللہ پر ہمیشہ یقین پختہ سے پختہ ہوتا گیا۔ کہ والد صاحب اتنا خیال رکھتے ہیں تو اللہ تعالیٰ کتنا رکھتے ہوں گے۔ جب والد صاحب نے ساری زندگی ٹھنڈ میں رکھا ہے تو یقیناً اللہ تعالیٰ اس سے بہتر حالات میں رکھیں گے انشاء اللہ ۔
نیشنل کالج آف آرٹس کی پڑھائی بہت مہنگی تھی ۔ اوپر سے فوٹوگرافی کا شوق ابا جی نے کبھی اف نہ کہا۔اللہ تعالیٰ انکو جزائے خیر دے آمین ۔ جب تک وہ ساتھ رہے ہمیں ٹھنڈ میں ہی رکھا کبھی احساس نہیں ہونے دیا کہ زندگی کتنی مشکل ہے۔ مجھے ہمیشہ احساس رہا کہ اتنی محبت ممکن نہیں جتنی وہ ہم سے کرگئے۔ میرے اباجی کو یقین تھا کہ میرا بیٹا ایک دن صاحب بنے گا ۔ اس لیے وہ مجھے ہمیشہ صاحب کہہ کر ہی بلاتے تھے۔ جب بہت خوش ہوتے تو مجھے گلے لگا کر رونے لگ جاتے یار صاحب تو نے خوش کردیا۔ کوئی میری امی جی کے سامنے بھی میری تعریف کرتا تو امی جی بھی رو دیتیں تھیں۔ میرے پاس جب بھی پیسے نہیں ہوتے تو میں پینٹ کوٹ باقاعدگی سے پہنتا ہوں پسند مجھے جینز اور شرٹ ہے۔ جب بھی پینٹ کوٹ پہنتا تھا وہ چپکے سے میرے پرس میں دس یا پندرہ ہزار رکھ جاتے۔ وہ سمجھ جاتے اس کے پاس پیسے نہیں ہیں۔الحمدللہ جب بھی ابا جی نے حکم کیا میں نے بھی تعمیل کی۔میری بیوی انکی خزانچی تھی ۔ وہ ابا جی کے اشارے سمجھ جاتی تھی جی ابا جی کہتی اور تعمیل کر دیتی میں ہمیشہ اس کے پاس پیسے رکھواتا ہوں۔ ابا جی ہمیشہ کہتے میری یہ بیٹی بہت اچھی ہے۔ میں ہنستا تھا کہ یار تمھیں کیسے پتہ چلتا ہے اباجی نے کتنے پیسے کہے ہیں وہ ہنستے ہوئے کہتی یہ میرا اور میرے ابا جی کا معاملہ ہے آپ کو کیوں بتاؤں ۔ میری شادی والدین کی پسند سے ہوئی اور انکا یہ بھی میرے اوپر بہت بڑا احسان ہے کہ اتنی وفا شعار اور شاندار خاتون میری زندگی میں لیکر آئے۔ اپنی پوتیوں سے بھی ابا جی کا خاص پیار تھا ۔ میں کبھی بیٹیوں سے ناراض ہو جاتا تو رونے لگ جاتے کہتے یار صاحب بیٹیوں سے ناراض نہیں ہوتے چل صلح کرلے معاف کردے۔
ابا جی کا صاحب اب صاحب تو بن گیا ہے سارا زمانہ صاحب کہتا ہے پر جن کا خواب تھا کہ میں صاحب بنوں۔ وہ اب میرے پاس نہیں ہیں ۔ سب احباب سے میرے والدین کیلئے خصوصی دعاؤں کی درخواست ہے ۔ دسویں عید انکے بغیر آرہی ہے وہ سب سے پہلے مجھے اٹھاتے تھے یار صاحب جلدی سے تیار ہونا عید کی نماز کیلئے جانا ہے اور ہم اکٹھے نماز عید کیلئے جاتے تھے۔ ابا جی یار بہت یاد آندے او ۔ قسمیں باپ کے ہوتے کوئی فکر نہیں ہوتی۔ مجھے یاد ہے کہتے تھے ۔ یار تو فکر نہ کرمیں تیرے نال آں ۔ اب کون کہے؟

The post یار فکر نہ کر appeared first on Muhammad Azhar Hafeez.

