Своевремено една од најталентираните руски ракометарки, Алена Ихнева, во новата сезона се врати во татковината.

По една сезона во турскиот тим Бурса Бујукшехир, Ихнева се врати дома и ќе го носи дресот на рускиот вицепрвак ЦСКА Москва.

Ихнева низ кариерата покрај за матичната Лада, две сезони мина и во Вардар, а потоа патот ја водеше низ Франција (Флери Луар), Хрватска (Подравка), Русија (Астраханочка), Унгарија (Кишварда).

Во Турција, покрај за Бурса, играше и за составите на Кастамону и Анталија Коњалти со кој го освои трофејот во ЕХФ Европскиот Куп. Во татковината беше дел и од Черноморочка.

The post Некогашната вардарка се врати дома: Алена Ихнева ќе игра за ЦСКА Москва appeared first on 24 РАКОМЕТ.

Познати се четирите селекции кои ќе се борат за медалите на Европското првенство за младинци, кое се одржува во Романија. Во полуфиналето се пласираа Данска, Шведска, Словенија и Унгарија, а двата меча ќе се одиграат утре.

Првото полуфинале ќе донесе големо скандинавско дерби меѓу Шведска и Данска, додека во вториот дуел силите ќе ги одмерат соседите Словенија и Унгарија.

Шведска продолжува со импресивните настапи и останува единствената непоразена репрезентација на турнирот. Во четвртфиналето скандинавците ја декласираа Франција со 39-28, предводени од фантастичниот голман Виго Хокансон, кој забележа дури 22 одбрани и беше најзаслужен за убедливата победа.

Данска, пак, без поголеми проблеми ја совлада Швајцарија со 36-29 и обезбеди ново полуфинале, контролирајќи го натпреварот од самиот почеток.

Најголемото изненадување го приреди Словенија, која со убедливи 30-23 ја совлада актуелната европска шампионска селекција Шпанија. Блескаше голманот Матевж Млакар со 16 одбрани, додека Алјуш Анжиќ беше незапирлив во нападот со 10 погодоци, носејќи ја својата репрезентација до заслужено полуфинале.

Најдраматичниот четвртфинален натпревар го одиграа Германија и Унгарија. По голема борба, Унгарците славеа со 27-25, а победата ја заверија со погодок во последната секунда. Клучен момент беше одбраната на голманот Адам Балог, кој го запре германскиот напад на триесетина секунди до крајот, по што Мате Фазекаш погоди на спротивната страна за конечен триумф.

Полуфиналните натпревари се играат во петок, а победниците ќе се борат за европската титула во недела.

The post Познати полуфиналистите на ЕП: Унгарија ја шокира Германија, словенечки нокаут за „фуријата“ appeared first on 24 РАКОМЕТ.

Македонија ќе има еден претставник во Лигата на Европа во претстојната сезона, а тоа ќе биде битолски Еурофарм Пелистер.

Пелистерци jа чекаат ждрепката во текот на утрешниот ден од првиот шешир заедно со екипите на Фленсбург, Нексе, Татабања, Савехоф, Извиѓач, Бенфика и Бидасоа Ирун.

Опасноста за македонскиот претставник доаѓа од последниот шешир каде се бундеслигашот Бергишер, финалист на германскиот Куп, како и незгодни скандинавски тимови од типот на Холстебро, Морс, Хамарби…

Ќе се формираат осум групи по четири екипи, прво и второпласираните продолжуваат во елиминациите, а првото коло од групната фаза е на 29/30 септември.

За ждрепката за групите ќе биде применувано правилото дека не може две екипи од иста земја да се најдат во иста група.

Лига на Европа, групна фаза:

шешир 1: Фленсбург (Германија), Нексе (Хрватска), Татабања (Унгарија), Савехоф (Шведска), Извиѓач (Босна и Херцеговина), Еурофарм Пелистер (Македонија), Бенфика (Португалија), Бидасоа Ирун (Шпанија)

шешир 2: Валур (Исланд), Кадетен Шафхаузен (Швајцарија), Елверум (Норвешка), Лимож (Франција), Карвина (Чешка), Гранољерс (Шпанија), Татран Прешов (Словачка), Гумерсбах (Германија)

шешир 3: Сесвете (Хрватска), Хафнарфјордур (Исланд), Бузау (Романија), Сен Рафаел (Франција), Слован (Словенија), Шамбери (Франција), Торелавега (Шпанија), Ла Риоха (Шпанија)

шешир 4: ЧСМ Букурешт (Романија), Маритимо (Португалија), Агуаш Сантас (Португалија), Морс (Данска), Бергишер (Германија), Холстебро (Данска), Вибжеже Гдањск (Полска), Хамарби (Шведска)

____________________________________________________________________________________________________
Добивај директно вести на твојот мобилен телефон, приклучи се на Viber групата на семејството на 24ракомет. Со еден клик до сите ракометни вести.
_____________________________________________________________________________________________________

The post Еурофарм Пелистер во евро-лотарија appeared first on 24 РАКОМЕТ.