6 اکتوبر 1989 میں ڈاکٹر ظہیر مرحوم ایک اوورسیز پاکستانی نے پاکستان میں شفا انٹرنیشنل ہسپتال کی بنیاد رکھی ۔ اور یہ ہسپتال بنا کر کمال کردیا۔ پاکستان میں ہسپتالوں کا کلچر ہی تبدیل کردیا۔ سٹیٹ آف دی آرٹ ایمرجنسی کئیر سٹارٹ کی گئی۔ پاکستان میں اپنی نوعیت کا پہلا انٹرنیشنل ہسپتال تھا۔ جہاں ہر سہولت لواحقین کے سوچنے سے پہلے دستیاب ہو جاتی تھی۔ ہم اور ہمارے دوست بہترین کئیر کیلئے ہمیشہ شفاء انٹرنیشنل ہسپتال کا ہی حوالہ دیتے تھے۔ چند دن پہلے ایمرجنسی میں اپنی ساس صاحبہ کو لے جانے کا اتفاق ہوا انکی طبیعت شدید خراب تھی۔ اور ہسپتال کی ایمرجنسی میں کوئی اٹینڈنٹ کوئی ڈاکٹر موجود نہیں تھا۔ ایمرجنسی کی گنجائش سے چار گنا مریض موجود تھے۔ میری زوجہ محترمہ جو خالص ایک گھریلو خاتون ہیں۔ باربار مجھے کہیں کسی سے فون کروائیں۔ بہت دفعہ سمجھایا کہ یہ سب سے بہترین ہسپتال ہے آپ فکر مند نہ ہوں۔ ہر ممکن طرح سے مایوس کیا گیا۔ ایکسرے مشین مصروف ہے، الٹراساؤنڈ مشین کا وقت دے دیا ہے۔ کرتے کرتے ساری رات گزر گئی تکلیف کچھ کم ہوئی تو گھر لے جائیں۔ گھر جا کر پھر تکلیف میں اضافہ ہوا تو دوبارہ لاکر ایڈمٹ کروادیا۔ اور ذلالت دوبارہ سے شروع ۔ ڈاکٹر کو کہہ دیا ہے آرہے ہیں تین دن اسی کشمکش میں گزر گئے متعلقہ ڈاکٹر نہیں آیا۔ ہر دفعہ نرسنگ سٹاف کے پیچھے مقامی ہسپتالوں کی طرح بھاگتے رہے، ڈرپ ختم ہوگئی ہے، کنولا تبدیل کردیں، دوائی کا وقت ہوگیاہے۔ نیبولایئزر کی دوائی ختم ہوگئی بند کردیں۔ رات تین بجے ایم آر آئی مشین خالی ہوگئی ہے مریض کو لے چلیں جی بہتر۔ ہر وہ کوشش جو سرکاری ہسپتال کا وطیرہ تھا وہ شفاءلوکل ہسپتال نے بھی سیکھ لیا ہے۔ پانچ دن بعد صبح ڈاکٹر صاحب تشریف لے آتے ہیں ، دیکھیں مریض کی آج ایم آر آئی کروائیں جی وہ تو رات کو ہوگئی تھی اچھا فائل میں ذکر ہی نہیں ہے۔ پانچ دن میں سو سے زیادہ ٹیسٹ کروانے کے باوجود بیماری نہیں ملی۔ نمونیہ کا ٹریٹمنٹ سٹارٹ کردیا ہے، ریڑھ کی ہڈی کی نیوروتھراپی شروع کروائیں، پین مینجمنٹ والوں کو بلایا ہے۔ یہ سب کچھ پانچ دن چلتا رہا اور آج ڈسچارج کردیا کہ گھر پر یہ ڈرپس لگوائیں، پیر کو اوپی ڈی میں آکر جو ڈاکٹر موجود نہیں تھے انکو چیک کروائیں ۔ پھر انکے مسئلے کو دیکھتے ہیں شاید مزید انوسٹیگیشن اور ٹیسٹوں کی ضرورت ہوگی۔ اچھے وقت پر ڈاکٹر ظہیر مرحوم انتقال فرما گئے ورنہ ان سے شاید انکے اس انٹرنیشنل پراجیکٹ کے لوکل حالات برداشت ہی نہ ہوتے۔ مجھے سمجھ نہیں آ رہی یہ ڈاکٹر ظہیر کا پاکستان کے لوگوں پر احسان تھا یا سزا۔
جتنے اچھے ہسپتالوں میں گئے اچھے ڈاکٹر یا نرسنگ سٹاف سے بات ہوئی تو پتہ چلا یہ شفاء انٹرنیشنل ہسپتال کے ٹرینڈ ہیں۔ انکو بڑی دعائیں دیتے تھے کہ شفاء انٹرنیشنل ہسپتال کی وجہ سے سب بڑے ہسپتالوں کو بہترین سٹاف مل گیا۔ لیکن یہ نہیں پتہ تھا کہ پیچھے خود شفاء انٹرنیشنل ہسپتال سے لوکل ہسپتال میں تبدیل ہوچکاہے۔ جو ڈاکٹر اور نرسنگ سٹاف گیا انکی جگہ بہتر لوگ رکھنے کی کوشش ہی نہیں کی گئی۔ گارڈ بہت زیادہ بڑھا لیے ہیں۔ تاکہ مارپیٹ سے بچا جاسکے۔ حالانکہ بڑھانے ڈاکٹر اور نرسنگ سٹاف چاہیے تھا۔ مجھے امید ہے جلد ہی شفاء لوکل ہسپتال صرف ایک لیبارٹری ہی رہ جائے گا کہ جو مریض آئے اسکے زیادہ سے زیادہ ٹیسٹ کرکے پیسے کمائے جائیں۔ مریض اور لواحقین ٹیسٹ کروانے میں مصروف رہیں اور ڈاکٹر کی ضرورت نہ پڑے۔
ڈسچارج پیپر پر صرف مریض کا نام اور دوائیں درج تھیں ان سے درخواست کرکے گھر پر ٹریٹمنٹ کے متعلق لکھوایا گیا۔ اب گھر پر نرسنگ سٹاف بلوا کر ڈرپس اور اینٹی بائیوٹکس لگوا رہے ہیں ۔ جو لکھ کر دی گئی ہیں۔ جو ڈاکٹر موجود نہیں تھے ان سے اب او پی ڈی میں ملاقات ہوگی ۔ ایک اسی سالہ بزرگ مریض کو بار بار ہسپتال لیجانا کتنا آسان ہے آپ سب بھی جانتے ہیں۔ شفاء لوکل ہسپتال کی موجودہ انتظامیہ کو فورا توجہ دینی ہوگی ورنہ یہ ٹائٹینک جہاز بھی ڈوب جائے گا۔ یہ گارڈز رکھنے سے نہیں ڈاکٹر اور نرسنگ سٹاف رکھنے سے اپنے معیار کو شاید بحال کرلے۔ ورنہ گیا وقت کبھی واپس نہیں آیا ۔
مجھے دکھ ہے ایک انٹرنیشنل ہسپتال کو بڑی محنت سے لوکل ہسپتال بنا دیا گیا۔ افسوس صد افسوس۔ لاکھوں کا بل اور ٹکے کا علاج نہیں۔
سارے ٹیسٹ اور رپورٹس ہسپتال کے ریکارڈ میں ہیں تاکہ مریض کسی دوسرے ہسپتال میں بھی چیک اپ نہ کرواسکے۔

The post شفاء لوکل ہسپتال اسلام آباد appeared first on Muhammad Azhar Hafeez.

ماں باپ کے جانے سے جہاں سب کچھ ختم ہو جاتا ہے۔ وہاں نیند کا وہ مزا بھی ختم ہو جاتا ہے کہ پانچ منٹ بعد اٹھتا ہوں بس تھوڑی دیر اور۔
میری والدہ سکول میں ہیڈ مسٹریس تھیں۔ وقت کی بہت پابند تھیں۔ اور میری اس عادت سے بہت تنگ تھیں جب بھی سکول جانے کیلئے اٹھاتیں تو میری آواز آتی امی جی اٹھتا ہوں بس پانچ منٹ اور سونے دیں ۔ وہ میری اس عادت سے بے انتہا تنگ تھیں کئی دفعہ روہانسی ہو کر کہتیں محمد اظہر حفیظ تمھاری اس پانچ منٹ کی نیند کے پیچھے میری نوکری چلی جانی ہے۔ شاید چلی بھی گئی جب راولپنڈی شفٹ ہوئے تو امی جی کو نوکری چھوڑنی پڑی اور مجھے پانچ منٹ اور والی نیند۔
کل صبح اٹھنے کو دل نہیں چاہ رہا تھا۔ دل کر رہا تھا کہ پانچ منٹ اور سو لوں ۔ پھر خیال آیا کہ سسٹم میں یہ سہولت اب میسر نہیں ہے امی جی تو 2011 میں اللہ تعالیٰ پاس چلیں گئیں تھیں۔ میں گیلی آنکھوں کے ساتھ اٹھ کھڑا ہوا اور احساس ہوا کہ یہ سہولت تو صرف والدین کی زندگی میں ہی ہوتی ہے۔ میری چھوٹی بیٹی کو جب اس کی ماں اٹھاتی ہے عبیرہ بیٹے اٹھو سکول جانے کا وقت ہوگیا ہے تو آواز آتی ہے بس پانچ منٹ اور۔ تو میرا دل کرتا ہے کہ اپنی بیگم سے کہوں چل سولینے دے اس کی تو ماں زندہ ہے۔ سکول تو روز ہی جاتے ہیں۔ کون سے بورڈ کے پرچے مس ہو جانے ہیں ۔
ابھی بچوں سے پوچھا اجکل میٹرک میں پاسنگ مارکس کتنے ہوتے ہیں تو سب بچوں کی آواز آئی 33فیصد۔ جتنا بچوں کو پڑھایا جاتا ہے سارا دن عبیرہ پڑھ لو، عبیرہ سکول کا وقت ہوگیا، عبیرہ اکیڈمی کا وقت ہوگیا، عبیرہ ہوم ورک کرلو۔ مجھے محسوس ہونا شروع ہوگیا تھا کہ شاید اب پاسنگ مارکس 100فیصد ہوگئے ہیں۔
کیونکہ جب رزلٹ آتا ہے تو اخبار میں خبر آتی ہے اس دفعہ 1100میں سے 1100، سو سے زائد بچوں نے حاصل کئے۔
جبکہ ہمارے دور میں جیت اسکی ہوتی تھی جو 850 میں سے 281 نمبر لیکر پرانے میڑک کی ڈگری حاصل کرلیتے تھے۔ ساری زندگی لوگوں کی زندگی یہ سنا سنا کر برباد کر دیتے ہیں کہ سی ایس ایس کرنے والے بھی چھٹی کی درخواست میرے سے انگریزی میں لکھوانے آتے ہیں۔ کیا بات تھی پرانے میٹرک کی۔ یوں لائق لوگوں سے ہمیشہ فاصلہ ہی رکھا۔ کہ ہم کہ ٹھہرے اجنبی اتنی پڑھائیوں کے بعد۔
او پی ایف کالج میں پڑھاتے تھے۔ ایک صاحب اپنے کاغذ دے گئے جاب کیلئے ۔ فوٹوگرافی اور ویڈیو گرافی پڑھانا چاہتے تھے ۔ کراچی سے میٹرک سائنس کے ساتھ کیا ہوا تھا۔ ہائیر ایجوکیشن کمیشن نے بی ایس کے سٹوڈنٹس کو پڑھانے کیلئے بی ایس یا ایم ایس کی شرط نئی نئی رکھی تھی۔ میں نے ان سے معذرت کی کہ سر آپ ہمارے سینئر ہیں پر ہماری مجبوری ہے ہائیر ایجوکیشن کمیشن کے اصولوں کے مطابق چلنا۔ اب وہ اجازت نہیں دیتے کہ میٹرک پاس بی ایس کو نہیں پڑھا سکتے۔ تو غصے سے گویا ہوئے ارے میاں ان جاہل ہائیر ایجوکیشن کمیشن کے لوگوں کو بتاؤ کہ ہم نے کراچی سے میٹرک سائنس کے ساتھ کیا ہوا ہے۔ پرانے میٹرک کی قدر وہ جانتے ہوں گے۔ میں نے پوچھا سر ناراض نہ ہوں کیا پہلے میٹرک بی اے کے بعد ہوتا تھا کیا۔ اور وہ ناراض ہوکر چلے گئے۔اج تک واپس نہیں آئے مجھے بھی بہت شرم محسوس ہوئی پرانے میٹرک کو چیلنج کرکے۔
کبھی کبھی دل کرتا ہے ایک دفعہ پرانا میٹرک بھی کرہی لیا جائے۔ تاکہ پتہ چل سکے وہ کیا پڑھتے تھے۔
ہم نے میٹرک تک پانچ سال عریبک پڑھی۔ پر جنہوں نے فارسی پڑھیں جب بھی انکا دل کرتا علمیت جھاڑنے کو وہ کوئی نہ کوئی فارسی کا شعر سنا کر علم کے جھنڈے گاڑ دیتے تھے۔ ہمیں سمجھ تو شعر کبھی نہیں آیا بس واہ واہ ضرور کی۔ اظہر نیاز بڑے بھائی ہیں اکثر شعر ٹھیک کرتے رہتے ہیں یار اس کی گرامر غلط ہے یہ وزن میں نہیں ہے میں بس اتنا ہی کہتا ہوں بھائی جان شوق شاعری کا ہے پر شعر کسی اور کا ہے۔ کل کہنے لگے اس نے شاید ٹھیک ہی لکھا ہوگا نقل کرنے والوں نے تبدیل کردیا ہوگا ۔ وہ ایک محقق ہیں یقیناً انکی بات درست ہوگی۔ کل دفتر سے چھٹی ہے پکا ارادہ کیا ہے صبح پانچ منٹ اور سوؤں گا ۔ اپنی امی جی کی یاد میں ۔ سنا ہے دریا خشک بھی ہو جائیں پر ریت سے ٹھنڈک نہیں جاتی۔
سب ماؤں کیلئے ڈھیروں دعائیں ۔ جو زندہ ہیں انکی سلامتی کی اور جو اللہ تعالیٰ پاس ہیں ان کی کامل مغفرت کی آمین

The post پانچ منٹ appeared first on Muhammad Azhar Hafeez.