Црногорскиот интернационалец Мерис Бошњак кариерата ќе ја продолжи во грчкиот ПАОК и ќе му биде соиграч на Македонецот Евгениј Темелкоски.

Бошњак зад себе има две сезони во Асобал лигата, каде настапуваше за Уеска. Иако еден период беше надвор од терените поради повреда, црногорскиот интернационалец  успешно му се врати на ракометот.

Пред трансферот во Шпанија во летото 2024 година, Бошњак настапуваше во Македонија, каде го носеше дресот на Струга, а претходно беше дел и од Еурофарм Пелистер 2.

Токму одличните настапи во македонската Суперлига, каде беше еден од лидерите на Струга и се наметна како еден од најдобрите бекови во првенството, му обезбедија трансфер во Асобал лигата.

По двегодишната етапа во Шпанија, Бошњак сега отвора ново поглавје во кариерата и ќе го носи дресот на ПАОК.

The post Играше во Битола и во Струга, сега се пресели во Солун appeared first on 24 РАКОМЕТ.

Новата Регионална ракометна лига ги доби раководните структури за првата сезона. На конститутивната седница на Управниот одбор на машката и женската регионална лига беа донесени повеќе важни одлуки за функционирањето на натпреварувањето, а значајна улога во организацијата ќе има и Македонија.

Македонецот Ѓоко Колевски е именуван за комесар за натпреварување на Регионалната ракометна лига. Тоа значи дека поранешниот македонски судија ќе биде еден од клучните луѓе во оперативниот дел на лигата, односно во делот поврзан со натпреварувачкиот систем и спроведувањето на сезоната.

Управниот одбор го сочинуваат по еден претставник од трите федерации-основачи – Ракометниот сојуз на Србија, Ракометната федерација на Македонија и Ракометниот сојуз на Црна Гора. Сите одлуки на првата седница биле донесени со консензус на трите членки.

За претседател на Управниот одбор е избран Иван Миливојевиќ, со утврден редослед на ротација на претседавањето по сезони, додека за извршен директор на лигата е именувана поранешната црногорска репрезентативка Милена Раичевиќ, со мандат од две сезони.

Колевски е добро познато име во македонскиот ракомет. Има значка на ЕХФ и судел многу меѓународни натпревари, и финални дуели од куповите на ЕХФ, а долги години беше дел од судиската двојка заедно со Сашо Кркачев. Двојката судеше и натпревари во регионални и меѓународни натпреварувања, а во домашниот ракомет долго важеше за еден од поискусните судиски тандеми.

И во минатото Колевски повеќепати беше поврзуван со можност да биде дел од раководните структури во однос на натпреварувањето, но сега тоа добива и официјална потврда, само како дел од Регионалната лига. Од ова сезонава Колевски премина во делегати, и во иднина свирчето на терен ќе го замени со делегатската улога на записничката маса.

На конститутивната седница на Регионалната лига беа усвоени и Правилникот за натпреварување и Дисциплинскиот правилник, кои ќе се применуваат од сезоната 2026/27 и во машката и во женската лига. Именувани се и останатите лица во органите на лигата – Ненад Николиќ од Србија ќе биде комесар за судење, Веселин Радетиќ од Црна Гора комесар за безбедност, а во Дисциплинската комисија ќе членуваат Бојан Перовиќ од Србија, Борко Бајалски од Македонија и Стефан Шапоњиќ од Црна Гора.

Регионалната лига треба да биде заеднички проект на Србија, Македонија и Црна Гора, со машко и женско натпреварување. Според најавите, првото коло во машката лига е закажано за 23 август 2026 година, додека женската лига ќе стартува претходно според договорот на клубовите.

Сепак клубовите меѓусебе може да се договорат и играње на своите дуели во друг термин, а дуелите од домашното првенство ќе се сметаат исто така и за Регионалната лига. Од следната сезона лигата треба да се игра по поинаков распоред, со нормални и договорени датуми за колата.

Во машката регионална лига настапуваат екипи од три земји, од Македонија, Србија и Црна Гора, поделени во две групи по пет екипи. Првите две ќе се пласираа на Ф4 турнирот кој би требало да се одигра напролет.

The post Македонец ќе раководи со Регионалната лига – Ѓоко Колевски именуван за комесар за натпреварување appeared first on 24 РАКОМЕТ.

 

View this post on Instagram

 

A post shared by 24 Rakomet (@24rakomet)

The post Лазов даде девет гола против Турција и беше избран за МВП! appeared first on 24 РАКОМЕТ.

Maшката младинска репрезентација на Македонија ја запиша втората победа на Европското првенство во Романија и славеше против Турција со убедливи 17 гола разлика, 41-24.