گاڑی ضروریات زندگی کا اہم جزو بن چکی ہے۔ کچھ عرصے سے سوچ رہا تھا کہ گاڑی تبدیل کر لوں حالانکہ اس کی کوئی خاص ضرورت بھی نہیں تھی۔ اپنے بجٹ اور سہولت کے مطابق مختلف گاڑیاں دیکھنا اور پڑھنا شروع کیں۔ کس میں کیا خصوصیات ہیں اور کیا خامیاں ہیں۔ کیا سپورٹیج پیٹرول ایوریج کم ہے، ہنڈا بی آر وی پیٹرول ایوریج اچھی ہے کمفرٹ کم ہے اور اندر سے سب کچھ نظر آتا ہے، ہنڈا سوک اچھی گاڑی ہے پر بہت نیچے ہے۔ ٹیوٹا جو ایک دفعہ ہونڈا استعمال کرلے وہ کسی اور گاڑی کا نہیں رہتا۔ ہیول گاڑی بہت اچھی ہے پر اون پر ملتی ہے۔ اس طرح ہر طرح کی گاڑی کو سٹڈی کیا۔ میں گاڑی لینے کیلئے تیار بیٹھا تھا کہ وسیم احمد بھائی لاہور سے آگئے ان سے بات ہوئی تو کہنے لگے یار اگر تو فالتو پیسے ہیں تو لے لو اگر تنگ ہوکر لینی ہے تو ہرگز یہ قدم نہ اٹھا۔ ان کی ہر بات سر آنکھوں پر۔ وہ گئے تو کچھ دن بعد اسلام آباد کی مشہور ژالہ باری ہوگئی۔ بہت زیادہ گاڑیوں کا نقصان ہوا کچھ ڈینٹ ہماری گاڑی کو بھی پڑ گئے۔ نقصان تو ہوا پر تکلیف کوئی نہیں ہوئی۔ میرے دوست ہیں تیمور ہنڈا کے ماہر ہیں ان سے بات ہوئی بھائی یہ ڈینٹ نکلوا دیں کہنے لگے اظہر بھائی نکلتے نہیں ہیں بہتر ہے اسی طرح چلائیں جب بیچنی ہوئی تو ڈینٹر کے پیسے مائنس کرکے لاکھ سستی بیچ دیجئے گا۔ مشورہ اچھا تھا عمل کیا گاڑی بہترین چل رہی ہے۔
کچھ دوستوں کابہت زیادہ نقصان ہوا۔
ابھی ژالہ باری کا دکھ کم نہیں ہوا تھا کہ مزید بارشوں نے آلیا ۔ پھر جو منظر دیکھے وہ سب برابر تھے پانی ہر گاڑی کو اسی سپیڈ سے بہارہا تھا۔
وہ شعر یاد آگیا
ایک ہی صف میں کھڑے ہوگئے محمود و ایاز
نہ کوئی بندہ رہا اور نہ بندہ نواز
سب گاڑیاں ایک ہی صف میں بہہ رہیں تھیں۔
یہ کہانی شروع ہوتی ہے سوات میں ایک ہی فیملی کی بے بسی کی اموات سے جو سیلاب میں بہہ گئے۔ ان کی اموات پر آسمان وہ رویا کہ سب کچھ ہی بہی جارہا ہے۔ کبھی بابو سر ٹاپ کے پاس گاڑیاں سیلاب میں بہہ رہی ہیں اور کہیں سید پور ویلج میں گاڑیاں بہہ رہی ہیں۔ کہیں ڈی ایچ اے میں باپ اور بیٹی گاڑی میں بہہ جاتے ہیں اور کہیں شفٹ کی گاڑی چلانے والا جواںن ایک ٹیچر کے ساتھ بہہ جاتا ہے۔
بادل پہلے بھی پھٹتے تھے پر کئی کئی سال کے بعد سننے کو ملتاتھا۔ اب تو یہ روز کا معمول بن گیاہے۔
راول ڈیم جو مکمل خشک ہونے کے قریب تھا چندبارشوں سے ہی مکمل بھر گیا ہے۔ اس کے سپل ویز کھولے جارہے ہیں۔ دریائے سواں کو بھی پہلی دفعہ غصے میں بپھرے دیکھا گیاہے۔ اب لوگوں کو سواں پر ڈیم کا آئیڈیا بھی یاد آگیا ہے۔ خشک دریاؤں نے اپنے پرانے راستے بحال کرلیے ہیں راستے میں آنے والی تمام رکاوٹیں ہٹا دی ہیں۔ سب سوسائٹیاں ایک برابر ہیں ۔ بحریہ ٹاون، ڈی ایچ اے، سید پور ویلج ایک برابر ہیں۔
سب شہر ایک برابر راولپنڈی ، اسلام آباد ، لاہور، کراچی، چکوال اور حافظ آباد ۔
کچھ دوست پانی کو محفوظ کرنے والے کنوئیں بنا رہے ہیں کچھ لوگ گرے ہوئے درخت اٹھا رہے ہیں اور کچھ لوگ میتیں اٹھا رہے ہیں ہر ایک کی مشکل الگ ہے۔
گاڑی والا آئیڈیا تو اب نہیں رہا کیونکہ اب سب گاڑیاں بھی ایک برابر ہیں ۔ گاڑی جو بھی ہو۔ بہہ ہی جانی ہے۔
اگر ہم ایک کام کریں اللہ کی رضا میں راضی ہوجائیں اور اپنے دماغ لڑانے بند کر دیں۔ تب ہی ممکن ہے کہ سہولت ہو جائے۔
بہت چھوٹے تھے برسات کے
موسم میں اکثر لوگ چھتوں پر چڑھ کر اذانیں دیتے تھے کہ یہ مشکل ٹل جائے۔ آجکل دعا سوشل میڈیا پوسٹ تک محدود ہے۔
ہم سمجھتے ہیں پاکستان ایک پسماندہ ملک اور امریکہ ایک سپر پاور دونوں ممالک میں پانی ایک برابر ہی کھڑا ہے۔ اس لیے یاد رکھیں اللہ ہی سب سے بڑا اور طاقت والا ہے۔ اس کے آگے سب سر بسجود ہو جائیں تو بات بنے ۔

The post گاڑی appeared first on Muhammad Azhar Hafeez.

زندگی گزار دی ہم نے ۔ زندگی نے بہت سبق سکھائے اور بلآخر زندگی کو میں نے استاد مان لیا۔
پچاس سال زندگی کے بہت صحت مند گزرے یہاں تک کہ جسم پر کسی چوٹ کی شناختی علامت بھی نہ تھی۔ زیادہ سے زیادہ بخار ہوگیا یا پھر پیٹ خراب ہوگیا باقی سب بہترین تھا۔ والدہ محترمہ کے ساتھ زندگی کے اکتالیس حسین سال گزارے اور والد محترم کے ساتھ زندگی کے پینتالیس سال بہترین سال گزارے۔ زندگی میں ان دونوں نے اللہ کے فضل سے کبھی کسی محرومی کا شکار نہیں ہونے دیا، ہر چیز بروقت مہیا ہوئی الحمدللہ ۔گیارہ سال زندگی کے گاؤں میں گزارے وہ بھی بہترین تھے اور چوالیس سال اسلام آباد میں گزار لیے لیکن میں گاؤں سے نہیں نکل پایا ۔ جتنا میرا گاؤں بہترین تھا شاید اتنا اچھا اسلام آباد نہیں ہے۔ میرے گاؤں بہت پر امن تھا کبھی کوئی راستہ بند نہیں ہوا کبھی کوئی کنٹینر نہیں دیکھا تھا۔ نہ ہی میرے گاؤں میں سیلاب آتے تھے۔ بہت زیادہ بارشیں ہو جائیں تو سکول کے پلاٹ جن میں بیٹھ کر پڑھتے تھے پانی سے بھر جاتے تھے۔ کچھ ماہ میں وہ بھی خشک ہو جاتے تھے۔ خالہ سرداراں کے گھر سے لسی لیکر آتے تو وہ اس میں مکھن کا پیڑا بھی رکھ دیتیں تھی۔ یہ صرف گاؤں میں ہوتا ہے۔ پراٹھے کے ساتھ مکھن اور اس پر چینی دنیا کا بہترین کھانا تھا۔ آج بھی اتنا ہی پسند ہے ۔ پر کیا کریں تینوں چیزیں اکٹھی تو کیا الگ الگ بھی بند ہیں ، پراٹھا،مکھن اور چینی۔
لیکن اگر یہ تینوں چیزیں ایک جگہ دستیاب ہوں تو اس بندش کو توڑا بھی جاسکتا ہے۔ میری زندگی پر ڈاکٹروں نے بہت سے تجربے کیئے۔ کبھی کھیرے اور کوار کا جوس تو کبھی کدو کا سلش ، کبھی ابلے ہوئے ٹینڈے، تو کبھی سلاد تین وقت، سب الحمدللہ پڑھ کر کھا گئے ۔ کبھی شکوہ نہیں کیا پھر میرے رب نے دنیا کی تمام بہترین حلال اشیاء کھانا بھی نصیب فرمائیں۔ پھر جگر کے مسائل کا سامنا کچھ ماہ رہا اور بڑی بیٹی نے جگر دیا اور الحمدللہ دوبارہ سے صحتمند زندگی شروع۔
گاؤں سے پنجم تک پڑھا راولپنڈی سے میٹرک کیا اسلام آباد سے آئی کام کیا پھر لاہور سے ماسٹرز کیا اور پھر ایم فل اسلام آباد سے کیا یوں سولہ سال کی تعلیم مکمل کی ۔ ڈاکٹریٹ بھی ہو جانا تھا پر جگر راستے میں حائل ہوگیا۔ بہت سے اچھے لوگوں سے واسطہ رہا اور کچھ سے اب بھی ہے۔ پہلی دفعہ فلٹر کیمرے کے لینس پر لگایا اور پھر دوستوں پر بھی لگایا اب چند گنتی کے دوست ہیں شکر الحمدللہ ۔ زیادہ تر خود ہی چھوڑ گئے۔ شاید میرے اندر ہی کوئی کوتاہی ہوگی۔ اللہ تعالیٰ انکا بھلا کرے۔ کبھی زندگی کے بارے میں منفی نہیں سوچا ۔ ہنستے ہنستے گزار دی۔ زیادہ خوش ہوں تو رو پڑتا ہوں ۔ شاید یہ سہولت اب بڑے بھائی کے ساتھ ہی ہے۔ یا کبھی کبھار بیوی بچوں کے ساتھ بھی۔ الحمدللہ میرے رب نے کبھی پریشان نہیں ہونے دیا ۔ ہر چیز کا مصرف سکھایا ۔ زندگی کے پینتیس سال روزانہ اٹھارہ سے بیس گھنٹے کام کیا۔ صرف طبعیت کی خرابی کی صورت میں چھٹی کی۔ پہلی دفعہ دفتر سے تین ماہ کی چھٹی لی بغیر کسی وجہ کے ۔ آرام کرتا ہوں ، واک کرتا ہوں دو وقت مختصر کھانا کھاتا ہوں اور دو آم روزانہ کھاتا ہوں ۔ پہلی دفعہ پتہ چلا یہ بھی زندگی ہے۔ روزانہ ایک نئی جگہ واک کیلئے جاتا ہوں بغیر کیمرے کے۔ واک کرتا ہوں اور مناظر دیکھ کر انکا مزا لیتا ہوں۔ ساتھ ساتھ اللہ کی شان بیان کرتا ہوں۔ نماز پڑھتا ہوں اور دین کو سمجھنے کی کوشش کرتا ہوں۔ تفہیم القرآن ایپ نے اس سلسلے میں میری بہت راہنمائی کی ۔ اللہ تعالیٰ تفہیم القرآن لکھنے والوں اور اس ایپ کے بنانے والوں کو جزائے خیر عطا فرمائے ۔ آمین۔ تقریباً ایک ماہ گزر گیا ہے دو ماہ ابھی باقی ہیں۔ مجھے اب احساس ہوا کہ ہم صرف کام کرنے کیلئے پیدا نہیں ہوئے۔ آرام کرنا بھی ایک اچھی مصروفیت ہے۔ اللہ بھلا کرے ان سب کا جنہوں نے اس موقع کا فائدہ اٹھانے میں میری مدد کی۔ میری مجھ سے ملاقات کروادی۔ جگر کی پیوندکاری سے میرے رب نے بہت آسانی سے گزار دیا بیچارے انسانوں نے کیا تکلیف دینی۔ جب بھی لوگ تعارف کرواتے ہیں یہ منسٹر کا بندہ ہے ۔ یہ ادارے کا بندہ ہے۔ یہ اپنی بیوی کا بندہ ہے۔ میں بھی بڑے فخر سے بتاتا ہوں میں رب کا بندہ ہوں ۔

‏واجب تھی جس بات پہ حیرانی بہت
ہم “لڑکھڑائے “مسکرائے اور چل دیئے

The post زندگی appeared first on Muhammad Azhar Hafeez.