Ова значи дека избраниците на Игор Илиевски ќе разигруваат за пласман од 17 до 20 место, додека Турција оди во битка за избегнување на последната позиција и ќе разигрува за пласман од 21 до 24 место. Следниот натпревар е утре против Полска.

Голманите Николовски и Младенов поделија по едно полувреме, и имаа 14 одбрани, двајцата по седум и успешност од 37%. Мики Лазов беше најдобар стрелец со девет погодоци, а шест додаде Поповски, додека пет пати погоди Ѓурмешевиќ.

Победникот на оваа пресметка беше најавен уште по десетина минути, кога Македонија водеше со 8-2, а беше решен по првото полувреме кога нашите момци имаа водство од девет гола, 20-11.

Николовски беше стандардно одличен на голот, најмногу погодуваше Ѓурмешевиќ во првиот дел, а потоа се разиграа и Лазов, Крстевски, Поповски…Турците немаа решенија во одбраната, иако имаа одличен голман, кој запиша десет одбрани за триесетина минути.

На стартот на второто полувреме на македонскиот гол застана Младенов, во одбраната играа Славков, Петрески и Ѓорчески, а селекторот Илиевски им даде шанса на сите ракометари да играат и комбинираше составот. Тоа не се одрази на резултатот и предноста на Македонија само растеше до крајот до конечните 41-24.

The post Втора радост на ЕП – Македонија ја прегази Турција! appeared first on 24 РАКОМЕТ.

Тимот на Овче Поле го промовираше првото засилување за претстојната сезона во прволигашката конкуренција.

Во Свети Николе се сели еден од најдобрите прволигашки стрелци во последните неколку сезони, десниот бек Филип Петровски.

Тој потекнува од ракометната школа на Металург, а во досегашната кариера ги бранеше боите на уште три клуб.

Петровски беше дел од Јуниор Кисела Вода, Металург РА, а минатата сезона настапуваше за Драчево Јуниор.

„Веруваме дека неговиот квалитет, борбеност и победнички менталитет ќе бидат големо засилување за нашиот тим и ќе придонесат во остварувањето на клупските цели во новата сезона“, напишаа од тимот на Овче Поле на социјалните мрежи.

Минатата сезона Овче Поле ја освои десеттата позиција на табелата.

The post Овче Поле се засили со еден од најдобрите прволигашки стрелци appeared first on 24 РАКОМЕТ.

Гледајте ВО ЖИВО, Македонија – Турција, ТУКА*

*платформата ЕХФ ТВ работи со претходна регистрација и претплата

The post 🔴ВО ЖИВО🔴 Македонија – Турција appeared first on 24 РАКОМЕТ.

Шампионот Ѓорче Петров го склопува играчкиот ростер пред стартот на новата сезона во која влегува со големи амбиции и ќе настапува на четири фронта, а најновото засилување доаѓа од Романија.

Како што дознава 24Ракомет, ново име во редовите на шампионот треба да биде искусната романска интернационалка Сабрина Лазеа. Станува збор за ракометарка што има 29 години и долго време играше во една од најсилните женски лиги во Европа.

Таа потекнува од Фагараш, во младинските денови играше за Баја Маре, а потоа беше дел од Дева. Најмногу време се задржа во Залау и соработуваше со легендарниот Георге Тадичи.

Од 2022 година замина во Слатина, каде мина една сезона пред да се пресели во Тарги Жиу со кој играше во Лигата на Европа. Беше дел и од Магура Чиснадие, а последната сезона ја мина во италијанскиот Трапани, а настапите во Македонија ќе бидат второ интернационално искуство.

Лазеа настапува на сите бековски позиции, но нејзината специјалност е играта во одбрана, па тренерот Димитријески ќе добие одлично решение во дефанзива на централните позиции.

Претходно Ѓорче Петров ги договори Катарина Шубериќ, Ана Марија Коларовска, триото Црногорки – Аника Јовановиќ, Анѓела Губериниќ и Нина Вуксановиќ, а доаѓа и Кристина Наумовска од вториот тим. Соработките беа продолжение со Емилијана Ризоска, Ива Велкова, Анастасија Трпеска, Ана Вранчиќ, Армина Исиќ, Марија Јовановска, Милена Вујисиќ, сестрите Бојана и Борјана Коцеви, Мила Ѓорѓиевска, Дарија Наумоска…На клупата наместо Александар Царчев ќе биде Славиша Димитријески.

Од шампионот заминаа Стефанија Ѓорѓиевска, Марија Јанкуловска, Теодора Дукоска, Марија Гугуљанова и Катерина Дамјаноска…

Ѓорче Петров покрај во првенството и Купот на Македонија, ќе игра и во Регионалната лига, додека во Лигата на Европа ќе биде дел од второто квалификациско коло и ќе се соочи со чешкиот Бањик Мост.

The post Ѓорче Петров се поднови со искусна Романка – специјалистка за одбрана! appeared first on 24 РАКОМЕТ.