میں ہمیشہ سے بے بسی کی زندگی اور بے بسی کی موت سے اللہ تعالیٰ سے پناہ مانگتا ہوں۔
ابھی بارشوں میں بہت سی ایسی اموات دیکھنے کو ملیں جب سوچتا ہوں تو روح کانپ جاتی ہے۔
سوات میں ایک مکمل فیملی کی ہلاکت کس طرح وہ مدد کو پکارتے رہے۔ بچوں کو پانی سے بچانے کیلئے گود میں اٹھالیا ایک دوسرے کے ہاتھ پکڑ لیے اللہ کانام لیتے رہے مدد کیلئے پکارتے رہے۔ سب ہلاک ہوگئے اور ہلاک ہونے والوں کی میتیں پتہ نہیں جس طرح اکٹھے سیر کیلئے آئے تھے ویسے ہی گئیں ہیں یاابھی بھی کچھ کی تلاش جاری ہے۔
ڈی ایچ اے میں بیٹی نے جب والد صاحب سے کہا ہوگا بابا بارش بہت ہے مجھے چھوڑ آئیں والد بیٹی کو بارش کے پانی سے محفوظ رکھنے کیلئے خود گاڑی پر ساتھ ہو لیے۔ بیٹیوں کا باپ ہوں تو یہ روزانہ کا معمول ہے بابا بارش ہے چھوڑ ائیں۔ سیلاب کی نظر ہوگئے والد آخری دم تک مدد کیلئے پکارتے رہے گاڑی سنبھالنے کی بھی کوشش کرتے رہے۔ والد صاحب کی میت تو مل گئی پر بیٹی کی تلاش ابھی جاری ہے ۔ گھر والوں پر جو گزر رہی ہے گھر والے ہی جانتے ہیں۔
مرنے والے تو مرگئے گھر والے روز جیتے اور مرتے ہیں۔سوچتا ہوں کیسے باپ بیٹی گاڑی میں بیٹی کو دلاسہ دیتا ہوگا انشاء اللہ کچھ نہیں ہوگا ہم نکل جائیں گے اللہ تعالیٰ ہماری مدد کریں گے میری بیٹی درود شریف پڑھو۔ استغفرُللہ پڑھو۔ بیٹے تم میرا ہاتھ پکڑ لو۔
اللہ کو یاد کرتے کرتے اللہ پاس چلے گئے۔
خیبر ٹی کی اینکر اور اسکی فیملی بابوسر کے نزدیک سیلاب میں گم ہوگئے کیسے وہ اس سیلاب میں بھی اپنے دونوں بچوں کو سنبھال رہے ہوں گے یااللہ خیر یااللہ خیر کہہ رہے ہیں گے بچے کھڑکی سے باہر نکل گئے اور گاڑی قلابازیاں لگانے لگ گئی ہوگی اور پھر سیلاب بھی ختم اور سب کچھ بھی ختم۔ میتیوں کی تلاش جاری ہے۔
لودھراں کی ڈاکٹر فیملی کیا سوچ کر سیر کے نکلے ہونگے کہ سب ساتھ چلتے ہیں اور ساتھ ہی چلتے گئے۔ اتنا کچھ ہونے کے باوجود اتنی بے بسی۔ یااللہ معاف فرما دے سب کی حفاظت فرما آمین ۔ کچھ لوگ اللہ پاس چلے گئے کچھ کی تلاش جاری ہے۔
ایک گاڑی میں ہلا گلا کرتے پانچ نوجوان دوست بھی تھے اس آفت نے انکو بھی چھپا لیا اور تلاش جاری ہے مائیں دعاگو ہیں یا اللہ تو اپنا فضل دکھا سب صحیح سلامت واپس آجائیں۔ تو سب کرسکتا ہے۔ کوئی معجزہ دکھادے۔
غزہ میں تو زندگی کی بے بسی کا حساب ہی نہیں کیونکہ گولی تو بڑا بچہ نہیں پہچانتی وہ تو بس ہلاک کرنا ہی جانتی ہے۔
ایسی آفتوں کا مقابلہ کوئی بھی حکومت نہیں کرسکتی بس دعا ہی کی جاسکتی ہے کہ یااللہ ہم سب کو ایسی آفتوں سے محفوظ رکھ آمین۔
ہر سال بارشوں کے ریکارڈ ٹوٹ جاتے ہیں اور کبھی دریاؤں کے بند ٹوٹ جاتے ہیں۔
ہم نے سیلابی بے بسی بھی دیکھی اور پانی کی کمی کی صورت میں آنے والی خشک سالی کی بے بسی بھی دیکھی۔
یاللہ ہم بہت کمزور ہیں تیرے فضل وکرم کے سہارے ہی زندگی گزارتے ہیں ہم تیرے ہر امتحان کے اگر بے بس ہیں ہم کسی امتحان میں مت ڈال آمین یا رب العالمین
جب بجلی گرجنے کی آواز آتی ہے یا زلزلہ آتا محسوس ہوتا ہے میری سب سے چھوٹی بیٹی دوڑ کر میرے گلے لگ جاتی ہے بابا جی ڈر لگ رہا ہے۔ بیٹے استفسار کرو اللہ کو یاد کرو۔
اور بے بس باپ کر بھی کیا سکتا ہے۔ رونے کو دل کرتا ہے تو رو بھی نہیں سکتا بچے پریشان ہو جائیں گے۔ پتہ نہیں کیوں مجھے محسوس ہوتا ہے یہ مرنے والے سب میرے بچے تھے میں بہت بے بس ہوں انکی مدد نہیں کرسکا۔ یااللہ مجھے معاف کردینا۔ ہمارے پاس تیرے سوا کوئی سہارا نہیں ہے۔ تو ہی ہم سب کی مدد فرمانے والا ہے۔ آمین

The post بے بسی appeared first on Muhammad Azhar Hafeez.

پاکستان ٹورزم ڈیولپمنٹ کارپوریشن اور ٹورازم کمیٹی ازبکستان کے باہمی اشتراک سے دو اگست سے سات اگست تک کیلئے ایک فوٹوگرافی ٹور کا اہتمام کیاگیا جس میں پاکستان سے پانچ فوٹوگرافرز منتخب کئے گئے۔ محمد رمضان مغل صاحب، شاھد قریشی راجو صاحب ، گلریز غوری صاحب ، طارق حمید سلیمانی صاحب اور محمد اظہر حفیظ ۔
اس ٹیم کو منتخب کرنے میں رانا آفتاب صاحب ایم ڈی پی ٹی ڈی سی اور ازبکستان کے سفیر عزت مآب علی شیر صاحب اور سیکنڈ سیکٹری سرور صاحب شامل تھے۔
ایک انتہائی خوبصورت اور معیاری سفر کا بندوست کیا گیا۔ جس میں ہر طرح کی سہولیات کے ساتھ ساتھ ڈرون لے جانے اور اڑانے کی اجازت کے مشکل مراحل بھی شامل تھے۔ اسلام آباد ائیرپورٹ سے تاشقند ائیرپورٹ تک ہر جگہ میزبانی کے بہترین انتظامات کئے گئے تھے۔ ہمارا سفر دواگست کو شروع ہوا اور دوپہر میں ہم ازبک ائیر کے ذریعے تاشقند پہنچے ۔ وقت کی پابند ازبک لوگوں کی پہلی ترجیح تھی۔ ہوائی جہاز سے لیکر بلٹ ٹرین تک ہر سواری وقت پر چلتی اور پہنچتی تھی کہیں بھی چند سیکنڈز کی تاخیر نہیں تھی۔ ہر جگہ میزبان ہمارے انتظار میں موجود تھے۔ ہماری سہولت کیلئے انگلش ٹرانسلیٹر بھی ہر جگہ ہمراہ تھے۔ ازبکستان میں بائیں ہاتھ پر ٹریفک کا انتظام ہے ہے گاڑی میں ایک ڈیوائس انسٹال ہے جسکو وہ راڈار کہتے ہیں۔ جس کی وجہ سے کوئی بھی گاڑی اوور سپیڈنگ نہیں کرتی۔ جرائم نہ ہونے کے برابر ہیں ۔ لوگ بہت مہمان نواز ہیں ۔ موسم اسلام آباد سے تھوڑا گرم ہے۔ وقت ازبکستان اور پاکستان کاایک ہی ہے۔ لوگ سادے اور محبت کرنے والے ہیں ۔کھانے میں سلاد طرح طرح کے بنائے جاتے ہیں ۔ کھانے میں گوشت کا استعمال زیادہ ہے۔ کھانا خوش شکل اور خوش ذائقہ ہے۔ ابادی میں خواتین زیادہ ہیں زیادہ جگہ وہی دوکانیں چلاتی ہیں۔ تاشقند میں ہم مختلف مقامات کی فوٹوگرافی کی اور سیٹیزن سنٹر سے ہوتے ہوئے کھانے پر پہنچے۔ لائٹنگ میں ازبک لوگ کسب کمال پر ہیں۔ تمام شہروں میں عمارات کی لائٹنگ بہت شاندار تھی۔ اگلی صبح ہم جہاز سے فرغانہ چلے گئے۔ وہاں کی عمارات اور مساجد کو فوٹوگراف کیا اور دوپہر کے کھانے پر افغانی پلاؤ کی طرز کا پلاؤ تھا پر انتہائی عمدہ کھا کر اندازہ ہوا پلاؤ کا اصل گھر فرغانہ ہے شاید ہی ان سے بہتر کہیں ایسا پلاؤ بنتا ہو۔ سارے ازبکستان میں پھل بہت خوش ذائقہ ہیں۔ آڑو ، انجیر، گرما، تربوز، انگور کیا کہنے اور خاص طور پر انکے بادام بہت خستہ اور ذائقہ دار ۔
ازبکستان کا فن تعمیر بھی کمال ہے۔ اینٹ اور نیلی ٹائل کا زیادہ کام ہے۔ چھتوں اور گنبدوں پر بہت اعلیٰ نقش نگاری کی جاتی ہے۔ صفائی میں بہت ایڈوانس ہیں۔ کہیں بھی آپ کو گندگی نظر نہیں اتی۔
زیادہ آبادی مسلمانوں پر مشتمل ہے۔ لاکھوں سیاح ازبکستان کا رخ کرتے ہیں واقعی دیکھنے کے قابل ہے۔
رات کو ہماری واپسی تاشقند ہوگئی اور اگلی صبح ہم ثمرقند کیلئے بذریعہ بلٹ ٹرین روانہ ہوگئے ٹرین کی سپیڈ 250 کلومیٹر گھنٹہ کے حساب سے تھی دو گھنٹوں میں ہم ٹمر قند پہنچ گئے اور پھر فوٹوگرافی شروع۔ ڈرون اور کیمرے سب استعمال ہورہے تھے کیونکہ مناظر ایسے تھے کہ بیٹریاں ختم ہونے پر ہی ہوٹل یاد آتا تھا۔ شاہ زندہ اور بیت ساری جگہیں قابل دید تھیں۔ امیر تیمور کے مجسمے اور مزار بھی قابل دید تھا۔ اگلے دن ہم بذریعہ ٹرین بخارا کیلئے روانہ ہوئے اور بخارا کا ایک اپنا ہی حسن تھا وہاں ہم نے علاقائی لباس اور ڈانس دیکھے اور رات کا کھانا کھایا۔ وہاں ریگستان جو کہ کچھ عمارات پر مشتمل تھا وہ ہرگز بھی ریتلا علاقہ نہیں تھا۔
اب واپسی کی تیاریاں تھی اور ہم بذریعہ بلٹ ٹرین چار گھنٹے سفر کرکے دوبارہ تاشقند پہنچے ۔ اور وہاں پھر ایک بہترین ڈنر ہمارے انتظار میں تھا۔ سوپ سلاد اور دنبے کا گوشت۔
ساتھ قہوہ جس کو چائے کہتے تھے۔ ازبک اور پاکستانی بہت سے الفاظ ایک جیسے ہیں۔ جیسے پلاو، سموسہ وغیرہ
کرنسی وہاں کی بہت سستی ہے ایک ڈالر کے بارہ ہزار پانچ سو سوم ملتے ہیں ۔ ساٹھ ڈالر کے میں نے ساڑھے سات لاکھ سوم خریدے جو جوس ، پانی وغیرہ لینے میں مددگار ثابت ہوئے۔ کچھ سووینئر بھی لیے تاکہ سفر کی یاد رہے۔ واپسی کا سفر براستہ شارجہ تھا چاکلیٹس شارجہ سے حاصل کیں اور پھر پاکستان ۔شکریہ پی ٹی ڈی سی اور ازبک ایمبیسی پاکستان اتنے اچھے انتظامات کیلئے ۔ جلد ہی نمائش کی صورت میں اور سوشل میڈیا پر آپ ہم سب کا کام دیکھ سکیں گے انشاء اللہ

The post سفر ازبکستان appeared first on Muhammad Azhar Hafeez.

تحریر محمد اظہر حفیظ

جنوری 2022 میں جب میرا لیور ٹرانسپلانٹ ہوا تو مجھے اندازہ نہیں تھا کہ میری اگلی زندگی کیسے گزرے گی۔ کہ میں دوبارہ کیمرا اٹھا سکوں گا یا نہیں۔ کیونکہ اکیلی پی ٹی وی کی نوکری سے میرا گھر نہیں چلتا تھا۔ تو میں نے کچھ کاروبار کرنے کیلئے سوچنا شروع کردیا۔
میرے ماموں زاد بھائی عثمان شاہ اور علی فراز سے روزانہ ملاقات ہوتی تھی اور وہ اکثر لوبرڈز کا تذکرہ کرتے۔ کہ ہم بریڈ کروا رہے ہیں۔ میں سرجری کے بعد تین ماہ کیلئے لاہور میں ہی تھا بستر پر لیٹا پڑھتا رہتا۔ اس دوران مختلف ویڈیوز لوبرڈ بریڈنگ کے حوالے سے سامنے آئیں۔ ان میں زیادہ تر یاسر خان روکھڑی صاحب اور نوید شیخ صاحب کی ویڈیوز تھیں۔ یاسر خان روکھڑی صاحب مختلف برڈز کی پرافٹ فیزیبلٹی بتاتے تھے اور نوید شیخ صاحب اپنی فتوحات بتاتے تھے۔ پھر پتہ چلا کہ ہماری فیملی میں سے محسن ظفر صاحب اور حامد اسحاق صاحب بھی اس کام کے ماہر ہیں۔ میں اس کام کو سٹڈی کرتا رہا اور جولائی 2022 میں میں نے دو کام شروع کرلیے پہلا آرٹیفیشل جیولری کا آن لائن بزنس تھا جس میں میرے دوست کے بیٹے عثمان ظفر صاحب میرے ساتھ شامل تھے۔ اور دوسرا کام برڈ بریڈنگ کا سیٹ اپ تھا۔ جیولری کا کام تقریباً دو لاکھ نقصان کے ساتھ بند کردیا کچھ ماہ ہی چلا۔ اور برڈ بریڈنگ میں میں نے ہر طرح کے تجربات کیے۔ لوبرڈ میں فشر، کامن لٹینو، پاربلو اوپلائن، البینو ریڈ ائی، کریمینو، ڈیکینو، پیل فیلو اورڈن فیلو تک تمام برڈ بریڈ کروائے۔ جاوا میں تمام قسم کی جاوا بریڈ کروائیں، گولڈین میں بھی مختلف قسم کی گولڈین بریڈ کروائیں۔ فینچز بھی مختلف قسم کی بریڈ کروائیں۔ کاک ٹیل بھی بریڈ کرائے۔ پہلے ایک چھوٹا کمرہ اگلے صحن میں پرندوں کے مطابق بنوایا جسمیں ہوا کے گزرنے کا بہترین انتظام کیا جس میں 24 پئیر باآسانی لگ گئے اور پھر گھر کے پچھلے صحن میں بھی ایک کمرہ بنایا جو کہ ایک بڑے سائز کا کمرہ تھا جس میں 52 پئیر باآسانی لگ جاتے تھے کالونیاں اس کے علاؤہ تھیں الحمدللہ اب میں 100 پیئر باآسانی بریڈ کروانے لگ گیا ۔ پہلا سیزن مناسب رہا ۔ 2023میں بریڈ اور بہتر رہی اور 2024 میں میرے پاس بہت اچھی بریڈ تھی۔ لیکن قیمتیں بہت نیچے آ چکی تھیں۔ جو جوڑا ساٹھ ہزار کا لیا تھا اس کا بچہ چھ سو پر آگیا تھا اور جو چالیس ہزار کا لیا اس کا بچہ پانچ سو تک آگیا تھا۔ پیسے بہت زیادہ لگ چکے تھے اور لگی جارہے تھے۔ میں بلکل بھی نہیں گھبرایا اور دانہ پانی دوائیاں کیمیکلز جاری تھے۔ پنجروں کی صفائی اور ٹرے کی دھلائی کیلئے ایک باجی آتی تھیں۔ خرچہ بہت احتیاط کے باوجود پندرہ سے بیس ہزار تک چلا جاتا تھا۔ مجھے کوئی فرق نہیں پڑ رہا تھا۔ دسمبر 2024 میری دفتر میں مصروفیات مزید بڑھ گئیں اور برڈز کیلئے وقت نکالنا مشکل ہوگیا تھا۔ سب برڈز کیلئے میں نے کسٹمائز پی وی سی کے ڈبے بنوائے جس میں وسیم بھائی نے بہت محبت فرمائی۔ مختلف ایکسپرٹس کے ساتھ رابطے میں رہتا لوبرڈ کے سیمینار بھی اٹینڈ کرتا۔ اور پرندوں کی بریڈنگ پر بہت سی ویڈیوز بھی بنائیں۔ آگست 2025میں مجھے اندازہ ہوا کہ میری بیگم اور ایک بیٹی ایک مشکل کام میں پڑ گئیں ہیں شوق میرا ہے اور محنت وہ کررہی ہیں تو میں نے اس کام کو ختم کرنے کا فیصلہ کیا اور 6 ستمبر 2025 تین سال اور چند ماہ اس کام کو کیا تقریباً دو ملین سے زیادہ کا نقصان کیا اور الحمدللہ ہنسی خوشی اس کام سے نکل گئے۔ جولائی 2022 سے ستمبر 2025 تک روزانہ کی بنیاد پر برڈز کی قیمتیں کم ہی ہوئیں۔ کچھ دوست ابھی بھی اس کام کے نئے دوستوں کو خواب دکھا رہے ہیں۔ یہ بھی جوئے کی ایک نسل ہے جس میں چند لوگوں نے کروڑوں کمائے اور بہت سو نے لاکھوں گنوائے۔ سنا تھا کہ پیوستہ رہ شجر سے امید بہار رکھ۔ لیکن شجر سے پرندے اڑ چکے ہیں احتیاط سے مزدوری کیجئے۔ شکریہ
(اگر کسی بھی صاحب کی اس مضمون سے دل آزاری ہوئی ہے تو ویڈیو بنانے سے گریز کریں کیونکہ یہ مضمون آپ کیلئے نہیں ہے  )

The post برڈ بریڈنگ بس ہوگئی appeared first on Muhammad Azhar Hafeez.